مۇسا قازىر پاۆلودارداعى اقپاراتتىق تەحنولوگيالار كوللەدجىنىڭ سوڭعى كۋرسىندا وقيدى. ول وقۋىن تامامداعاننان كەيىن نەمەن اينالىساتىنىن جاقسى بىلەدى. قازىردىڭ وزىندە استاناداعى ءبىر كومپانياعا بارىپ, سۇحباتتاسۋدان ءساتتى ءوتىپ, اقپان ايىنان باستاپ جازدىڭ سوڭىنا دەيىن جۇمىس ىستەۋگە مۇمكىندىك العان. بۇل – كوللەدجدەگى دۋالدى وقىتۋ جۇيەسىنىڭ ارقاسىندا جۇزەگە اسقان رەسمي تاعىلىمداما. وندا ءبىلىم الۋشىلار تاجىريبەدەن ءوتىپ قانا قويماي, ەڭبەك ەتىپ قارجى دا تابا الادى. بۇعان قوسا ول ەلىمىزدەگى بەلدى جوعارى وقۋ ورىندارىنىڭ بىرىنە رەكتور گرانتىن ۇتىپ العان. وسىلايشا, كەلەسى وقۋ جىلىندا ءبىلىمىن ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىندە جالعاستىرماقشى. اكادەميالىق ءبىلىمىن تولىقتىرعاننان كەيىن دە ونىڭ كەلەسى قادامى ايقىن.
ءوزى تاڭداعان سالادا تالابى مەن تالپىنىسى بيىك مۇسا سەكىلدى جاستار كوپكە ۇلگى. وكىنىشكە قاراي, قازىرگى تالاپكەرلەردىڭ دەنى ۇلتتىق بىرىڭعاي تەستىلەۋدە جيعان ۇپايى كەز كەلگەن ماماندىق بويىنشا گرانتقا جەتسە سونى تاڭدايدى. بىلمەي بارعان وقۋىن بىتىرگەن سوڭ عانا «نە ىستەيمىن» دەپ ويلانا باستايدى. وعان قىزىعۋشىلىعى بولماعاننان كەيىن ديپلومداعى ماماندىعىمەن جۇمىس ىستەمەيتىنى بەلگىلى. ال مۇسا تاڭداۋىنا نىق سەنىمدى. العان ءبىلىمى بويىنشا بولاشاققا ناقتى جوسپارى بار. ايتپاقشى, العاشىندا ول زاڭگەر بولعىسى كەلگەن ەكەن. 9-سىنىپتى بىتىرگەننەن كەيىن 10-سىنىپقا قالماي, كوللەدجدە وقۋعا شەشىم قابىلدايدى. مەكتەپتە ۇلگەرىمى جاقسى بولعان ول ەش قيىندىقسىز وقۋعا دا تۇسەدى. «ماعان زاڭگەر ماماندىعى بەدەلدى, سەنىمدى ءارى جالاقىسى جوعارى ماماندىق بولىپ كورىندى. سوندىقتان وسى سالا بويىنشا پاۆلودار مەملەكەتتىك ۋنيۆەرسيتەتىنىڭ كوللەدجىندە وقۋدى تاڭدادىم. باسىندا, ءبىرىنشى كۋرستا ءوز تاڭداۋىمنىڭ دۇرىس ەكەنىنە كۇمان كەلتىرمەدىم. بىراق ارنايى پاندەر باستالعان كەزدە ۇنامايتىنىن ءتۇسىندىم. سودان كەيىن شەشىمىمدى وزگەرتىپ, ماماندىعىمدى اۋىستىردىم», دەيدى ول.
