فورۋمعا ەلدىڭ بارلىق وڭىرىنەن 500-دەن اسا قوناق جيىلدى. ولاردىڭ قاتارىندا ساياسي جانە قوعام قايراتكەرلەرى, كاسىپكەر, ءبىلىم جانە عىلىم سالاسىنىڭ قىزمەتكەرلەرى, كوپبالالى انالار بولدى. باسقوسۋدا ازاماتتىق سەكتور مەن حالىقارالىق ۇيىم وكىلدەرى وتباسىلىق-دەموگرافيالىق ساياسات جونىندە, ايەلدەردىڭ قوعامداعى ءرولى تۋراسىندا ماڭىزدى ماسەلەلەردى تالقىلادى. بۇل قاتاردا وتباسىلاردى الەۋمەتتىك جانە ەكونوميكالىق قولداۋ, بالا قۇقىعى جانە ايەل تەڭدىگىنە قاتىستى دا ۇسىنىس-پىكىرلەر ايتىلدى.
فورۋمنىڭ اشىلۋ سالتاناتىندا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى, مادەنيەت جانە اقپارات ءمينيسترى ايدا بالاەۆا كوميسسيانىڭ اتقارعان جۇمىستارىنا از-كەم توقتالىپ, ايەلدەرگە العىس ايتتى.
– فورۋمعا ەلىمىزدەگى وتباسى, گەندەرلىك, دەموگرافيالىق ساياساتقا تىكەلەي قاتىسى بار قىز-كەلىنشەكتەردى شاقىردىق. ونىڭ ىشىندە كوميسسيا قۇرىلعالى بەرى ۇلتتىق جانە وڭىرلىك كوميسسيانىڭ توراعاسى بولعان ازاماتتارمەن جۇزدەسكەنىمىزگە قۋانىشتىمىز. كوميسسيا توراعاسى رەتىندە سان سالانى دامىتۋعا, ەلدىڭ وركەندەۋىنە ءىس جۇزىندە قولداۋ كورسەتىپ جۇرگەن قىز-كەلىنشەكتەرگە ريزامىز. سونداي-اق وتباسى قۇندىلىعى, بالا قۇقىعىن قورعاۋ, ايەل قۇقىعى, تەڭدىگىنە تىكەلەي قاتىستى ءبىرشاما تولىمدى ءىس تىندىرعاندارعا العىس ايتقىم كەلەدى, – دەدى ا.بالاەۆا.
وسىدان سوڭ استانا قالاسى اكىمىنىڭ ورىنباسارى ەسەت بايكەن ايەلدەردى قولداۋ باعىتىندا ىسكە اسقان جۇمىستاردىڭ رەتىن باياندادى.
– بۇگىندە استانا تۇرعىندارى 1 ملن 400 مىڭنان استى. ستاتيستيكا بويىنشا حالىقتىڭ جارتىسىنان كوبى – ايەلدەر. ەلوردانىڭ قىز-كەلىنشەكتەرى ءتۇرلى سالادا تاباندى ەڭبەك ەتىپ, قالانىڭ الەۋمەتتىك-ەكونوميكالىق, قوعامدىق-ساياسي ومىرىنە بەلسەندى ارالاسادى. 90 مىڭعا شامالاس شاعىن جانە ورتا بيزنەستى قىز-كەلىنشەكتەر باسقارادى. مەملەكەتتىك قىزمەت سالاسىندا ەڭبەك ەتەتىن ايەلدەردىڭ دە ۇلەسى ارتىپ كەلەدى. 30 مىڭنان اسا كوپبالالى وتباسىلار نازارىمىزدان تىس قالمادى. سونىمەن قاتار قالا اكىمدىگى ادامي كاپيتالدى دامىتۋعا جانە ايەلدەردى الەۋمەتتىك قولداۋعا ايەلدەر ىستەرى جانە وتباسىلىق-دەموگرافيالىق ساياسات جونىندەگى قالالىق كوميسسيا ارقىلى دا ەرەكشە كوڭىل بولەدى. مىسالى, كوميسسيا بىلتىر 50-گە جۋىق ءىس-شارا وتكىزدى. قيىن جاعدايعا تاپ بولعان جۇزدەگەن وتباسىعا قولداۋ كورسەتتى. ايەلدەر كاسىپكەرلىگىن دامىتۋ باعىتىندا دا ىسكە اسىپ جاتقان جۇمىستار كوپ, – دەپ تۇيىندەدى ە.بايكەن.
ءبىرى بىلسە, ءبىرى بىلمەس, 25 جىلدا ۇلتتىق كوميسسيا وتباسىلىق جانە گەندەرلىك ساياساتتاعى وزەكتى ماسەلەلەر بويىنشا شارۋالاردى ءتاپ-ءتاۋىر ۇيلەستىرگەن. كوميسسيا مەن سەرىكتەستەردىڭ ارقاسىندا ايەلدەر, وتباسى جانە بالالار قۇقىعىن قورعاۋعا باعىتتالعان جۇزدەگەن تابىستى جوبا مەن باستاما ىسكە اسقان. ءارى كوميسسيا سالاعا قاتىستى ماڭىزدى شەشىم شىعارۋمەن شەكتەلمەي, ونى ورىندايتىن بىرەگەي ورگانعا اينالىپ ۇلگەرگەن. بۇل تۋرالى «Amanat» پارتياسىنىڭ حاتشىسى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى شولپان كارينوۆا, بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري جانە باسقا دا سپيكەرلەر ايتتى. كوميسسيانىڭ جۇمىسىن ماداقتاپ, بەلسەندى ايەلدەرگە تابىس تىلەدى.
بۇدان كەيىن فورۋم TEDX فورماتىندا جالعاسىپ, ەلدىڭ الەۋمەتتىك-ەكونوميكالىق, قوعامدىق-ساياسي ومىرىنە تاۋداي ۇلەس قوسىپ جۇرگەن بەلسەندى, تانىمال ايەلدەر سىر ءبولىستى. ولار اڭگىمەسىن جەتىستىككە جەتۋ جولىنداعى قيىن دا قىزىقتى ساتتەردەن باستاپ, قازاق ايەلدەرىنىڭ اسىل قاسيەتى جونىندە مازمۇندى ويمەن تۇيىندەپ جاتتى. ىزىنشە كوميسسيا مۇشەلەرى قوناقتاردى ايەلدەر قۇقىقتارى مەن وتباسىلىق قۇندىلىقتاردى قورعاۋ سالاسىندا ىنتىماقتاستىقتى نىعايتىپ, بىرلەسىپ جۇمىس ىستەۋگە شاقىردى.
