مەملەكەت باسشىسى ايتقانداي, راسىمەن اۋىل شارۋاشىلىعىنداعى ەڭ وتكىر ماسەلە – قارجىلاندىرۋدىڭ جەتكىلىكسىزدىگى. مينيستر دە سالاداعى كوپتەگەن ماسەلەنىڭ, سونىڭ ىشىندە ءونىمنىڭ وزىندىك قۇنىنىڭ جوعارى بولۋىنىڭ نەگىزى وسىندا ەكەنىن ايتىپ وتىر.
– قارىزعا بەرىلەتىن قارجىنىڭ تاپشىلىعىنا بايلانىستى فەرمەرلەر تىڭايتقىشتاردى, وسىمدىكتەردى قورعاۋ قۇرالدارىن ءتيىستى مولشەردە پايدالانبايدى, ەسكىرگەن تەحنيكامەن جۇمىس ىستەيدى. بۇل – سالاداعى تيىمدىلىك پەن ونىمدىلىكتىڭ تومەندىگىنە بىردەن-ءبىر سەبەپ. قازىر ماسەلەنى تولىعىمەن شەشۋ ءۇشىن شارۋاشىلىقتاردى ءوز ۋاقىتىندا قولجەتىمدى نەسيە قاراجاتتارىمەن قامتاماسىز ەتۋ ماڭىزدى بولىپ وتىر. ءبىز پرەزيدەنت تاپسىرماسى بويىنشا بيىل اۋىل شارۋاشىلىعىنا قاراجات تارتۋ بويىنشا ۇلكەن جۇمىس جۇرگىزەتىن بولامىز, – دەدى مينيستر.
ا.ساپاروۆتىڭ ايتۋىنشا, بۇعان بيۋدجەت قاراجاتى عانا ەمەس, باسقا دا كوزدەر, سونىڭ ىشىندە ەكىنشى دەڭگەيلى بانكتەر ارقىلى نەسيە قاراستىرۋ دا كوزدەلىپ وتىر. ناتيجەسىندە, جىل سايىن كوكتەمگى ەگىس جانە كۇزگى جيىن-تەرىم جۇمىستارىنا جەڭىلدەتىلگەن 1,5 ترلن تەڭگە نەسيە ءبولىنىپ, بۇل قارجى قاجەتتىلىكتى تولىق قامتاماسىز ەتۋگە باعىتتالۋعا ءتيىس. سونداي-اق 450 ملرد تەڭگە قاراجات اۋىل شارۋاشىلىعى تەحنيكاسىن جاڭارتۋ جونىندەگى تاپسىرمانى ورىنداۋ ءۇشىن 8-10 پايىزبەن جەڭىلدەتىلگەن ليزينگكە باعىتتالادى. ال ينۆەستيتسيالىق جوبالاردى قارجىلاندىرۋعا 800 ملرد تەڭگە قاجەت.
مينيستر جوعارىدا ايتىلعان بارلىق قاراجات قايتارىمدى ەكەنىن ەسكەرتىپ ءوتتى. سونىمەن قاتار اۋىل شارۋاشىلىعى سالاسىن دامىتۋ – ورتاق مىندەت ەكەنىن ءارى بۇل باعىتتا جالعىز مينيسترلىك قانا ەمەس, وبلىس اكىمدىكتەرى دە پرەزيدەنت تاپسىرماسىن ورىنداۋ ءۇشىن اگروونەركاسىپ كەشەنىن دامىتۋعا بارىنشا قولداۋ كورسەتۋ كەرەكتىگىن باسا ايتتى. جەڭىلدىكپەن نەسيە العان, جالپى, مەملەكەتتىك قولداۋعا يە بولعان فەرمەرلەر ناقتى ناتيجە كورسەتۋگە كەرەك. ءوندىرىس كولەمىن ۇلعايتىپ, ءونىمنىڭ قۇنىن كوتەرمەۋى ءتيىس.
بريفينگتە جوعارى ءونىم الۋ ءۇشىن بيىل تىڭايتقىشتىڭ ۇلەسىن 2 ەسە ۇلعايتىپ, جالپى كولەمىن 1,5 ملن تونناعا دەيىن جەتكىزۋ تۋرالى دا ايتىلدى. بۇل ونىمدىلىكتى گەكتارىنا ورتاشا 3-5 تسەنتنەرگە دەيىن ارتتىرۋعا مۇمكىندىك بەرمەك.
اۋىل شارۋاشىلىعى سالاسىنىڭ نەگىزگى رەسۋرستارىنىڭ ءبىرى – مينەرالدى تىڭايتقىشتار. مىسالى, ەۋروپا ەلدەرىندە ءار گەكتارعا 250 كيلودان استام مينەرالدى تىڭايتقىش قاجەت بولادى, بۇل كورسەتكىش بەلارۋستە – 120 كيلو, رەسەيدە 55-60 كيلو ارالىعىن قامتىسا, ءبىزدىڭ ەلدە مۇنداي قورەكتىك زاتتار گەكتارىنا ورتا ەسەپپەن 10 كيلوعا دا جەتپەيتىن كورىنەدى. سونداي-اق رەسپۋبليكا بويىنشا تىڭايتقىشتاردى ەنگىزۋ كولەمى ءار ايماقتا ءارتۇرلى. بىلتىر جىل اياعىندا 5,6 ميلليون گەكتار ەگىستىك القابىن قۇرايتىن قوستاناي وبلىسى نەبارى 54 مىڭ توننا تىڭايتقىش پايدالانعان. قوستانايعا قاراعاندا ەگىس كولەمى 1,2 ميلليون گەكتارعا از سولتۇستىك قازاقستان وبلىسى 190 مىڭ توننا تىڭايتقىش جاراتىپتى.
ايتا كەتەيىك, اۋىل شارۋاشىلىعى مينيسترلىگى سۇرانىستىڭ ارتۋى كەزىندە تىڭايتقىشتار باعاسىنىڭ وسۋىنە جول بەرمەۋ, سونداي-اق مەملەكەتتىك قولداۋ الۋ كەزىندە سىبايلاس جەمقورلىق تاۋەكەلدەرىن تومەندەتۋ ءۇشىن جۇمىس ىستەيمىز دەيدى. تاعى ءبىر جاڭالىق, سۋبسيديالار اگروونەركاسىپتىك كەشەن سۋبەكتىلەرىنىڭ ورنىنا وتاندىق ءوندىرۋشى زاۋىتتار مەن قارجى ينستيتۋتتارىنا («قازاگروقارجى» اق) الدىن الا تىكەلەي تولەنەدى. مۇندا يمپورتتىق تىڭايتقىشتاردى تاڭداعان فەرمەرلەرگە ۇكىمەتتەن قولداۋ جوق ەمەس جانە ولار ءۇشىن سۋبسيديالاۋ شارتتارى مەن مەملەكەتتىك قولداۋ الۋ فورماتى بۇرىنعىداي بولىپ قالا بەرەدى.
