اتالعان تۋرنيرگە الماتى جانە اباي وبلىسىنان, سونىمەن قاتار ءوز وڭىرىمىزدەن جۇزدەگەن ادام قاتىستى. ءتىپتى دودادان شىعىپ قالعاندار دا بولدى. مۇندا باپتان گورى, باقتىڭ باسىمىراق جۇرەتىنى بەلگىلى. قارتتارمەن قاتار جاستار دا سايىسقا ءتۇسىپ, شەبەرلىگىن كورسەتتى.
كوپشىلىك جازدا الاكولدىڭ شيپالى سۋىنا شومىلسا, كول بەتىنە مۇز قاتقان قىس مەزگىلىندە بالىق اۋلاعاندى ۇناتادى. وسى ورايدا الاكول اۋداندىق اكىمدىگىنىڭ باستاماسىمەن تۇرعىندار اراسىندا «الاكول-2024» مۇز استى بالىق اۋلاۋ ءتۋرنيرى ءوتتى. ءتۋرنيردى ۇيىمداستىرۋ جۇمىستارىن «بالقاش-الاكول وبلىسارالىق باسسەيىندىك بالىق شارۋاشىلىعى ينسپەكتسياسى» رمم مەن «پريچال» اڭشىلىق دۇكەنى اتقارعان.
الاكول اۋداندىق اكىمدىگىنىڭ مالىمەتىنە سۇيەنسەك, جالپى سانى 51 ادام قاتىسقان تۋرنير اسا تارتىستى وتكەن. كول جاعاسىنا الىس-جاقىن وڭىرلەردەن كەلگەن بالىقشىلار توپتاسقان. كەلەر جىلى شەتەلدەن كەلۋگە نيەتتى تۋريستەر دە بار ەكەن. ونى ۇيىمداستىرۋشىلار دا جاسىرمادى. ولار الدىمەن قاتىسۋشىلارعا جارىس ەرەجەسى مەن قاۋىپسىزدىك ەرەجەسىن ءتۇسىندىرىپ, سايىستا ساتتىلىك تىلەدى. تۋرنير باستالاردان بۇرىن قاتىسۋشىلار تىركەۋدەن ءوتىپ, ارنايى رەتتىك نومىرلەر الدى.
«جارىس ءۇشىن جاعالاۋدان راديۋسى 200 مەتر بولاتىن جەر بەلگىلەندى, وعان ارنايى جالاۋشالار قويىلىپ, تۋرنير قاتاڭ تۇردە وسى راديۋس اۋماعىندا وتكىزىلدى. تالاپ بويىنشا جارىسقا قاتىسۋشىلاردىڭ قولداناتىن قىسقى قۇرالدارىنىڭ سانى ۇشتەن اسپاۋعا ءتيىس, سونداي-اق جەمنىڭ كەز كەلگەن ءتۇرىن قولدانۋعا جانە بالىقتى ازىقتاندىرۋعا رۇقسات ەتىلدى. جارىس اياقتالدى دەگەن بەلگى بەرىلگەن ساتتە قاتىسۋشىلار اۋلارىن سۋدان شىعارىپ, ناتيجەسىن كوپشىلىك الدىندا كورسەتىپ, قورىتىندىسىن حاتتاماعا ەنگىزدىك. ورىنداردى ءبولۋ اۋلانعان بالىقتىڭ جالپى سالماعى بويىنشا بەلگىلەندى. جارىس قورىتىندىسىندا نەگىزىنەن قارماققا الابۇعا كوپ ءتۇستى, تەك ءبىر ادام عانا كوكسەركە بالىعىن الىپ شىقتى. وسى تۋرنيردە جالپى سالماعى 3,7 كگ بالىق اۋلاندى», دەدى ءتۋرنيردى ۇيىمداستىرۋشىلاردىڭ ءبىرى, جارىستىڭ باس تورەشىسى ماكسيم كوشكين.
جارىسقا قاتىسۋشىلاردىڭ جاسىنا شەكتەۋ قويىلعان جوق. ءتىپتى جالعىز ءوزى ەمەس, وتباسىمەن بىرگە قاتىسقاندار دا بار. ماسەلەن, اۋدان تۇرعىنى جانىبەك سماعۇلوۆ جارىسقا ۇلىمەن بىرگە كەلگەن.
ء«وزىم دە, بالام دا بالىق اۋلاعاندى جاقسى كورەمىز. ءبىز ونى قىستىڭ شىڭىلتىر ايازىندا تازا اۋاداعى بەلسەندى دەمالىس دەپ سانايمىز. بۇگىن 30 مەتر تەرەڭدىككە قارماق لاقتىرىپ, بالىق اۋلادىق. ەڭ العاشقى بالىق مەنىڭ قارماعىما ءتۇستى. كوڭىل كۇيىمىز كەرەمەت, ءبىز ءۇشىن تاماشا دەمالىس بولدى», دەيدى جەڭىمپازداردىڭ ءبىرى ج.سماعۇلوۆ.
جارىس قورىتىندىسى بويىنشا 1 كگ 150 گر بالىق اۋلاعان اباي وبلىسى ءۇرجار اۋدانىنىڭ تۇرعىنى قاليبەك ەرسىن ءبىرىنشى ورىندى يەلەندى. ال ەكىنشى جانە ءۇشىنشى ورىندار ۇشارالدىقتار وكسانا فيلونوۆا مەن ياروسلاۆ يۆانوۆقا بەرىلدى. سول سياقتى «ەڭ ءبىرىنشى اۋلانعان بالىق», «ەڭ ءبىرىنشى اۋلانعان الابۇعا», «ەڭ ءبىرىنشى اۋلانعان كوكسەركە», «ەڭ كىشكەنتاي بالىق» اتالىمدارى بويىنشا قارماعى قارا سۋدان بوس قايتپاعاندار دا ماراپاتتالدى. ەڭ العاشقى بالىق تا, ەڭ العاشقى الابۇعا دا جانىبەك سماعۇلوۆتىڭ قارماعىنا ىلىككەن. ال ەڭ العاشقى كوكسەركەنى ۆاسيلي سۋسلوۆ اۋلاسا, ەڭ كىشكەنتاي بالىق الماتى وبلىسىنىڭ تۇرعىنى جومارت سارسەنبەكوۆتىڭ قارماعىنا ءتۇسىپتى.
اتاپ وتسەك, اۋلانعان ەڭ ءىرى الابۇعا بالىعىنىڭ سالماعى 500 گراممنان اسسا, ەڭ كىشكەنەسىنىڭ سالماعى – 85 گرامم. جەڭىمپازدار مەن جۇلدەگەرلەرگە اۋدان اكىمدىگىنىڭ العىسحاتى مەن تۋرنيرگە دەمەۋشىلىك كورسەتكەن «پريچال» دۇكەنى مەن «نيك ويل» جشس مەكەمەسىنىڭ ارنايى سىي-سياپاتتارى تابىس ەتىلدى.
جالپى, مۇز استى بالىق اۋلاۋ ءتۋرنيرى الاكول جاعالاۋىندا بيىل العاش رەت وتكىزىلىپ وتىر. بۇل ءىس-شارا سالاماتتى ءومىر سالتىن ناسيحاتتاۋ, الاكول كولىنە دەگەن حالىقتىڭ ىقىلاسىن ارتتىرۋ ماقساتىندا جۇزەگە اسقان. قاتىسۋشىلاردىڭ قىزىعۋشىلىعىنىڭ كوپتىگىنە بايلانىستى تۋرنير الداعى جىلدارى دا جالعاسادى دەگەن جوسپار بار.
جەتىسۋ وبلىسى
