نۇرتاس سولتان ۇلى Facebook جەلىسىندە اۋلەتىنىڭ ۇلكەن قايعىعا دۋشار بولعانىن جازعان.
«مەندە بار اقپارات بويىنشا, 2024 جىلدىڭ 2 ناۋرىزىندا شقو, مارقاكول اۋدانى, قالجىر اۋىلىندا مەنىڭ تۋعان اعام كوشەروۆ جاراس سولتان ۇلىن وسى اۋىل تۇرعىنى نۇرمۇحانوۆ باۋىرجان ماقسات ۇلى پىشاقتاپ ءولتىرىپ كەتتى. بۇل تۋرالى مارقۇم اعام مەنىڭ اپايىم جادىراعا ءتىرى كەزىندە حابارلاسىپ ۇلگەرىپ, تەلەفونمەن كومەك سۇراعان. «مەنى نۇرمۇحانوۆ باۋىرجان پىشاقتاپ كەتتى, قور بولدىم-اۋ» دەپ ايتقان.
سودان بەرى 4 تاۋلىك وتسە دە, كۇدىكتىنى قىلمىستىق ءىس بويىنشا قاماۋعا سانكتسيا بەرىلگەن جوق, تەك پوليتسياعا باعىنباعانى ءۇشىن عانا اكىمشىلىك ىسپەن قامادى», دەلىنگەن ونىڭ جازباسىندا.
دەرەككە قاراعاندا, كۇدىكتى بۇعان دەيىن دە 2 ادامدى ءولتىرىپ, العاشىندا شارتتى جازا السا, كەلەسى قىلمىسى ءۇشىن 3,5 جىلعا عانا سوتتالعان. سەبەبى, ونىڭ تۋىستارى وتە اۋقاتتى جانە ىقپالدى ادامدار كورىنەدى.
«مىسالى, كۇدىكتى نۇرمۇحانوۆ باۋىرجان ماقسات ۇلىنىڭ نەمەرە اعاسى نۇرمۇحانوۆ باقىت مارات ۇلى - قر كونستيتۋتسيالىق سوتى توراعاسىنىڭ ورىنباسارى. قولىمىزدا بار مالىمەت بويىنشا, قازىر ءىستى تەرگەپ جاتقان تەرگەۋشىلەر ونىڭ اۋىلداستارى, جەرگىلىكتى روۆد باستىعى جاندوس كۋشكينچينوۆ, مارقاكول اۋداندىق پروكۋرورىنىڭ ورىنباسارى ەرجان ازىمباەۆ. سوندىقتان ولار ءىستى, مەنىڭ اعام كۇدىكتىگە شابۋىل جاساۋ كەزىندە ءوزىن-ءوزى پىشاقتاپ ءولدى دەگەنگە اكەلە جاتىر. ءتىپتى, ەرتەڭ مەنىڭ اعاما نەشە ءتۇرلى جالا جاۋىپ, ءوزىن كىنالى ەتىپ شىعارۋى مۇمكىن! بۇعان دەيىن 2 ادام ولتىرگەن نۇرمۇحانوۆ باۋىرجان تاعى دا قۇتىلىپ كەتۋى عاجاپ ەمەس. بۇل - قوعامعا قاۋىپتى ادام. بۇگىن مەنى قان قاقساتسا, ەرتەڭ ءسىزدى زار جىلاتۋى مۇمكىن!», دەيدى مارقۇمنىڭ تۋىسى.
ول جەرگىلىكتى شقو پوليتسيا دەپارتامەنتىنىڭ باستىعى ە.وماربەكوۆكە دە وسى ماسەلەنى ايتۋ ءۇشىن بارعانىمەن, ول قابىلداماعان.
وقيعاعا قاتىستى پرەزيدەنتتىڭ ىشكى ساياسات ماسەلەلەرى جانە كوممۋنيكاتسيالار جونىندەگى كومەكشىسى رۋسلان جەلدىباي پىكىر بىلدىرگەن. ول اتالعان قىلمىستىق ءىس قاتاڭ باقىلاۋدا بولاتىنىن ايتتى.
