فوتو: اقوردا
«تۇرمىستىق زورلىق-زومبىلىق, بۋللينگ پەن اگرەسسيا دا قازىرگى ۋاقىتتاعى قاتەرلى ءۇردىس. اشىعىن ايتساق, قوعامدا قاتىگەزدىك كۇشەيىپ بارادى. بىرەۋگە ءتىل تيگىزىپ, ار-نامىسىن تاپتاپ, ءتىپتى, ۇرىپ-سوعۋعا دايىن تۇراتىندار از ەمەس. جەدەل جاردەم جانە قوعامدىق كولىك جۇرگىزۋشىلەرىنە شابۋىل جاسالعانىن بىلەسىزدەر. ادامعا الىمجەتتىك كورسەتۋ, قورلاۋ دۇرىس ەمەس. مۇنداي تەرىس ارەكەتتەرگە كوز جۇما قاراۋعا بولمايدى. «اۋرۋىن جاسىرعان ولەدى». سوندىقتان ءبىز وسى قوعامدىق دەرتتى جاسىرماي, اشىق ايتۋىمىز كەرەك. ازاماتتار ۇيدە دە, تۇزدە دە ءوزىن قاۋىپسىز سەزىنۋگە ءتيىس. زاڭ مەن ءتارتىپ قاتاڭ ساقتالۋعا ءتيىس, ياعني قوعامدا زاڭ ۇستەمدىگى بولۋى قاجەت», دەدى مەملەكەت باسشىسى.
بۇدان سوڭ ول تاعى ءبىر كەسەل − ۆانداليزم تۋرالى ايتتى. ونىڭ ايتۋىنشا, قوعامدىق م ۇلىكتەن باستاپ, مىڭجىلدىق مادەني مۇرالارعا دەيىن – ءبارىن جاپپاي ءبۇلدىرۋ كەيىنگى كەزدە ادەتكە اينالعان.
«بۋرابايداعى جۇمباقتاستى, باياناۋىلداعى كەمپىرتاستى قاراڭىزدار. ەڭ جاۋھار جەرلەرىمىزدىڭ سۇلۋلىعى شيمايدىڭ استىندا قالىپ جاتىر. ۇيدەگى ءليفتىنى, اۋلاداعى ويىن الاڭىن, كوشەدەگى ايالدامانى قيراتۋدىڭ قانداي قيسىنى بار؟! مۇنىڭ ءبارى – بارىپ تۇرعان تارتىپسىزدىك, مادەنيەتسىزدىك. وركەنيەتتى ەلدىڭ ءاربىر ازاماتى قوعام مۇلكىن ءوز مۇلكىندەي قورعاۋى كەرەك. دۇنيە جۇزىندە, ناقتى ايتقاندا, جاپونيادا, وڭتۇستىك كورەيادا, قىتايدا, سينگاپۋردا جاعىمدى مىسالدار كوپ, وسى ەلدەر كوپكە ۇلگى بولىپ وتىر. ال ءبىز نەگە ولاردان كەم بولۋىمىز كەرەك؟», دەدى پرەزيدەنت.
