اتالعان ەكى تومدىقتا ۇلتىمىزدىڭ دەگدار تۇلعالارى اباي مەن اۋەزوۆتىڭ شىعارماشىلىعىنداعى تىڭ دۇنيەلەر وقىرمان نازارىنا ۇسىنىلىپ وتىر. ءبىرىنشى تومعا مۇحتار اۋەزوۆتىڭ وڭتۇستىككە ساپارى مەن شىمكەنت قالاسىندا جەرلەنگەن اباي ۇرپاقتارىنا قاتىستى جاڭا دەرەكتەر توپتاستىرىلعان. ال 2-تومعا اباي شىعارمالارىنداعى تەكستولوگيالىق-تەرمينولوگيالىق ماسەلەلەر مەن مۇرسەيىت, تۇراعۇل, كاكىتاي حاقىنداعى ماعلۇماتتار ەندى. كىتاپتىڭ جاڭاشىلدىعى – اباي قۇنانباي ۇلىنىڭ قاراسوزدەرى, ولەڭدەرى مەن اۋدارمالارى تۇپنۇسقا قولجازبالارمەن قايتا سالىستىرىلىپ, ونىڭ ترانسكريپتسياسى جاسالىپ, ارنايى تۇسىنىكتەمە بەرىلگەن.
كورىسۋ كۇنىمەن تۇسپا-تۇس كەلگەن كىتاپتىڭ تۇساۋكەسەرىنە ارنالعان سالتاناتتى ءىس-شارانى م.اۋەزوۆ اتىنداعى وقۋ باسقارما توراعاسى-رەكتور مىندەتىن ۋاقىتشا اتقارۋشى قايرات نۇرمانبەتوۆ اشىپ, عىلىمي-زەرتتەۋ ورتالىعىنىڭ جۇمىسىنا شولۋ جاسادى, ەكى تومدىق جاڭا كىتاپ عالىمداردىڭ 5 جىلدىق زەرتتەۋلەرىنىڭ ناتيجەسى ەكەندىگىن اتاپ ءوتتى. ءىس-شاراعا قاتىسقان «Amanat» پارتياسى شىمكەنت قالالىق فيليالىنىڭ اتقارۋشى حاتشىسى جانار بەكتاەۆا, اكادەميك داريا قوجامجاروۆا «اۋەزوۆ ءھام اباي» كىتابى تۋرالى پىكىرلەرىن ءبىلدىردى. جۋرناليست, وبلىستىق ءماسليحات دەپۋتاتى رەتىندە ارنايى شاقىرىلعان وسى جولداردىڭ اۆتورى ءبىز دە ءوز پىكىرىمىزدى, تىلەگىمىزدى ايتتىق. ەڭبەك اۆتورلارى ابايتانۋ باعىتىندا زەرتتەۋ جۇرگىزىپ جۇرگەن – اقجول قالشابەك پەن ءازىمحان يسابەك. وسى ارادا قازاقتىڭ «ۇستازى مىقتىنىڭ ۇستانىمى مىقتى» دەگەن ءسوزى ەرىكسىز ەسكە ورالادى. ولاي دەيتىنىمىز اقجول قالشابەك – ەسىمى ەلگە ءمالىم ابايتانۋشى, عالىم مەكەمتاس مىرزاحمەت ۇلىنىڭ شاكىرتى. ال ءازىمحان يسابەكتىڭ ۇستازى اقجول قالشابەك. ياعني ابايتانۋشى ءۇش عالىمنىڭ اراسىندا عىلىمي ىزدەنىستىك تۇرعىدا ساليقالى ساباقتاستىق, ۇيلەسىمدى ۇندەستىك بار.
«بۇل ءومىر قىزىعى ماحابباتپەن,
كورگە كىرسەڭ ۇلگىلى جاقسى اتاقپەن.
ارتتاعىعا ءسوزىڭ مەن ءىسىڭ قالسا,
ولسەڭ دە, ولمەگەنمەن بولاسىڭ تەڭ»,
دەگەن ەدى ۇلى اباي. دانا تۇلعالاردىڭ مۇراسىن قايتا تىرىلتۋگە سەپ بولعان بۇل تۋىندىنىڭ ءمانى مەن ماعىناسى ايرىقشا ەكەندىگى ءسوزسىز. 1000 دانامەن استانا قالاسىنداعى «فوليانت» باسپاسىنان جارىق كورگەن كىتاپتىڭ مۇقاباسى ۇلى جازۋشى مۇحتار اۋەزوۆ جارىققا شىعارعان «اباي» جۋرنالىنىڭ ۇلگىسىمەن ورنەكتەلگەن. قالىڭ وقىرمان قاۋىمعا ارنالعان تۋىندى كىتاپحانالارعا تاراتىلادى.
شىمكەنت
