باۋىرجان بيگەلدينوۆ 2006 جىلى اكەسى ويراتپەن بىرگە كوكشەتاۋدان استاناعا جۇمىس ىستەۋگە كەلگەن. ول كەز قازىرگىدەي ويىن-ساۋىق, ساۋدا ورىندارى كوپ ەمەس, سمارتفون اتىمەن جوق. قىزمەت كورسەتۋ سالاسى جەتىلمەگەن. سول جىلى تەحنيكادان حابارى بار ويراتقا بىردەن جۇمىس تابىلسا, 21 جاسقا كەشە تولعان باۋىرجان قول قۋسىرىپ وتىرماي, تازالىققا جاۋاپتى مەكەمەگە جۇمىسقا ورنالاسقان. سونداعى كوزدەگەنى مەكەمەدە بىرەر جىل ۋاقىتشا جۇمىس ىستەپ, اياققا تۇرىپ العان سوڭ, باسقا سالاعا اۋىسۋ ەدى. باۋىرجان جۇمىسقا بىردەن كىرىسىپ, جول بويىنداعى سۇرىلگەن-ب ۇلىنگەن اسفالت, بورديۋرلاردى جاماپ-جاسقاپ, قىستىگۇنى قار تازالايتىن توپپەن بىرگە ەڭبەك ەتكەن. تەك 2008 جىلى مەكەمەنىڭ اتاۋى «استانا تازالىق» سەرىكتەستىگى بولىپ وزگەرگەن سوڭ, اسفالت, بورديۋردىڭ شارۋاسى باسقا كومپانياعا جۇكتەلگەن.
– انە-مىنە دەگەنشە جۇمىستا ءبىراز شيراپ, ىسىلعان سوڭ, 2008 جىلى باسشىلىق مەحانيكالىق تازالاۋ توبىنا بريگادير بولۋدى ۇسىندى. بىرەر جىل وسىندا جۇمىس ىستەپ, كەيىن باسقا سالاعا اۋىسام دەگەن ويىمنان اينىدىم. كەيىن اۆتوگرەيدەردە شەبەر بولدىم. ۋچاسكە باستىعى, قولمەن جيناۋ جونىندەگى شەبەر قىزمەتىن دە اتقاردىم. سودان 2017 جىلى الماتى اۋدانىنان ەسىل اۋدانىنا جۇمىس اۋىستىرىپ, قولمەن جيناۋ جونىندەگى شەبەر اتاندىم. 2019 جىلى باس ديرەكتور شاقىرتىپ, ماعان ەسىل اۋدانىنىڭ ۋچاسكە باسشىسى بولۋدى ۇسىندى. ۋچاسكە باسشىسىنىڭ جۇمىسىنان حابارىم بولعان سوڭ, بىردەن كەلىسە كەتتىم. قازىر وزىمىزگە جۇكتەلگەن تاپسىرمانى كۇندەلىكتى ادال, لايىقتى ورىنداۋعا بارىنشا تىرىسىپ جۇرگەن جايىمىز بار. ءبىزدىڭ ۋچاسكەدە 10 شەبەر, 13 بريگادير, 250-گە شامالاس جۇمىسشى ەڭبەك ەتەدى. ەسىلدىڭ سول جاعالاۋى بولعان سوڭ جۇمىس قاۋىرت. تاڭەرتەڭ 6.00-دە جۇمىستى باستاپ, كەشكى 17.00-گە دەيىن بايىز تاپپايمىز, – دەيدى ب.بيگەلدينوۆ.
باۋىرجان كوكشەتاۋدا زاڭگەر ماماندىعى بويىنشا اۋەلى كوللەدجدە وقىپ, كەيىن جوعارى وقۋ ورنىندا سىرتتاي ءبىلىم العان. «استانا تازالىق» سەرىكتەستىگىندە وسىعان دەيىن اكەسى مەن ءىنىسى جۇمىس ىستەسە, قازىر اناسى وسىندا جول جۇمىسشىسى بولىپ ەڭبەك ەتىپ ءجۇر. ءبىر سوزبەن ايتقاندا, بىرلىگى جاراسقان وتباسى مۇشەلەرىنە تازالىققا جاۋاپتى مەكەمەنىڭ تىنىس-تىرشىلىگى تاڭسىق ەمەس.
