ۇيىمداستىرۋشىلار اۋەسقوي فوتوگرافتارعا دا, ءوز ءىسىنىڭ كاسىبي ماماندارىنا دا بىردەي شارت قويعان. ءار قاتىسۋشىنىڭ 3 فوتودان ۇسىنۋ مۇمكىندىگى بولدى. ال سايىس قورىتىندىسىنا دەيىن ونلاين فورماتتا, ەلدىڭ بارلىق وڭىرىنەن 500-گە جۋىق جۇمىس كەلىپتى. قۇرامىنا پارتيا باسشىلىعى مەن تاجىريبەلى فوتوگرافتار ەنگەن قازىلار القاسى تۋىندىلاردى تاقىرىپقا سايكەستىگى, جۇمىستى بەرە بىلۋدەگى جاڭاشىلدىعى, كوڭىل كۇي جانە باسقا دا تالاپتار نەگىزىندە ىرىكتەگەن. سونىمەن قاتار قازىلار «الەۋمەتتىك جەلىدەگى جۇلدەگەر» سياقتى ارنايى سىيلىق تاعايىنداۋ جونىندە شەشىم قابىلداپ, ىرىكتەۋ پارتيانىڭ Telegram كانالىندا اشىق داۋىس بەرۋ ارقىلى جۇرگىزىلىپتى. مۇنان وزگە ەڭبەك ادامىنىڭ قوعامداعى مارتەبەسىن كوتەرۋ ماقساتىندا تاعايىندالعان «اۋىل ەڭبەككەرىنىڭ بەينەسى» ارنايى سىيلىعىنىڭ يەسى دە كەلگەن فوتولار اراسىنان تاڭداپ الىندى.
ءىس-شاراعا ءماجىلىس دەپۋتاتتارى, اۋىل شارۋاشىلىعى مينيسترلىگىنىڭ, استانا قالاسى مادەنيەت باسقارماسىنىڭ باسشىلىعى, ديپلوماتيالىق ميسسيا وكىلدەرى, جوعارى وقۋ ورىندارىنىڭ پروفەسسورلىق-وقىتۋشىلىق قۇرامى, شىعارماشىل زيالى قاۋىم مەن جاستار قاتىستى.
«فوتوسۋرەت ارقىلى ءبىز ادەتتەگى دۇنيەلەردى جاڭا پريزما ارقىلى كورۋ مۇمكىندىگىن الدىق. قىزىعى مەن قيىندىعى قاتار جۇرەتىن اۋىل تۇرعىندارىنىڭ تىرشىلىگىن سول قالپىندا كورسەتە بىلگەن ءار قاتىسۋشىعا العىس بىلدىرەمىز. جىل ساناپ بايقاۋعا قاتىسۋشىلار سانى ارتىپ كەلەدى. بيىل 122 ادام قاتىسىپ, بايقاۋعا 500-گە تارتا تۋىندى ۇسىنىلدى. بۇل ءوز كەزەگىندە فوتوگرافيا ونەرىنىڭ اۋەسقويلارى مەن كاسىپقويلارى اراسىندا اتالعان كونكۋرستىڭ ماڭىزدىلىعىن كورسەتەدى», دەدى سالتاناتتى شارانى اشقان «اۋىل» پارتياسى توراعاسىنىڭ ءبىرىنشى ورىنباسارى تولەۋتاي راحىمبەكوۆ.
بايقاۋ قورىتىندىسىندا ءسوز العان حالىقارالىق «National Geografic» جۋرنالىنىڭ جاۋاپتى رەداكتورى ايبىن شاعالاق پەيزاج, رەپورتاجدىق ءتۇسىرىلىم, دەرەكتى فوتوگرافيا, پورترەتيستيكامەن اينالىساتىن فوتوگرافتار ءۇشىن اۋىل تاقىرىبىنىڭ قىزىقتى ەكەنىن ايتىپ, وسى ونەرگە شىن بەرىلگەن ادامداردى قولداعانى ءۇشىن «اۋىل» پارتياسىنا العىس ءبىلدىردى.
بايقاۋ ناتيجەسىندە ءى ورىندى سەرىك مايەمەروۆ (ماڭعىستاۋ وبلىسى) جەڭىپ السا, ءىى ورىندى نۇربولات نۇرجاۋباي (قىزىلوردا وبلىسى), ءىىى ورىندى بەرەكە سەيتجاپپار (شىمكەنت قالاسى) يەلەندى. «اۋىل ەڭبەككەرىنىڭ بەينەسى» سىيلىعى «Egemen Qazaqstan» گازەتىنىڭ ءفوتوتىلشىسى ەرلان وماروۆقا (استانا قالاسى), «الەۋمەتتىك جەلىدەگى جۇلدەگەر» سىيلىعى جازيرا قارىمساقوۆاعا (اباي وبلىسى) تابىستالدى.
«بارلىق بەرەكەنiڭ باستاۋى – اۋىل. سوندىقتان اۋىل ناقىشتارىن دəرiپتەيتiن مۇنداي باستامالاردى ەرەكشە قولدايمىن. بiرگە اتسالىسۋعا تىرىسامىز. اۋلىمىز كɵركەيە بەرسiن», دەيدى جۇلدەگەر نۇربولات نۇرجاۋباي.
ماراپاتتاۋ راسىمىنەن سوڭ, ساۋدا ويىن-ساۋىق ورتالىعى فويەسىندە «اۋىل ناقىشتارى» فوتوكورمەسى اشىلدى. مۇندا اۋىل بەينەسىن بەدەرلەگەن 50 فوتونى استانا تۇرعىندارى مەن قوناقتارى تاماشالادى.
