«مەن كوپبالالى وتباسىندا دۇنيەگە كەلدىم. وتباسىمىزبەن جۋالى اۋدانىنىڭ ورتالىعى باۋىرجان مومىش ۇلى اۋىلىندا تۇردىق. جەرگىلىكتى حالىقپەن تىعىز ارالاستىق. اۋىلداعى اركادي گايدار اتىنداعى ورتا مەكتەپتى اياقتاعان سوڭ تاراز قالاسىنداعى «پاراسات» كوللەدجىندە ءبىلىم الدىم. كەيىن شىمكەنت قالاسىنداعى حالىقتار دوستىعى ۋنيۆەرسيتەتىن ءتامامدادىم», دەيدى ول.
بالا كۇنىنەن بىلىمگە قۇشتار سۋدابا 2017 جىلى العاش ەڭبەك جولىن باۋىرجان مومىش ۇلى اتىنداعى №1 گيمنازيادا باعدارلاماشى بولىپ باستاپتى. كەيىن اۋداندىق «جاستار ورتالىعى» مەكەمەسىندە ەڭبەك ەتكەن. اراعا از ۋاقىت سالىپ, ءدىن ىستەرى جانە تالداۋ ءبولىمىنىڭ مەڭگەرۋشىسى قىزمەتىن اتقارعان.
ءبىلىم سالاسىنا اڭسارى اۋعان سۋدابا 2021 جىلى تاراز قالاسىنداعى №7 گيمنازياعا جۇمىسقا ورنالاسادى. بار بىلگەنىن جاس ۇرپاقتىڭ بويىنا دارىتۋدى ماقسات تۇتقان مامان قازىر ينفورماتيكا ءپانىنىڭ مۇعالىمى بولىپ ەڭبەك ەتىپ ءجۇر.
«مەكتەبىمىزدە «ادال ۇرپاق» دەپ اتالاتىن ەرىكتىلەر كلۋبى قۇرىلعان. قۇرامىنا ءبىلىم ورداسىنىڭ 120 كوشباسشىسى ەنگەن كلۋبتىڭ باستى ماقساتى – قۇقىقتىق جانە ازاماتتىق مادەنيەتتى قالىپتاستىرۋ, بالالاردى ادالدىققا تاربيەلەۋ. وسى باعىتتا وقۋشىلار اراسىندا الەۋمەتتىك-قۇقىقتىق ءبىلىمدى زەردەلەۋ, ۇرپاققا بىلگەنىمىزدى تەرەڭىرەك ۇيرەتۋ ماسەلەسىنە دەپ قويىپ ءجۇرمىز. جۇمىسىن جاڭادان باستاعان كلۋبتىڭ كوپ ۇزاماي وڭ ناتيجە بەرەتىنىنە سەنىمىمىز مول. مەكتەپ مۇعالىمدەرى كوزدەگەن ماقساتقا قول جەتكىزۋ ءۇشىن تەر توگىپ كەلەدى. ءبىز وقۋشىلاردىڭ بويىندا جەمقورلىققا قارسى مادەنيەتتى قالىپتاستىرۋعا ايرىقشا باسىمدىق بەرەمىز. بارلىق جۇمىس پەن ۇيىمداستىرىلاتىن ءىس-شارانى وسى باعىتقا ساي وتكىزەمىز. قازىر كلۋبتا ۇيىرمە جەتەكشىسى رەتىندە ەڭبەك ەتىپ ءجۇرمىن. جاڭادان اشىلعان كلۋبتىڭ جۇمىسى ەندى جۇيەلەنىپ كەلەدى», دەيدى ول.
مۇعالىم سۋدابا ءوزىنىڭ شىعارماشىلىق الەۋەتىن ءتيىمدى پايدالانىپ, وقۋشىلاردىڭ بويىندا مەملەكەت, قوعامعا دەگەن ادالدىق پەن جاناشىرلىقتى قالىپتاستىرىپ, جەكە تۇلعانى تاربيەلەۋدى ماقسات تۇتادى. قازىر وسى باعىتتا ءبىلىم الۋشىلارعا بار بىلگەنىن ۇيرەتىپ ءجۇر. ەڭ باستىسى, شاكىرتتەرىنىڭ بويىنان ەلگە, قازاق حالقىنا دەگەن ادالدىقتى كورگىسى كەلەدى.
«كەيىنگى بىرنەشە جىلدىڭ بەدەرىندە قازاقستاندا العىس ايتۋ كۇنى ارنايى مەرەكە رەتىندە تويلانىپ كەلەدى. بۇل مەرەكەنىڭ ءبىز ءۇشىن ماڭىزى زور. اتىراۋ مەن التاي اراسىن مەكەن ەتكەن حالقىمىزدىڭ, اسىرەسە جاستاردىڭ اراسىندا كەلىسىم مەن دوستىقتى نىعايتا تۇسكەننىڭ ەش ارتىقتىعى جوق. وسى تۇرعىدان العاندا ارنايى بەكىتىلگەن مەرەكەنىڭ ماڭىزىن تەرەڭىرەك تۇسىنە تۇسەمىز. دوستىق پەن تاتۋلىقتان اسقان قۇندىلىق جوق. ءار ازامات وسى ءبىر باعا جەتپەس قۇندىلىقتى باعالاۋى كەرەك. تالاي ۇلت پەن ۇلىستى باۋىرىنا باسقان قازاق حالقىنا وسى كيەلى جەردى پانالاپ كەلگەن ءار ۇلتتىڭ العىستان باسقا ايتارى جوق. وعان ەشكىم كۇمان كەلتىرە قويماس. بۇگىندە حالىقتار اراسىنداعى بىرلىك پەن دوستىققا ايرىقشا ءمان بەرىلىپ وتىرعانى انىق. وسىنى وسكەلەڭ جاس تەرەڭنەن تۇسىنگەنى دۇرىس. ول ءۇشىن ۇستازدار قاۋىمى دا ايانباي ەڭبەك ەتۋگە ءتيىس. ويتكەنى ءبىز جاستاردىڭ بويىنا دەموكراتيالىق قوعامنىڭ قۇندىلىقتارى مەن نەگىزىن ءسىڭىرۋىمىز كەرەك. بۇل – بارشامىزدىڭ اسىل بورىشىمىز», دەيدى ول.
جىلدار بويى ىزدەنىستىڭ ىزىنە تۇسكەن جاس ۇستازدىڭ تانىمى ەرەك, ويى زەرەك. مەملەكەتتىك ءتىلدى مىقتاپ مەڭگەرگەن سۋدابا مۇنى ءوزىنىڭ پارىزى دەپ ەسەپتەيدى. قاي كەزدە دە جاڭاشىلدىققا باسىم بەرەتىن مۇعالىمنىڭ الار اسۋى كوپ ەكەنىنە سەنىمى كامىل. ۇلتى وزگە دەمەسەك, ءتىلى مەن تىلەگى ءبىر سۋدابانىڭ العا قويعان ماقساتى ايقىن. ول ەسەلى ەڭبەگىمەن بيىكتەردى باعىندىرعىسى كەلەدى.
جامبىل وبلىسى
