بۇرىن بالالار جەر كەپكەن بويى اسىعىن مايلاپ, ساقاسىن سايلاپ, اۋىل شەتىندەگى الاڭقايدا اسىق ويىنىن قىزدىراتىن بولسا, بۇگىندە مۇنىڭ ءبىرى دە جوق. قازىرگى اۋىل بالاسى اسىققا اسا قىزىقپايدى. قورعاسىن قۇيىپ, ساقا جاساۋدى بىلمەيتىن ۇرپاق ءوستى. اتا-اجەلەر دە نەمەرەلەرىنە اسىق جينامايدى. ء«بىزدىڭ اقتاستى وتە شاعىن اۋىل. اۋىلداعى جالعىز مەكتەپتەگى وقۋشى سانى كوپ ەمەس. جاسىراتىنى جوق, قازىرگى كەزدە كوپتەگەن مەكتەپ وقۋشىسىنىڭ ساباققا زەيىنى تومەن, ەستە ساقتاۋ قابىلەتى ناشار, كوپ ويلانعىسى كەلمەيدى. وقۋعا قۇشارلىقتىڭ تومەندەۋى وتپەلى كەزەڭدەگى جەتكىنشەكتەر بويىنان كوپ بايقالادى. بۇل بالانىڭ تۇلعالىق قالىپتاسۋى مەن بويىنداعى قابىلەتىن باعدارلايتىن كەزىندە زيان ءارى بولاشاق ماماندىعىن تاڭداۋعا دا كەسىرىن تيگىزەدى. مەكتەپ پسيحولوگى رەتىندە وسى ماسەلە مەنى كوپ ويلاندىرىپ, بالا بويىنداعى ەنجارلىقتى اسىق ويىندارىنا قىزىقتىرۋ ارقىلى جويۋعا بولادى دەگەن ويمەن ۇيىرمە ۇيىمداستىردىم. ازىرشە وقۋشىلار وعان ساباقتان تىس ۋاقىتتا كەلىپ قاتىسادى. ەكىنشى جاعىنان, ورتا جانە جوعارى سىنىپ وقۋشىلارى ءۇشىن 5-10 مينۋتتىق ۇزىلىستە اسىق ويناتىپ, سەرگىتۋ ساباقتارىن وتكىزەمىن», دەيدى گۇلناز تاڭىربەرگەنقىزى.
الداعى ۋاقىتتا «اسىق تەراپياسى» باعدارلاماسىن كەڭەيتىپ, ەلەكتيۆتى كۋرس رەتىندە جۇرگىزگىسى كەلەدى. ەلەكتيۆتى وقىتۋ جۇيەسى بىرنەشە ءپاندى قاتار جۇرگىزۋ ارقىلى وقۋشىنىڭ ينتەللەكتۋالدىق, فيزيكالىق جانە شىعارماشىلىق قابىلەتتەرىن دامىتۋعا باعىتتالعان. بۇل جەردە اسىق ويىنى ارقىلى وقۋشىنىڭ قابىلەتىن اشىپ, بىرنەشە ءپان بويىنشا ساباق ۇلگەرىمىن بىردەن جاقسارتۋعا كومەكتەسۋ جوسپارى تۇر. قازىرگى كەزدە زامانۋي ءبىلىم – سينتەزدەلگەن ءبىلىم. وعان بالانىڭ وي ۇشقىرلىعى, سىني ويلاۋ قابىلەتىن جەتىلدىرۋ ارقىلى قول جەتكىزۋگە بولادى. ۇيىرمەدە اسىقتاردى پايدالانۋ ارقىلى ءتۇرلى لوگيكالىق ويىندار ۇيىمداستىرىپ, كوپتەگەن كورنەكىلىك قۇرال جاسايدى. ول ءۇشىن كوپ اسىق كەرەك. سول ءۇشىن اۋىل ۇيلەرىن ارالاپ اسىق جينايدى. «مەنى ورتاسىنا قورعاسىن قۇيىپ, قىرلاعان, تابيعي قىنامەن بويالعان كونە اسىقتار قىزىقتىردى. الايدا اۋىلدا اسىق از ەكەن», دەيدى ول.
جاس ۇستاز ۇلتتىق ويىن مەكتەپ جاسىنا دەيىنگى بالالاردىڭ ويلاۋ قابىلەتىن, قولىنىڭ قيمىل ەپتىلىگىن جاقسى دامىتادى دەيدى. اسىق اتا بىلگەن ءبۇلدىرشىننىڭ كوزى قىراعى, قولى يكەمدى, قيمىلى شاپشاڭ بولادى, تۇستەردى اجىراتا بىلەدى. ءتول مادەنيەتىمىزدىڭ ءبىر بولشەگى, مىڭجىلدىقتان بەرى اتا-بابامىزبەن ىلەسىپ كەلە جاتقان اسىق ويىندارىنىڭ «حان تالاپاي», بەس اسىق, ومپى, تايكە, الشى, قاقپاقىل سياقتى كەڭىنەن تانىمال ءتۇرى بار.
اسىقتى وقۋ ماتەريالى رەتىندە دە پايدالانۋدىڭ جولى كوپ. اسىرەسە سەرگىتۋ ويىندارى جەتكىنشەكتى مەيلىنشە ءدال جانە جىلدام اتۋعا عانا ەمەس, ءىس-ارەكەت جاسار الدىندا ويلانۋعا باۋليدى. بىلايشا ايتقاندا, بالانى ويلانىپ بارىپ, ارەكەت ەت دەگەن قاعيداعا ۇيرەتەدى. گۇلناز ءتۇرلى-ءتۇستى اسىقتاردىڭ بالانىڭ جۇيكە جۇيەسىن تىنىشتاندىرۋعا كومەگى مول دەيدى.
اقتوبەدەگى قالا مەكتەپتەرىندە جۇمىس جاساپ, وتباسى جاعدايىمەن ايتەكە بي اۋدانىنىڭ اقتاستى مەكتەبىنە كەلىپ, پسيحولوگ جانە اعىلشىن ءتىلى مۇعالىمى بولىپ جۇمىس ىستەپ جاتقان گۇلناز تۇراروۆانىڭ جوسپارى كوپ. شاعىن جيناقتى مەكتەپتە اسىق تەراپياسىن مەكتەپ جاسىنا دەيىنگى دايارلىق توبىنا دا, باستاۋىشتان باستاپ جوعارى سىنىپ وقۋشىلارىنا جەكە, توپتىق تاپسىرمالار وتكىزگەندە كەڭىنەن پايدالانىپ ءار بالانى جەكە تۇلعا دەپ قارايتىن جاس ۇستاز اسىقتان كورنەكىلىكتى وقۋشىلارمەن بىرلەسە جاسايدى. بۇل جەردە بالانىڭ قيالى كومەككە كەلەدى. سەرگىتۋ ساتتەرىندە قىز بالالارعا بەس اسىق, ەر بالالارعا حان تالاپاي, ومپى ويناتادى. اقتاستى مەكتەبىنىڭ مۇعالىمدەرى دە گۇلنازدىڭ دارىستەرىنە قىزىعۋشىلىقپەن قارايدى.
اقتوبە وبلىسى
