فوتو: tengrinews.kz
كيبەرسپورت – جەكەلەي نەمەسە كوماندامەن وينالاتىن ۆيرتۋالدى جارىس ءتۇرى. باسقا سپورت تۇرلەرى سەكىلدى مۇندا دا تۇراقتى جاتتىعۋ مىندەتتەلەدى. وعان قوسا سپورتشىلاردىڭ دەمەۋشىلەرى مەن ارنايى باپكەرلەرى دە جوق ەمەس. ال قارجىلىق تۇرعىدان ەسەپتەگەندە, كيبەرسپورت – فۋتبول مەن پوكەردەن كەيىن ەكىنشى ورىندا.
ويىن تاريحى كەيىنگى ون جىلدىقتان عانا باستالادى دەپ توپشىلاساڭىز, قاتەلەسەسىز. 1972 جىلدىڭ قازان ايىندا ستەنفورد ۋنيۆەرسيتەتى عالىمدارى اراسىندا «Space war», قازاقشالاساق «عارىشتىق عازاۋات» ويىنى بويىنشا العاشقى تۋرنير وتكىزىلدى. تۋرنيرگە بارلىعى 24 ويىنشى قاتىسىپ, جەڭىمپازعا «Rolling Stone» مادەني جۋرنالىنا ءبىر جىلدىق جازىلىم سىيعا تارتىلدى.
ۆيرتۋالدى ويىن الەمى كەڭ ءورىس الا باستاعانى سونشا, ەندىگى جەردە جەڭىمپازعا جۋرنال ەمەس, جۇلدەگە 300 مىڭ دوللار تابىستايتىن دەڭگەيگە جەتتى. العاشقى رەسمي تۋرنير 2001 جىلى كورەيا استاناسى سەۋلدە ءوتتى. ال بيىل 13-25 اقپان ارالىعىندا برازيليانىڭ سان-پاۋلۋ قالاسىندا «Six Invitational 2024» ءتۋرنيرى ءوتتى. وندا 20 كوماندا 3 ملن دوللار جۇلدە قورى ءۇشىن تالاسقا ءتۇستى.
قازاقستاندا كيبەرسپورت فەدەراتسياسى 2017 جىلى قۇرىلدى. وسى ۋاقىتقا دەيىن فەدەراتسياعا 8 مىڭ كوماندا تىركەلىپ ۇلگەرگەن. ال ەلىمىزدەگى جانكۇيەرلەر سانى 3,5 ميلليوننان اسىپ جىعىلادى. كيبەرسپورتسمەن ءارى فەدەراتسيا مەنەدجەرى ەرجان شاكەەۆتىڭ ايتۋىنشا, الدا اتقارىلاتىن جۇمىس كوپ.
«2020-2025 جىل ارالىعىنا نەگىزدەلگەن دامۋ ستراتەگيالىق جوسپارى بار. سوعان وراي زاڭنامالىق قۇجاتتاردى رەتكە كەل- تىرە وتىرىپ, وڭىرلەردەگى فيليال جۇمىستارىن ىسكە قوسۋ ويىمىزدا بار. حالىقارالىق نەمەسە رەسپۋبليكالىق تۋرنيرلەردە جەڭىسكە جەتكەن كيبەرسپورتشىلارعا اتاق جانە رازرياد ءتۇرىن بەلگىلەۋىمىز كەرەك. سونىمەن قاتار تورەشىلەردىڭ بىلىكتىلىگىن ارتتىرىپ, جاتتىقتىرۋشىلار شتابىن قۇرۋ – ءىسىمىزدى ىلگەرىلەتەتىن ماڭىزدى قادامداردىڭ ءبىرى», دەيدى ول.
جاقىندا عانا تاتارستاننىڭ قازان قالاسىندا «بولاشاقتىڭ ويىندارى» اتتى حالىقارالىق مۋلتيسپورت ءتۋرنيرى ءوتتى. «فيدجيتال-كونتسەپتسياعا» نەگىزدەلگەن ءتۋرنيردىڭ فورماتى فيزيكالىق بەلسەندىلىكتى, زاماناۋي تەحنولوگيا مەن تسيفرلىق ورتانى ۇشتاستىرادى. ءبىرىنشى بولىمدە جارىسقا شىنايى اتلەتتەر تۇسسە, ەكىنشى بولىمدە كيبەرسپورتشىلار ويىندى ەكران بەتىندە جالعاستىردى. جەڭىمپاز ورتاق ۇپاي سانى بويىنشا انىقتالدى.
ءتۋرنيردىڭ اشىلۋ سالتاناتىنا قاسىم-جومارت توقاەۆ تا قاتىسىپ, سپورتشىلارعا ساتتىلىك تىلەدى. ءسوزىنىڭ اياعىندا مەملەكەت باسشىسى ۆيرتۋالدى دودانىڭ كەلەسى كەزەڭىن قازاقستاندا وتكىزۋگە ىقىلاس ءبىلدىردى. ولاي بولاتىن بولسا, وتاندىق كيبەرسپورتشىلاردىڭ بابى كەلىسىپ-اق تۇر.
