بيىل 2023-2025 جىلدارعا ارنالعان ء«بىرتۇتاس تاربيە باعدارلاماسى» جۇزەگە اسا باستادى. شالقار قالاسىنداعى №8 ورتا مەكتەپتە ۇلتتىق جادىگەرلەر كورمەسىنىڭ اشىلۋى اتالعان باعدارلامانىڭ شاراپاتى دەۋگە بولادى. تاريح قويناۋىنان سىر شەرتەتىن كونە بۇيىمدار كورمەسىنىڭ اشىلۋى جوعارى دەڭگەيدە ءوتتى. وعان مەكتەپ ۇجىمى مەن اتا-انالار قازاقى كيىم كيىپ كەلىپ, ءىس-شارانىڭ رۋحاني دەڭگەيىن ارتتىردى. كيمەشەك كيگەن اجەلەرىمىز شاشۋ شاشىپ, اقساقالدارىمىز اتا ءداستۇردى ارداقتاعان بۇل باياندى باستاماعا ريزاشىلىعىن ءبىلدىرىپ, باتاسىن بەردى. وقۋشىلار قول كۇرەستىرىپ, اسىق ويناپ, ءداستۇرلى سپورتتىق ويىنداردان كورىنىس كورسەتتى.
كورمەنىڭ اشىلۋ لەنتاسىن شالقار قالالىق ارداگەرلەر ۇيىمىنىڭ توراعاسى امانكەلدى قالىباەۆ پەن اق جاۋلىقتى انا بازارگۇل سىرعابەكوۆا قيدى.
– جاس ۇرپاقتى ادەپتى دە سانالى, ارلى دا ابىرويلى ەتىپ تاربيەلەۋ ءۇشىن ەڭ الدىمەن ادەت-عۇرپىمىزدى, ءداستۇرلى ءدىنىمىزدى, اتا-بابالارىمىزدان قالعان مۇرالاردى ولاردىڭ سانالارىنا سىڭىرە ءبىلۋىمىز قاجەت. بۇل كورمە مەكتەپ ۇجىمى مەن اتا-انالار قاۋىمىنىڭ بەلسەندىلىگىمەن از ۋاقىتتىڭ ىشىندە جاساقتالدى, الدا مۇنداعى جادىگەرلەر قاتارى تولىعاتىنىنا سەنەمىن. وسى كورمە زالىندا وتەتىن قوسىمشا ساباقتاردا ءار سىنىپ وقۋشىلارى ۇلتتىق قۇندىلىقتارعا تەرەڭ بويلاپ, رۋحاني تۇرعىدان دا زەيىندەرى ارتادى. سانانى سان مىڭداعان اقپارات الاڭداتقان بۇگىنگىدەي جاھاندانۋ كەزەڭىندە جاستاردى رۋحتى ەتىپ ەسەيتۋ ءۇشىن ولاردى اتا جولدان الشاقتاتپاي, سالت-ءداستۇر نەگىزدەرىمەن سۋسىنداتقان ابزال. مەكتەبىمىزدە اتا-انالاردى پەداگوگيكالىق قولداۋ كابينەتى دە جۇمىس ىستەيدى. ونىڭ ماقساتى – بالالاردى وقىتۋ جانە تاربيەلەۋ بويىنشا اتا-انالارمەن قارىم-قاتىناستى كۇشەيتۋ, سونداي-اق بەرەكەلى وتباسى مادەنيەتىن دامىتۋ, – دەيدى №8 ورتا مەكتەپتىڭ ديرەكتورى ريتا باسماعانبەتوۆا.
زاماناۋي مەكتەپ عيماراتىنىڭ ءبىر بۇرىشىنان قازاقى كيىز ءۇي پىشىنىندە جاساقتالعان كورمەگە قويىلعان اباجا, ابدىرا, اعاش توسەك, ادالباقان, اسادال, جوزى, ساندىق, كەبەجە سىندى بايىرعى ءۇي جيھازدارىنىڭ ءتۇپ تاريحىن مەكتەپ مۇعالىمى مانشۇك ماپۋتوۆا تياناقتى تانىستىردى.
85 جاستاعى دۇيسەنباي ەشمۇحانوۆ اقساقال مۇندا قويىلعان ءاربىر جادىگەردىڭ وزىنە ىستىق كورىنەتىنىن ايتىپ, جاستىق شاعىن, بۇعاناسى بەكىمەي اۋىر ەڭبەك جۇگىن ارقالاعان زامانداستارىن ەسىنە الدى. وسى ءبىلىم وشاعىنىڭ جاس ۇستازى, «Qazaqstan» ۇلتتىق ارناسىنداعى «مەرگەندەر مەكەنى» رەاليتي شوۋىنىڭ جۇلدەگەرى, مەرگەن قىز ساندىگۇل الەنوۆا
ساداق اتۋ ونەرىنىڭ ءتول مادەنيەتىمىزدەگى ورنىن, اسىل دىنىمىزدەگى مەرگەندىك جايلى قاسيەتتى سوزدەردى ايتا كەلە, جاستاردى وسى ونەرگە كوبىرەك تارتۋ جونىندە وي-پىكىرىن ورتاعا سالدى.رەسپۋبليكالىق دەڭگەيدەگى مەرگەندەر سايىسىندا وق بويى وزىپ شىققان ساندىگۇل – مەكتەبىندەگى ماقتاۋلى ۇستازداردىڭ ءبىرى.
ءىس-شارا بارىسىندا مەكتەپتىڭ دارىندى وقۋشىلارى ءوز ونەرلەرىن پاش ەتىپ, مەيماندار مەرەيىن ۇستەم ەتتى. كەزىندە «100 مەكتەپ, 100 اۋرۋحانا» مەملەكەتتىك باعدارلاماسىمەن سالىنعان №8 ورتا مەكتەبى – اۋدانىمىزداعى كورنەكتى ءبىلىم وشاقتارىنىڭ ءبىرى. مۇندا قازىر ءار اپتانىڭ دۇيسەنبىسى «ۇلتتىق تاربيە» كۇنى بولىپ بەلگىلەنگەن. بۇل كۇنى ۇستازدار مەن وقۋشىلار مەكتەپكە قازاقى ناقىشتاعى كيىممەن كەلەدى. ءۇزىلىس قوڭىراۋلارى ءداستۇرلى كۇي اۋەنىمەن سوعىلىپ, ۇلتتىق ويىندار وينالاتىن وسى كۇندى وقۋشىلار دا اسىعا كۇتەدى ەكەن.
مۇحتار مىرزالين
اقتوبە وبلىسى,
شالقار قالاسى