سونداي-اق مەكەمەدە 10-15 جىلداي جۇمىس ىستەپ, زەينەتكە شىعىپ جاتقاندار دا كوپ ەكەن. جاستار جاعى بولسا, قىستا تازالىققا جاۋاپتى مەكەمەگە ۋاقىتشا جۇمىسقا كەلىپ, كوكتەم شىعا وزدەرىنىڭ ماۋسىمدىق جۇمىستارىنا اتتانادى ەكەن. جۇمىسشىلاردىڭ كوبى استاناعا ىرگەلەس جانە قاشىق اۋىلداردان كەلەدى. ولارعا مەكەمە ارنايى مارشرۋت بەكىتكەن. سول سەبەپتى دە كەيبىر قاشىق اۋىلدان قاتىنايتىن جۇمىسشىلار كەيدە تۇنگى 2.00-دەن باستاپ جۇمىسقا قامدانا باستايتىن كورىنەدى.
– قازىر بىزدەگى تەحنيكالاردىڭ كوبى – جاڭا. جىل سايىن اۋىستىرىپ, تولىقتىرىپ وتىرادى. بيىل جۇمىسشىلاردىڭ جالاقىسى 20 پايىزعا كوتەرىلگەنى ابىروي بولدى. ءيا, جۇمىسقا جاستار كوپ كەلە بەرمەيدى. ونىڭ ۇستىنە ءبىزدىڭ ۋچاسكەدەگى جۇمىسشىلاردىڭ شامامەن 60 پايىزى – ايەلدەر. جىلدار بويى ەڭبەك ەتىپ, بريگادير, شەبەر بولعان كەلىنشەكتەر بار. جاقىن اۋىل بولسا مەيلى, قاراعاندى وبلىسىنا قاراستى اۋىلدان كەلەتىندەر كوپ. ولاردى تاسىمالدايتىن كولىكتەر بەكىتىلگەن. جۇمىسشىلار تۇسكى اسپەن قامتىلعان. قازىر باسشىلىق قىزمەتكە اۋىسقان ازاماتتاردىڭ بارلىعى دەرلىك بۇرىننان وسى مەكەمەدە جۇمىس ىستەپ, ەڭبەگى سىڭگەن ازاماتتار دەپ ايتار ەدىم. جۇمىس وڭاي ەمەس. ءوزىم ۋچاسكەدە جول جۇمىسىنا, قولمەن جينايتىن توپقا جاۋاپ بەرەمىن. جۇمىسشىلارعا, تەحنيكالارعا جاۋاپتىمىز. مىسالى, بۇگىن 5.30-دا بارلىعىمىز جينالدىق. مەن دە ەرتەرەك ويانىپ, اۋەلى تۇنگى اۋىسىمدا تازالاعان كوشەلەردى شارلاپ شىقتىم. سوسىن تاعى كۇن ءتارتىبىن بەكىتىپ, شەبەرلەرمەن كەزدەسىپ, تاپسىرمانى ناقتىلادىق. كۇندە – وسى تىرشىلىك. جازدىگۇنى ويىن-ساۋىق ساۋدا ورتالىقتارىنىڭ ماڭىندا قوقىس كوبەيەدى. ونى ءبىزدىڭ جۇمىسشىلار ۋاقتىلى جيناپ الادى. قالانىڭ ءوزى تازا بولعان سوڭ, تۇرعىنداردىڭ دا كوشەنى لاستاماۋعا تىرىساتىنىن بايقايمىز. ءبىرلى-ەكىلى جاعدايلار بولماسا, قالا تۇرعىندارى تازالىققا جاقىن. جۇمىسشىلار كۇندەلىكتى ءوزىنىڭ جۇمىسىن اتقارا بەرەدى عوي. ايتكەنمەن «تازالىق – تازالانعان جەردە ەمەس, تازالىق ساقتاعان جەردە بولادى» دەگەن. سوندىقتان ءبىز دە قالا تۇرعىندارىن تازالىق ساقتاۋعا شاقىرۋدان جالىقپايمىز, – دەيدى ۋچاسكە باسشىسى ب.بيگەلدينوۆ.
وتباسىندا بەس بالا تاربيەلەپ وتىرعان باۋىرجان بىرنەشە جىل بۇرىن مەملەكەتتىك باعدارلاما شەڭبەرىندە ءۇيلى بولىپتى. قالا تازالىعىنا كۇن-ءتۇن دەمەي, اسقان جاۋاپكەرشىلىكپەن كىرىسىپ جۇرگەن انا مەن ۇلدىڭ جۇمىسى تابىستى بولسىن دەستىك.
