ۇلتتىق ۇلاننىڭ وكىلدەرى ۇزىناعاشقا ارنايى ات باسىن بۇرىپ, كوپشىلىكتى ءتانتى ەتكەن ءتاتتى بالاقايلاردى «جاس بۇركىت» اسكەري-پاتريوتتىق قوزعالىسىنا قابىلدادى. قۋاتتى قۇرىلىمنىڭ «وڭتۇستىك» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پولكوۆنيك نيازتاي الكەشەۆ باستاعان ۇلاندىقتار مەن الماتى گارنيزونىنىڭ اسكەري قىزمەتشىلەرى, سونداي-اق جەرگىلىكتى ءبىلىم ءبولىمىنىڭ وكىلدەرى بالاباقشادا ەرەكشە فورماتتاعى ءىس-شارا وتكىزدى.
ءىس-شارانىڭ شىمىلدىعىن اشقان جامبىل اۋداندىق ءبىلىم ءبولىمىنىڭ باس ادىسكەرى سالتانات ادەنوۆا بالدىرعانداردىڭ الەۋمەتتىك جەلى ارقىلى تاراعان ونەرىن باعالاپ, قولداۋ ءبىلدىرىپ قۇتتىقتاپ كەلىپ وتىرعان ۇلتتىق ۇلاننىڭ باسشىلىعىنا ريزاشىلىعىن ءبىلدىردى.
– الەۋمەتتىك جەلى دەگەن ۇلكەن كۇش بولىپ تۇر. سول ارقىلى بالاباقشامىزدىڭ جۇمىسى بۇگىندە رەسپۋبليكاعا تاراپ جاتىر. ون جىلدان بەرى جۇمىس ىستەپ كەلە جاتقان ۇجىم – اۋدانىمىزداعى ەڭ ءىرى بالاباقشالاردىڭ ءبىرى. مۇندا 200-دەن اسا بالا تاربيەلەنىپ كەلەدى. بۇل مەكەمەنىڭ الەۋەتى وتە جوعارى, بالدىرعاندارىمىز وبلىستا جانە اۋدانىمىزدا وتەتىن قوعامدىق ءىس-شارالارعا بەلسەندى قاتىسىپ تۇرادى. ۇلتتىق قۇندىلىقتارىمىزدى دارىپتەپ, بالالاردى پاتريوتتىق رۋحتا تاربيەلەپ جاتقان جۇمىسىمىزعا كوڭىل اۋدارعان ۇلاندىقتارعا راحمەت, – دەيدى سالتانات سابيتقىزى.
«وركەنيەت» بوبەكجاي بالاباقشاسىندا قوناقتار بالالاردىڭ ۇيىمداستىرۋىمەن وتكەن سالتاناتتى كونتسەرتتى تاماشالادى. بالاباقشانىڭ جاس ونەرپازدارى اسكەري اندەردى ورىنداپ, ۇلتتىق بيدەن شاشۋ شاشتى. كەڭەس وداعىنىڭ باتىرى, گۆارديا پولكوۆنيگى باۋىرجان مومىش ۇلى اتىنداعى 5571 اسكەري بولىمىندەگى «گەنەرال» توبىنىڭ ءسوليسى ءمادي ماقاجانوۆ «اداي» كۇيىن تارتسا, اباي اتىنداعى قازاق ۇلتتىق وپەرا جانە بالەت تەاترىنىڭ ءسوليسى فارحات كۋبيەۆ بۇلدىرشىندەرمەن بىرگە «اتامەكەن» ءانىن ورىندادى.
پولكوۆنيك نيازتاي الكەشەۆ بۇلدىرشىندەردى پاتريوتتىق رۋحتا تاربيەلەپ جۇرگەن ۇجىم باسشىسى اقمارال عۇمارقىزىنا ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى حالىق قاھارمانى, گەنەرال-مايور قايرات ۇمبەتوۆتىڭ جانە بالالاردىڭ تالانتىنا قانات بىتىرگەن بالاباقشا تاربيەشىسى اينۇر ماقساتقىزىنا «وڭتۇستىك» وڭىرلىك قولباسشىلىعىنىڭ قولباسشىسى, گەنەرال-مايور تالاپكەر امىرەەۆتىڭ العىسحاتىن تابىستادى.
وسىدان كەيىن بوبەكجاي بۇلدىرشىندەرى «تikTok» الەۋمەتتىك جەلىسىندە تاراپ, جۇرتشىلىقتى تامساندىرعان ونەرلەرىن قوناقتار نازارىنا ۇسىندى. جيىن سوڭىندا «وركەنيەت» بوبەكجاي بالاباقشاسىنىڭ 50 بالدىرعانىنا «جاس بۇركىت» اسكەري-پاتريوتتىق قوزعالىسىنىڭ تۋى, ارنايى ەمبلەماسى مەن باندانى تابىستالدى. وسىلايشا, العاش رەت بالاباقشا بالدىرعاندارى «جاس بۇركىت» اسكەري-پاتريوتتىق قوزعالىسىنىڭ مۇشەسى اتاندى.
الماتى
