جاڭا فورماتتا, ياعني ءان ونەرى مەن كۇي, تەرمە جانرلارى جاڭعىرا سىر وڭىرىنەن باستاۋ العان ايتىستى كوپشىلىك قاۋىم ۇلتتىق ونەردى دامىتۋعا جاسالعان وڭ قادام رەتىندە باعالاۋدا. كوماندالىق ايتىسقا قاتىسۋشىلارعا ساتتىلىك تىلەگەن وبلىس اكىمى دارحان ساتىبالدى بۇل جوبانىڭ ونەرسۇيەر قاۋىمعا بەرەرى مول ەكەنىن اتاپ ءوتتى. ال جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ەرلان ءجۇنىسباي وبلىس اكىمىنىڭ قۇتتىقتاۋ سالەمىن جەتكىزدى. الامان بايگەنى قازاقستاننىڭ ەڭبەك سىڭىرگەن قايراتكەرى, ءماجىلىس دەپۋتاتى امانجول التاەۆ جۇرگىزدى.
تۇركىستان وبلىسىنان بەكارىس شويبەكوۆ, شاحماردان بەكارىس ۇلى, نۇرماحان جاقىپبەك, اياز رۇستەموۆ, ايان نيازبەك, جاندوس ق ۇلىمبەتوۆ, قاجىمۇقان ابزالوۆ, ماعجان التەنباەۆ, داۋرەن اقساقالوۆ, رۋسلان احيمبەكوۆ, ال جامبىل وبلىسىنان احمەتجان وزبەكوۆ, مانسۇر ەركەبۇلان ۇلى, دارحان ءابدىمانات, بەكارىس كوشتاەۆ, اسحات قىلىشبەك, ديدار باسىعاراەۆ, قانات مىرزاحان, مەرەي ابۋەۆا, الينا ايدارالى, مارالبەك باباقۇلوۆ ءوز ءوڭىرىنىڭ نامىسىن قورعادى. الدىمەن جىرشى-تەرمەشىلەر سايىستىڭ كوركىن قىزدىرسا, ودان سوڭ كۇمىس كومەي انشىلەر ءداستۇرلى ءاننىڭ تيەگىن اعىتىپ, قۇلاق قۇرىشىن قاندىردى. ال ايتىس اقىندارى قىز بەن جىگىت سۇرە جانە قايىم ايتىس كورسەتىپ, كورەرمەنگە ەرەكشە رۋحاني كەش سىيلادى. ونەرسۇيەر قاۋىمنىڭ كوڭىلىنەن شىققان تارتىستى دودانىڭ ناتيجەسىندە قازاقستاننىڭ حالىق اقىنى ءاسيا بەركەنوۆا باستاعان قازىلار القاسىنىڭ شەشىمىمەن رەسپۋبليكالىق كوماندالىق ايتىستىڭ ەكىنشى كەزەڭىنە تۇركىستان وبلىسىنىڭ كومانداسى جولداما الىپ, جەڭىمپاز اتاندى. قوس كومانداعا بىردەي قۇرمەت كورسەتىلىپ, ءاربىر اقىنعا 500 مىڭ تەڭگەدەن سىياقى بەرىلدى. ال جىرشى, تەرمەشى, ءداستۇرلى ءانشى, كۇيشىلەرگە 250 مىڭ تەڭگەدەن تابىستالدى. سونداي-اق «Amanat» پارتياسىنىڭ ارنايى سىيلىعى بەرىلدى.
ايتا كەتەلىك, بايقاۋدىڭ تالاپتارى مەن شارتتارىنا سايكەس, ءبىرىنشى كەزەڭگە 20 كوماندا قاتىسىپ, ەكىنشى كەزەڭگە 10 كوماندا وتەدى. وسى 10 كوماندانىڭ ىشىنەن بالدىق جۇيە بويىنشا ءۇشىنشى كەزەڭگە 4 كوماندا جولداما الادى. جەڭگەن 2 كوماندا 2025 جىلى استانا قالاسىندا وتەتىن اقتىق سايىسقا قاتىسادى.
تۇركىستان