ونىڭ ايتۋىنشا, ءدال وسى كوللەدجدە وقىعان كەزەڭ وزىنە نە قاجەت ەكەنىن, ءوزىن قاي سالادا كورگىسى كەلەتىنىن تۇسىنۋگە كوپ كومەكتەسكەن. كەيىپكەرىمىز اتا-اناسى مەن اتا-اجەسىنىڭ ءۇمىتىن اقتاعىسى كەلەتىنىن ايتادى. ويتكەنى ولار ءبىلىمدى ازامات بولۋدىڭ ماڭىزىن بالالارىنىڭ قۇلاعىنا قۇيىپ وسىرگەن ءارى جاقسى ءبىلىم الۋى ءۇشىن بارلىق جاعدايدى جاساعان. اكە-شەشەسى مۇسا جاقسى مەكتەپتە وقىسىن دەپ ونى تۋعان اۋىلى كەمەڭگەردەن پاۆلودارعا جىبەرەدى. ول مەكتەپ كەزىنەن-اق فيزيكا, ماتەماتيكا, ينفورماتيكا, اعىلشىن ءتىلى پاندەرىن جاقسى وقىعان. ال 12 جاسىندا سىيلىققا العان پلانشەتى زاماناۋي تەحنولوگياعا دەگەن قىزىعۋشىلىعىن ارتتىرا ءتۇستى. ارينە, بالا بولعان سوڭ, اۋەلى, ويىندارعا قالاي تەگىن قول جەتكىزۋگە بولاتىنىن زەرتتەگەن. «كەيبىر قولدانبالار مەن قىزمەتتەردىڭ قورعانىسى وتە كۇردەلى, ال كەيبىرەۋلەرى وتە ءالسىز», دەيدى ول. ۋاقىت وتە كەلە وقۋشىنى ءدال وسى كيبەرقاۋىپسىزدىك ماسەلەلەرى ەرەكشە قىزىقتىرعان. ءسويتىپ, مەكتەپتە روبوتتەحنيكا ۇيىرمەسىنە بارادى. سودان كەيىن دە ول تەحنولوگيالىق ماماندىقتى تاڭداعان.
مۇسا اقپاراتتىق تەحنولوگيالار كوللەدجىنە اۋىسقان سوڭ وسى باعىتتى جانى قالايتىنىن بىردەن تۇسىنگەن. ونىڭ ايتۋىنشا, تاڭداۋ جاساعاندا ماماندىقتىڭ بەدەلىن ەمەس, ادام ءوز جان قالاۋىن, نە نارسەگە قىزىعاتىنىن, نە ىستەگىسى كەلەتىنىن ەسكەرۋى كەرەك. سونىمەن قاتار ول كوللەدجدە ستۋدەنتتەردىڭ تەوريالىق بازانى عانا ەمەس, العان ءبىلىمىن ءىس جۇزىندە قالاي قولدانۋ كەرەكتىگىن ۇيرەتۋگە كوپ كوڭىل بولەتىنىن ەرەكشە اتاپ ءوتتى. ونىڭ پايىمداۋىنشا, تاجىريبە جۇزىندە ۇيرەنگەندەرى ءتۇرلى جارىستارعا قاتىسىپ, جۇلدەلى ورىندارعا يە بولۋىنا ىقپال ەتكەن. تالاپتى جاس WorldSkills, BRICS, DigitalSkills سىندى حالىقارالىق جارىستاردا جەڭىسكە جەتىپ, چەمپيون اتانعان. ال مۇنداي سايىستاردا باسەكەلەستىك ۇنەمى جوعارى بولاتىنى بەلگىلى. مۇسانىڭ تالىمگەرى ستانيسلاۆ كرىجانوۆسكي وعان جارىستارعا دايىندالۋعا كومەكتەسىپ, ءاردايىم جان-جاقتى قولداۋ كورسەتىپ وتىرعان.
ايتپاقشى, ۋنيۆەرسيتەتتى بىتىرگەننەن كەيىن ول ءوزىنىڭ تۋعان اۋىلىنداعى مەكتەپتە كەمىندە ءۇش جىل مۇعالىم بولىپ جۇمىس ىستەۋگە مىندەتتى. مۇسا بۇل جاۋاپكەرشىلىكتەن دە ەش قاشپايدى. كەرىسىنشە, كوللەدجدە كوپ نارسەنى ءبىلىپ شىققاننان كەيىن, سول ۇيرەنگەنىن وزگەلەرگە دە ۇيرەتۋدى قۇپ كورەدى.
