قالاي الىپ قاراساق تا, قارعىن سۋدان كەز كەلگەن ۋاقىتتا قاۋىپ ءتونۋى بەك مۇمكىن. مۇنى جەرگىلىكتى اتقارۋشى بيلىك تە تولىقتاي سەزىنىپ وتىر. وبلىستىق توتەنشە جاعدايلار دەپارتامەنتىنىڭ باسشىسى ارمان توقانوۆتىڭ ايتۋىنشا, سۋ تاسقىنى قاۋپىنىڭ الدىن الۋ ماقساتىندا بارلىق جەردە تاۋلىك بويى كەزەكشىلىك ۇيىمداستىرىلىپ جاتىر. ماماندار جاعدايدى تولىققاندى زەردەلەپ ءجۇر. جاۋاپتى تۇلعالار سۋ قويمالارىنىڭ قانشالىقتى تولعانىن جان-جاقتى قاراپ, كۇندەلىكتى مونيتورينگ جاساپ وتىر.
دەپارتامەنت باسشىسى كەلتىرگەن دەرەككە جۇگىنسەك, وڭىردە حالىقتى قابىلداۋعا ارنالعان 396 پۋنكت ازىرلەنگەن ەكەن. جاعدايدى تولىققاندى باقىلاۋدا ۇستاۋ ماقساتىندا 1 459 ادام, 364 تەحنيكا, 135 سۋ ايداۋ قۇرالى جانە 19 ءجۇزۋ قۇرالى بار ارنايى توپتار جاساقتالعان.
ءوڭىر باسشىسى ەربول قاراشوكەەۆ تە وڭىردەگى جاعدايعا ءجىتى نازار اۋدارىپ وتىر.
– پرەزيدەنت سۋ تاسقىنىنا قارسى جۇمىستى كۇشەيتۋ, ازاماتتاردىڭ قاۋىپسىزدىگىن قامتاماسىز ەتۋ بويىنشا ناقتى مىندەت جۇكتەپ وتىر. جەرگىلىكتى اتقارۋشى بيلىك وكىلدەرى قاراپ قالمايتىنى انىق. ءبىز ناقتى ءىس-قيمىل جوسپارىن قۇرىپ, كەز كەلگەن جاعدايعا, قاۋىپ تونسە جەدەل ارەكەت ەتۋگە تاس-ءتۇيىن دايىن بولۋىمىز كەرەك. باستى ماقسات – ادام قاۋىپسىزدىگى. وڭىردەگى بارلىق اۋدان اكىمدەرى مەن جاۋاپتى باسقارما باسشىلارى سۋ قويمالارى مەن وزگە دە نىسانداردىڭ جاي-كۇيىن ۇدايى نازاردا ۇستاۋى كەرەك. سونداي-اق سۋ تاسقىنىنا دايىندىقتى اكىمدەر ۇدايى تەكسەرىپ وتىرعانى ابزال دەپ ەسەپتەيمىن. مۇنداي كەزەڭدە ەلدى دۇرلىكتىرۋگە بولمايدى. جالعان اقپارات بەرگەن ادامداردىڭ ماسەلەسى مايشاممەن قارالاتىنىن ءوڭىر تۇرعىندارى قاپەردەن شىعارماعانى دۇرىس. ءار مامان ءوز ىسىنە مۇقيات بولىپ, شىنايى اقپاراتپەن ءبولىسۋى كەرەك», دەيدى اكىم.
وڭىردە سۋ تاسقىنىنا قارسى دايىندىق جۇمىسى جاۋاپتى ورگان وكىلدەرىنىڭ باسقوسۋى كەزىندە جان-جاقتى پىسىقتالدى. وبلىس ورتالىعى تاراز قالاسىنداعى تۇرعىن الاپتارىنداعى بارلىق كانال مەن ارىق-اتىزدىڭ تازالىعى دا كۇندەلىكتى باقىلاۋعا الىنعان. قالا اكىمدىگى بۇل ماسەلەگە ايرىقشا دەن قويىپ وتىر. سۋ تاسقىنى قاۋپى بار ۋچاسكەلەردە قاجەتتى رەزەرۆتەر مەن ءموبيلدى توپتاردى قالىپتاستىرۋ بويىنشا دا ايتارلىقتاي جۇمىستار اتقارىلىپ جاتىر.
وبلىس اكىمى ە.قاراشوكەەۆ تارازدى قيىپ وتەتىن, باستاۋىن كورشى قىرعىز رەسپۋبليكاسىنان الاتىن تالاس وزەنىنىڭ جاعالاۋىن نىعايتۋ جۇمىستارىن تىكەلەي ءوز باقىلاۋىنا الىپ وتىر. تاراز قالاسى, بايزاق, جامبىل اۋداندارىنداعى بىرقاتار ەلدى مەكەننىڭ قاۋىپسىزدىگى نازاردان تىس قالعان جوق. اۋدان مەن قالا باسشىلارىنا ءتيىستى تاپسىرمالار بەرىلگەن.
قالاي دەسەك تە, جامبىلدىق ماماندار قارعىن سۋدان تونەتىن قاۋىپپەن كۇرەسۋگە دايىن. جاۋاپتى تۇلعالار تۇرعىنداردىڭ قاۋىپسىزدىگىن قامتاماسىز ەتۋ ماقساتىندا ءتيىستى مىندەتتەمەلەردى موينىنا الىپ وتىر.
جامبىل وبلىسى
