«رامازان – بىرلىك پەن بەرەكە ايى» اتاۋىمەن وتكەن رۋحاني كەشتە قمدب توراعاسى, باس ءمۇفتي ناۋرىزباي قاجى تاعان ۇلى اۋىزاشار داستارقانىنىڭ قادىرلى قوناقتارىن قاسيەتتى ايمەن قۇتتىقتاپ, ىزگى تىلەگىن ارنادى.
«رامازان – ون ەكى ايدىڭ سۇلتانى, بەرەكەلى دە كەشىرىمى مول اي. كۇندەلىكتى تىرشىلىك قامىمەن جۇرەتىن پەندەنىڭ جۇرەگىنە بۇل ايدا يمان نۇرى قۇيىلادى. ويتكەنى ورازا ادامدى تاقۋالىققا تاربيەلەيدى. سابىرلىق, قايىرىمدىلىق, مەيىرىمدىلىك, باۋىرمالدىق سەكىلدى ادامدىق اسىل قاسيەتتەر ارتىپ, يمان كۇشەيەدى. رامازان – اللانىڭ مەيىرىمى توگىلىپ, جۇماقتىڭ ەسىگى ايقارا اشىلاتىن, يماندى كۇشەيتۋگە مۇمكىندىك بەرىلگەن قاسيەتتى اي.
ورازا – كۇندىز تەك ءىشىپ-جەۋدەن ءوزىن شەكتەۋ دەگەن ءسوز ەمەس. ورازا – رۋحتىڭ ازىعى, ءتاننىڭ شيپاسى. رامازان جان مەن ءتاندى رۋحاني تازارتاتىن, مۇسىلمان ءۇشىن ۇلكەن سابىر مەكتەبى. اۋزى بەرىك جاندار وزىنە دورەكىلىك كورسەتكەن كەيبىر كىسىلەرگە: «مەن ورازامىن», دەگەن ءبىر اۋىز سوزبەن كوركەم مىنەزدىڭ كەرەمەت ۇلگىسىن كورسەتەدى. ناپسىسىنە توقتاۋ سالىپ, سابىر ساقتايدى. ال سابىر يەسىنە بەرىلەتىن سىي – ءجاننات», دەگەن قمدب توراعاسى وسى قاسيەتتى ايدا ورازا ۇستاعاندارعا اۋىز اشتىرۋدىڭ دا ۇلكەن ساۋاپتى امال ەكەنىن اتاپ ءوتتى.
ءوز كەزەگىندە رۋحاني كەشتىڭ قۇرمەتتى قوناقتارى باس ءمۇفتي ناۋرىزباي قاجى تاعان ۇلىنا العىس ايتىپ, ءدىني باسقارمانىڭ رۋحانيات سالاسىنداعى اۋقىمدى ىستەرىنە تىلەكتەستىگىن ءبىلدىردى. كەش سوڭىندا قاسيەتتى قۇران اياتتارى وقىلىپ, باس ءمۇفتي ارنايى دۇعا جاسادى. سونداي-اق اۋىزاشار قوناقتارىنا رامازان سىيلىعى تابىس ەتىلدى.
ورازا – قايىرىمدىلىق امالدارى كوپ جاسالاتىن كەزەڭ. قۇدايدىڭ ساۋابىن الام دەۋشى يماندى ازاماتتار بۇل ءساتتى قالت جىبەرمەي, قولىندا بارىمەن ءبولىسىپ, ىزگى ءىس جاساۋدى ۇدەتە تۇسەدى. ويتكەنى حاديستە ايتىلعانداي, رامازاندا جاسالعان ءناپىل امالعا پارىزدىڭ, پارىز امالعا جەتپىس پارىزدىڭ ساۋابى بەرىلەدى ەكەن. وسىعان وراي قمدب «زەكەت جانە قايىرىمدىلىق» قورىنىڭ ۇيىمداستىرۋىمەن رامازان ايىنىڭ العاشقى اپتاسىندا جانە ناۋرىزناما اياسىندا رەسپۋبليكا بويىنشا قايىرىمدىلىق كۇنىنە وراي 5055 وتباسىنا ازىق-ت ۇلىك سەبەتتەرى تاراتىلدى.
سونىڭ ىشىندە استانا قالاسىندا 1250 وتباسى قايىرىمدىلىق كومەك الىپ, قۋانىشقا كەنەلدى. سونداي-اق 3 مۇگەدەكتەر ۇيىنە, 2 بالالار ۇيىنە جانە 2 قارتتار ۇيىنە قايىرىمدىلىق كومەك كورسەتىلدى. ودان بولەك ءمۇفتيات تاراپىنان 15000 وتباسىنا اۋىزاشار داستارقانى جايىلدى. ايتا كەتسەك, مۇنداي ىزگى امالداردىڭ, ياعني جۇرتشىلىققا بەرىلىپ جاتقان كومەكتەردىڭ جاريا تۇردە جاسالۋىنىڭ ەش سوكەتتىگى جوق. كەرىسىنشە, باسقالارعا ۇلگى بولۋى, ەل ىشىندە جاپپاي تارالۋى ءۇشىن ونى كوپشىلىككە كورسەتۋدىڭ دە پايداسى مول.
