قىلىشىنان قان تامعان كەڭەستىك كەزەڭدە وبلىستىق گازەتتى 20 جىل بويى باسقارعان قالامگەردىڭ قايراتكەرلىگى تۋرالى كونەكوز زامانداستارى ەستى ەستەلىكتەرىن ايتۋدان جالىققان ەمەس. بىرنەشە بۋىن ءتىلشىنى تاربيەلەگەن باتتال جاڭاباي ۇلىنىڭ تاباندىلىعىنىڭ ارقاسىندا قازىرگى كەزدە شەرحان مۇرتازانىڭ اتىمەن اتالاتىن ءباسپاسوز ءۇيى جۋرناليستەرگە بۇيىرىپتى. بۇدان وزگە دە ءىرى ىستەرى از ەمەس.
بايسالدى قالپىنان تانباعان, كىسىلىك كەلبەتىن جوعالتپاعان اقساقال تۇرعان ۇيگە جەرگىلىكتى بيلىك ەسكەرتكىش تاقتا ورناتتى. وبلىس باسشىسى ەربول قاراشوكەەۆ پەن تاراز قالاسىنىڭ اكىمى باقىتجان ورىنبەكوۆتىڭ ايتۋىنشا, قالامگەردىڭ 95 جىلدىعىنا ارنالعان ءىرى ءىس-شارالار الداعى ۋاقىتتا رەتىمەن ۇيىمداستىرىلادى.
جامبىل وبلىسىنىڭ قۇرمەتتى ازاماتى, قازاقستاننىڭ ەڭبەك سىڭىرگەن مادەنيەت قايراتكەرى باتتال جاڭاباي ۇلى تۇرعان ۇيگە ورناتىلعان مەموريالدىق تاقتانىڭ اشىلۋ سالتاناتىنا قاتىسقان ءوڭىر باسشىسى ەربول قاراشوكەەۆ ءسوز سويلەپ, قالامگەر رۋحىنا قۇرمەت كورسەتتى.
ء«باسپاسوزدىڭ ءرولى قوعام ءۇشىن قاي كەزدە دە زور. اسىرەسە 100 جىلدان استام تاريحى بار وبلىستىق «اق جول»گازەتىنىڭ ورنى بولەك. قالامگەر اعامىز ءوڭىر شەجىرەسىن تاسقا تاڭبالاعان وسى باسىلىمدى 20 جىل بويى جەمىستى باسقارعانى بەلگىلى.
قازاق حالقى «جاقسىنىڭ اتى, عالىمنىڭ حاتى ولمەيدى» دەگەندى تەككە ايتپاعان. ءوڭىر رۋحانياتىنىڭ وركەندەۋىنە سۇبەلى ۇلەس قوسقان ارداگەر ءجۋرناليستىڭ ءجۇرىپ وتكەن جولى كەيىنگى بۋىن جاستار ءۇشىن تاۋسىلماس ونەگە دەسەك تە بولادى. جاستار ول كىسىنىڭ ەسىمىن ەشقاشان ۇمىتپايدى. ءبىزدىڭ موينىمىزعا ارتىلعان مىندەت – ەرەن ەڭبەكتىڭ ۇلگىسىن كورسەتكەن باتتال اعانىڭ ءومىر جولى مەن ەڭبەگىن ەل اراسىندا ناسيحاتتاۋ, وسكەلەڭ ۇرپاقتى ەڭبەكسۇيگىشتىككە باۋلۋ», دەدى ەربول قاراشوكەەۆ.
ءىس-شارا بارىسىندا ءسوز العان جازۋشى-دراماتۋرگ ەلەن ءالىمجان, جۋرناليستەر وداعى وبلىستىق فيليالىنىڭ توراعاسى جاڭاباي ميلليونوۆ, ارداگەر جۋرناليست, جازۋشى كوسەمالى ءساتتىباي ۇلى اياۋلى اعا تۋرالى جىلى ەستەلىكتەرىمەن ءبولىستى.
تاراز
