سۋرەتتى تۇسىرگەن – التىنبەك قارتاباي
وتباسىلىق قۇندىلىق, ۇرپاق تاربيەسى, ۇلتتىق تانىم مەن ءداستۇر ماسەلەلەرى اڭگىمەگە ارقاۋ بولعان ءىس-شاراعا وتاسقاندارىنا 50 جىلدان اسقان ارداگەر جۋرناليست جاڭاباي ميلليونوۆ پەن جارى كۇلباعيرا جاقسىباەۆا, قالامگەر, شاڭىراق قۇرعاندارىنا 40 جىلدان اسقان باۋىرجان مومىش ۇلىنىڭ نەمەرە ءىنىسى بەكەت مومىنقۇل مەن زايىبى ايگۇل سارسەنبايقىزى, 25 جىل بويى ءبىر شاڭىراق استىندا تاتۋ-ءتاتتى عۇمىر كەشىپ كەلە جاتقان كومپوزيتور, كەنەن ازىرباەۆ اتىنداعى وبلىستىق فيلارمونيا ديرەكتورىنىڭ ورىنباسارى جاندوس وماروۆ پەن جارى لاۋرا سەيىتاليەۆا قاتىسىپ, جاس وتباسىلار تاراپىنان قويىلعان سان الۋان ساۋالدارعا شىنايى جاۋاپ بەردى.
«ادام بالاسى ءبىرىنشى كەزەكتە جار تاڭداۋ مەن ماماندىق تاڭداۋدا قاتەلەسپەۋى كەرەك. مۇنى ەر-ازاماتتار كوكەيگە توقىعانى ءلازىم. وسى تۇرعىدان كەلگەندە مەن – وتە باقىتتى جانداردىڭ ءبىرىمىن. كۇلباعيرا ەكەۋمىز جارتى عاسىردان اسا ۋاقىت بويى ءبىر-ءبىرىمىزدى ءتۇسىنىپ, تاتۋ-ءتاتتى عۇمىر كەشىپ جاتىرمىز. شىعارماشىلىق ادامىنا ءوزىن جان-جاقتى تۇسىنەتىن, باعالايتىن جار جولىقسا, ودان اسقان قانداي باقىت كەرەك؟ سول ءۇشىن دە جاراتقانعا شۇكىر دەيمىن. ەر-ازامات ءبىرىنشى كەزەكتە ايەل ادامدى قۇرمەتتەۋى كەرەك», دەدى ج.ميلليونوۆ جاس وتباسىلاردىڭ ءبىرى قويعان ساۋالعا جاۋاپ بەرىپ.
ارداگەر جۋرناليست, جازۋشىلار وداعىنىڭ مۇشەسى بەكەت مومىنقۇلدىڭ ايتۋىنشا, بالا اكەسىنە قاراپ بوي تۇزەيدى, اكەنىڭ تالىمىنەن اسقان تاربيە جوق. ۋاقىتىندا ءوزى دە اسقار تاۋىنىڭ ءجۇرىس-تۇرىسىنا قاراپ, ەلىكتەپ ءوسىپتى.
ء«بىز ورىس ۇلتى كوپ شوعىرلانعان اۋىلدا تۇردىق. قاتارلاس جىگىتتەر مەكتەپتە ءجۇرىپ-اق شىلىم شەگۋدى ادەتكە اينالدىرعان ەدى. ورتانىڭ دا ءوز اسەرى بار عوي. ءبىر كۇنى مەن دە بيليارد ويناپ ءجۇرىپ, شىلىم تارتىپ تۇرعانمىن. اكەم كىرىپ كەلگەندە الگى تەمەكىنى مىجىپ تاستاپ, اۋزىمدى جاۋىپ تۇرعانىممەن, مۇرنىمنان ءتۇتىن بۇرقىراپ كەتتى. مۇنى كورگەن اكەم ەش ۇرىسقان جوق. ك ۇلىپ شىعىپ كەتتى. وسى ارەكەتىنەن-اق مەنىكى قاتە ەكەنىن ءتۇسىندىم. ويتكەنى ءبىزدىڭ وتباسىمىزدا ەشكىم شىلىم شەكپەيتىن. اسقار تاۋىمنىڭ ايقايعا باسپاي, ك ۇلىپ شىعىپ كەتۋىنىڭ ءوزى ماعان قاتەمدى ۇقتىردى. جامان ادەتتەن باس تارتتىم», دەدى ب.مومىنقۇل ءوز ويىمەن ءبولىسىپ.
ءىس-شارا بارىسىندا ءسوز العان كەنەن ازىرباەۆ اتىنداعى وبلىستىق فيلارمونيا ديرەكتورىنىڭ ورىنباسارى جاندوس وماروۆ تا وتباسى قۇندىلىقتارى, ۇرپاق تاربيەسى تۋرالى ءوز ويلارىن ورتاعا سالىپ, جاس وتباسىلارعا اقىل-كەڭەسىن ايتتى.
بۇل كۇنى جاڭادان وتاۋ قۇرعان نىعمەتوۆتەر وتباسىنىڭ نەكە قيۋ ءراسىمى ۇيىمداستىرىلدى. تاراز قالالىق احات ءبولىمىنىڭ باس مامانى جانسايا دۇيسەكوۆا كوپشىلىكتىڭ الدىندا جاس وتباسىنىڭ نەكەسىن قيدى. ۇلكەندەردىڭ اتىنان ءسوز العان اقساقال ساۋرانبەك جامالبەكوۆ ىزگى تىلەگىن ايتىپ, اق باتاسىن بەردى.
ءىس-شارا سوڭىندا ءسوز العان تاراز قالالىق ءماسليحاتىنىڭ توراعاسى كەنجەبەك ولجاباي مەن «اناعا تاعزىم» ورتالىعىنىڭ ديرەكتورى ەلميرا مىرزاعالي وتباسىلىق قۇندىلىقتار حاقىندا ىلكىمدى ويلارىن ورتاعا سالعان مەيماندارعا ريزاشىلىعىن جەتكىزدى. ادەمى اندەرمەن ادىپتەلگەن ءىس-شاراعا ارنايى قاتىسقان قوناقتارعا باعالى سىيلىقتار تابىستالدى.
تاراز
