قاردىڭ ەرۋى قارقىندى

الاكول اۋدانىنىڭ قابانباي, اقتۇبەك, بەسكول ستانساسى, كوكتۇما اۋىلدارى جانە كەربۇلاق اۋدانى قاينارلى اۋىلى بويىنشا 30 جەكە تۇرعىن ءۇي اۋلاسىن سۋ باستى. ابىروي بولعاندا تۇرعىن ۇيلەردىڭ ىشىنە سۋ كىرمەگەن. بۇعان قوسا ەكى اۆتوجولدىڭ ۇستىنەن ەرىگەن قار سۋى ءوتتى. اتاپ ايتساق, بۇل – كەربۇلاق اۋدانىنىڭ جولامان اۋىلى مەن جولامان ستانساسى جانە مالايسارى اۋىلى مەن مالايسارى ستانساسى جەرگىلىكتى ماڭىزى بار اۆتوجولدار. سونداي-اق اقسۋ اۋدانىنا قاراستى قوپا اۋىلىندا سۋ بۇرۋ كانالىندا سۋ دەڭگەيى كوتەرىلدى. وبلىستىق تجد توتەنشە جاعدايلاردىڭ الدىن الۋ باسقارماسىنىڭ باستىعى رينات تازابەكوۆ ايتۋىنشا, تۇرعىنداردىڭ بارىنشا ساقتانىپ جۇرگەنى ابزال.

«بۇگىندە ەسكەلدى اۋدانىنىڭ اباي جانە ەشكىولمەس اۋىلدارى بويىنشا ءتيىستى جۇمىستار باستالدى. سونداي-اق پانفيلوۆ اۋدانىنىڭ كوكتال-اراسان اۋىلى جانە تەكەلى قالاسى بويىن­شا كونكۋرستىق راسىمدەر جۇرگىزىلىپ جاتىر. ال كەربۇلاق اۋدا­نىنىڭ مالايسارى جانە پانفيلوۆ اۋدانىنىڭ قوڭىرولەڭ اۋىلدارى بويىنشا جوبالىق-سمەتالىق قۇجاتتار ازىرلەنىپ جاتىر. قاراتال اۋدانى ۇشتوبە قالاسى جانە كەربۇلاق اۋدانىنىڭ ارحارلى اۋىلدارى بويىنشا سۋ تاسقىنىنا قارسى جۇمىستار دەمەۋشىلىك قاراجات ەسەبىنەن جۇرگىزىلەدى», دەيدى ر.تازابەكوۆ.

ونىڭ ايتۋىنشا, وقىس وقيعالار كەزىندە دەپارتامەنت ماماندارى جەدەل تۇردە قۇتقارۋ جۇمىستارىن جۇرگىزۋگە دايىن. زارداپ شەككەندەر جوق, عيماراتتار دا ءبۇتىن. دەپارتامەنت جانە جەرگىلىكتى اتقارۋشى ورگاندارمەن بىرلەسە سۋ تاسقىنىنا بەيىم ەلدى مەكەندەردى ەرەكشە باقىلاۋعا الدى.

«جالپى, سۋ تاسقىنى جاعدايىنىڭ كۇردەلەنۋى كەزەڭىنە 95 توننا جانار-جاعارماي قورى, 2,6 مىڭ توننا ينەرتتى ماتەريالدار, 49 مىڭ قاپ دايىندالدى. بۇعان قوسا 1 056 جەكە قۇرام, 264 تەحنيكا بىرلىگى, 141 موتوپومپالار, 165 قورعانىس كيىمدەرى جانە 7 ءجۇزۋ قۇرالدارى بار. زارداپ شەككەن حالىقتى ۋاقىتشا ورنالاستىرۋ ماقساتىندا ءبىلىم بەرۋ جانە مادەنيەت ۇيلەرى عيماراتتارىندا 175 پۋنكت بەكىتىلدى», دەيدى ر.تازابەكوۆ.

بۇگىندە سۋ تاسقىنى جاعدايىن باقىلاۋ ءۇشىن وبلىس بويىنشا 57 گيدروپوست قويىلعان. ماماندار سۋ تاسقىنى قاۋپى بار ەكى ەلدى مەكەندە 1,2 كم سۋ بۇرۋ ارناسىنا جوندەۋ جانە 4,6 كم وزەن ارنالارىنا مەحانيكالىق تازارتۋ جۇمىستارىن جۇرگىزىپ جاتىر. سونىمەن قاتار سۋ تاسقىنىنا قارسى ءىس-شارالار ايلىعى اياسىندا 92 كم ارىق جەلىلەرى, 66 كم كانالدار جانە 1 728 سۋ وتكىزگىش قۇبىرىستارى قار مەن مۇزدان تازارتىلعان. سۋ باسۋ قاۋپى بار ەلدى مەكەندەردەن 17 مىڭ تەكشە مەتردەن اسا قار شىعارىلعان.

سۋ تاسقىنى جاعدايى كۇردەلەنگەن جاعدايدا 141 بىرلىك سۋ سورعىش موتوپومپالار مەن 264 بىرلىك تەحنيكا ءازىر تۇر.

جەتىسۋ وبلىسى