فوتو: Inbusiness.kz
ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ناۋرىزدا 748 ملن دوللارعا ۆاليۋتا ساتىلدى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 19%-ىن جانە كۇنىنە 44 ملن دوللاردان اسپايتىن مولشەردى قۇرادى.
ۇلتتىق بانك ۇلتتىق قوردىڭ قاراجاتىمەن وپەراتسيا جۇرگىزۋ كەزىندە نارىقتىڭ بەيتاراپ قاعيداتىن ساقتايدى. بۇل شەتەل ۆاليۋتاسىن ۇدايى جانە بىركەلكى ساتۋدى بىلدىرەدى. بۇل تاجىريبە ۇلتتىق قورداعى وپەراتسيالاردىڭ ۆاليۋتا نارىعىنا اسەرىن بارىنشا ازايتۋعا مۇمكىندىك بەرەدى. ۇلتتىق بانك ناۋرىزدا بجزق زەينەتاقى اكتيۆتەرىنىڭ ۆاليۋتالىق ۇلەسىن 30% دەڭگەيىندە ۇستاپ تۇرۋ ماقساتىندا بيرجاداعى ساۋدا-ساتتىقتا شەتەل ۆاليۋتاسىن ساتىپ الۋدى جالعاستىردى. ونىڭ جالپى سوماسى 500 ملن دوللاردى نەمەسە نارىقتىڭ جالپى كولەمىنىڭ شامامەن 13%-ىن قۇرادى», دەلىنگەن ۇلتتىق بانك حابارلاماسىندا.
سونداي-اق ۇب ناۋرىزدا ۆاليۋتالىق ينتەرۆەنتسيالار جۇرگىزگەن جوق دەپ مالىمدەيدى. رەسپۋبليكالىق بيۋدجەتكە ترانسفەرتتەر بولۋگە ۇكىمەتتىڭ الدىن الا بولجامدى وتىنىمدەرى بويىنشا 2024 جىلعى ساۋىردە ۇب ۇلتتىق قوردان 1 ملرد دوللاردان 1,1 ملرد دوللارعا دەيىنگى مولشەردە ۆاليۋتا ساتىلۋىن كۇتەدى. 2024 جىلعى ساۋىردە بجزق زەينەتاقى اكتيۆتەرىنىڭ ۆاليۋتالىق ۇلەسىن ۇستاپ تۇرۋ ءۇشىن 450 ملن دوللاردان 500 ملن دوللارعا دەيىنگى مولشەردە ۆاليۋتا ساتىپ الۋ كۇتىلەدى.
«ۇلتتىق بانك اشىقتىق قاعيداتى اياسىندا ۆاليۋتا نارىعىندا جۇرگىزىلەتىن بارلىق وپەراتسيا تۋرالى اقپاراتتى تولىق اشىپ كورسەتەدى. قىسقامەرزىمدى پەرسپەكتيۆادا تەڭگەنىڭ ديناميكاسى نارىققا قاتىسۋشىلاردىڭ كۇتۋلەرىنە, توقساندىق سالىق تولەمدەرىنە, الەمدىك نارىقتارداعى احۋالعا جانە گەوساياسي جاعدايدىڭ وزگەرۋىنە بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجىمىن ۇستانا بەرەدى», دەلىنگەن مالىمدەمەدە.
