اكتسيانىڭ ماقساتى – حالىقتىڭ الەۋمەتتىك ءالسىز توبىنا ءتۇرلى تاعامداردان ءدام تاتىرىپ, مەرەكەلىك كوڭىل كۇي سىيلاپ, دەمەۋ بولۋ. يگىلىكتى ءىس-شاراعا استانا قالاسى اكىمدىگى جانىنداعى «قوعامدىق كەلىسىم» كمم قىزمەتكەرلەرى, ەتنومادەني بىرلەستىكتەردىڭ وكىلدەرى مەن شىعارماشىلىق ۇجىمدارى قاتىستى.
– كومەككە مۇقتاج جانداردىڭ قاتارى وتكەن جىلمەن سالىستىرعاندا ارتتى. ستاتسيونار جاعدايىندا بىلتىر 320-330 اراسىندا ادام بولسا, بيىل تۇراقتى 350 ادام بار. ال ءۇي جاعدايىندا 560 ازاماتقا قىزمەت كورسەتىپ وتىرمىز. ورتالىقتا 10 ءتۇرلى ۇلت وكىلى قاريالارعا كومەك كورسەتىپ كەلەدى. ولاردى ءبىز «كىشى اسسامبلەيا» دەپ اتايمىز. العىس ايتۋ كۇنىنە ارنايى كونتسەرتتىك باعدارلاما مەن ءدام الا كەلگەن شاھاردىڭ قحا باسشىلىعىنا العىسىمىزدى ايتامىز. ويتكەنى جىل سايىن كونتسەرتتىك باعدارلاماسىمەن مەكەمەدەگى قىزمەت الۋشىلاردىڭ كوڭىل-كۇيىن كوتەرىپ, ءبىر قۋانتىپ كەتەدى. اعا بۋىننىڭ جۇزىنەن ريزاشىلىقتى اڭعارۋ قيىن ەمەس, – دەدى «شاراپات» الەۋمەتتىك قىزمەت كورسەتۋ ورتالىعى مكقك ديرەكتورى ارداق سەيىتوۆا.
تاعدىر جازۋىمەن قازاق جەرىنە تابان تىرەگەن ءتۇرلى ەتنوس وكىلدەرى دە قايىرىمدىلىق شاراسىندا وزىندىك ورنەكتەرىمەن, ۇلتتىق كيىمدەرىنىڭ ايرىقشا ۇلگىسىمەن بوي كورسەتىپ, كەڭپەيىل الاش جۇرتىنا العىسىن جەتكىزدى.
– العىس ايتۋ كۇنى – تەك ريزاشىلىق ەمەس, جاس ۇرپاق ءۇشىن تاريح تۋرالى سىر شەرتەتىن تاعىلىمعا تولى مەرەكە. تاعدىر تالكەگىمەن جان ساۋعالاپ, قونىس اۋدارعان ءار ەتنوس وكىلدەرىن باۋىرىنا باسىپ, ءبىر ءۇزىم نانىن بولىسكەن قازاق حالقىنىڭ كەڭپەيىلدىگى كوپتەگەن ۇلتتىڭ ۇرپاق وربىتۋىنە جاعداي جاسادى, مۇمكىندىك بەردى. مىنە, بۇگىندە ءبىرتۇتاس مەملەكەتىمىزدە قازاقستان حالقىنىڭ اسسامبلەياسى قۇرىلىپ, ىنتىماعىمىز نىعايىپ كەلەدى, – دەدى «رۋسسكايا وبششينا ستوليتسى» قوعامدىق بىرلەستىگىنىڭ كوورديناتورى اندرەي اۆدەەۆ.
قازاق حالقىنىڭ بولمىس-بىتىمىمەن بىتە قايناسىپ, تۇرمىس-تىرشىلىگى ورتاق ءبىر ارناعا توعىسقان كورەيلەردىڭ دە وزىندىك مادەني قۇندىلىقتارى ەلىمىزدە قالىپتاسىپ كەلەدى. يگى ىستە ولار دا اسسامبلەيانىڭ شاشباۋىن كوتەرىپ, كونتسەرتتىك باعدارلاماعا جۇمىلا اتسالىستى.
– وتكەن عاسىردىڭ 30-جىلدارى قيىر شىعىستان قازاقستانعا 200 مىڭنان اسا كورەي جەر اۋدارىلعان. جالپى, كورەي دياسپوراسىنىڭ قازاق جەرىنە قونىس تەپكەنىنە 80 جىلدان استى. ءبىز ءۇشىن قازاقستان ءتول مەكەنىمىزگە اينالدى. وسى جەردە ءوسىپ-وندىك. سوندىقتان وتانداستارىمىزدى كوكتەمنىڭ العاشقى كۇنىمەن ىلەسە كەلەتىن العىس ايتۋ مەرەكەسىمەن شىن جۇرەكتەن قۇتتىقتايمىن. ەل امان, جۇرت تىنىش بولسىن, – دەدى استانا قالاسى كورەي ەتنومادەني بىرلەستىگىنىڭ مۇشەسى الەكساندرا كيم.
