«امال – ۇلتىمىزدى ۇيىستىراتىن, حالقىمىزدىڭ بەرەكەسىن ەسەلەپ, مەرەيىن وسىرەتىن ىزگى مەرەكە. قازىرگى تاڭدا بۇل كۇن تۇتاس ەلىمىز ءۇشىن ورتاق مەيرامعا اينالدى دەسەك, ارتىق بولا قويماس. دۇرىس قۇندىلىقتاردى دارىپتەيتىن وسىنداي مەرەكەدە ەلىمىزدىڭ بىرەگەيلىگى ايقىندالىپ, بىرلىگى بەكەمدەلە تۇسەدى.
پرەزيدەنتىمىز قاسىم-جومارت كەمەل ۇلى توقاەۆ ناۋرىز مەيرامىن جاڭا فورماتتا اتاپ ءوتۋدى ۇسىنعان بولاتىن. وسىعان بايلانىستى تىڭ باستامالار قولعا الىنىپ جاتقانى بەلگىلى. مۇنداي قادام تاريحي سانامىزدى جاڭعىرتىپ, ۇلتتىق رۋحىمىزدى ودان ءارى شىڭداۋ ءۇشىن قاجەت.
سونداي-اق بۇل يگى ءداستۇر قوعامدا ءوزارا قۇرمەتتىڭ, باۋىرمالدىلىقتىڭ جانە مەيىرىمدىلىك پەن جاناشىرلىقتىڭ ماڭىزىن ارتتىرادى. بارشاڭىزدى كوكتەمنىڭ وسى مەرەكەسىمەن قۇتتىقتاي وتىرىپ, ەلىمىزگە اماندىق, جەرىمىزگە تىنىشتىق جانە ءار شاڭىراققا باق-بەرەكە تىلەيمىن! امالدان امالعا امان-ەسەن جەتە بەرەيىك!» دەلىنگەن جازبادا.
