ءيا, 1968 جىلى ەكرانعا شىققان شاكەن ايمانوۆتىڭ «تاقيالى پەرىشتە» ءفيلمى كوپتىڭ كوزايىمىنا اينالدى. ارادا جارتى عاسىردان ارتىق ۋاقىت وتسە دە, تۋىندىنىڭ كورەرمەنى كوبەيمەسە, تيتتەي ازايعان ەمەس. ءتىپتى قايتالاپ كورەتىن كورۋشىسىنىڭ ءوزىن العاش تاماشالاپ وتىرعانداي تاڭعاجايىپ اسەرگە بولەپ, ەكران الدىنان تاپجىلتپايتىن كومەديانىڭ بار قۇپياسى ونىڭ شىنايىلىعىندا جاتسا كەرەك.
ءبىرى بىلسە, ءبىرى بىلمەس, تانا اپا – كسرو حالىق ءارتىسى ءامينا ومىرزاقوۆا ءۇشىن ارنايى جازىلعان ءرولدىڭ ءبىرى. ونى شاكەن ايمانوۆتىڭ: ء«اميناجان, مەن ادەيىلەپ تۇرىپ ساعان ستسەناري جازدىم. بۇل – كومەديالىق تۋىندى. باستى رولدە سەن وينايسىڭ. وسى كۇلكىڭنەن ايىرىلما!» دەپ جازعان حاتى دا راستايدى.
شىنىمەن دە, فيلمدەگى ءامينانىڭ كۇلكىسى – كينونىڭ كوركىن اشقان ۇتقىر كادرلاردىڭ ءبىرى. سول عاجايىپ كۇلكىسىمەن, سول شىنايى بەينەسىمەن كوپ ەسىندە ماڭگىلىك جاتتالعان اكتريسا ەكرانداعى كۇللى انالاردىڭ ەتالونىنا اينالعانداي.
ءبىر قىزىعى, ايتۋلى فيلم ەشقانداي دايىندىقسىز ءتۇسىرىلدى. كوپ ىشىنەن تالاسسىز تاڭدالعان اكتريسا شاكەن ايمانوۆقا جالعىز-اق ءوتىنىش ايتادى. ول ستسەناريدىڭ قازاقشا ءماتىنى ەدى. بىراق پايىم-پاراساتى ەرەكشە رەجيسسەر: «ەشتەڭە ەتپەس, بۇعان دەيىن دە ورىسشا فيلمدەردە وينادىڭ عوي. وسى جولى دا وينايسىڭ», دەپ كەسىپ ايتقانىمەن, اميناعا: «باستى ءرولدى قالاي سومداعىڭ كەلەدى, سولاي وينا!» دەپ تولىقتاي ەركىندىك بەرەدى. وسىلايشا, ومىرزاقوۆا فيلمدەگى تانا اپانىڭ بەينەسىن ءوزى جانىنان شىعارىپ ويناپ, كەيىپكەرىنە ولمەس ءومىر سىيلادى. ال كۇلكىسى كلاسسيكاعا اينالدى.
دەسە دە ساحنا مەن ەكراندا كەمەلدىگى كەلىسكەن كەرەمەت بەينەلەردى كەيىپتەپ, ەسىمى اڭىزعا اينالعان اكتريسانىڭ ءا دەگەننەن ونەر الەمىندەگى جولى اشىق بولدى دەسەك, قاتەلەسەمىز. تەڭدەسسىز تانا بەينەسىنە دەيىن ونەردىڭ تالاي كەدىر-بۇدىرىن كورىپ, ساياساتتىڭ سالقىنىن سەزدى. لەنينگراد مەملەكەتتىك تەاتر ينستيتۋتىن ويداعىداي ءتامامداپ, تاباقتاي ديپلومىمەن الىپ-ۇشىپ الماتىعا كەلگەن كەزدە ونى حالىق جاۋى اتانىپ, جازىقسىز جازالانعان اعاسى ءۇشىن ەشكىم جۇمىسقا قابىلدامادى. ال جانى ونەردەن الىس كەتە الماعان اكتريسا امالسىز كينوستۋديانىڭ مونتاج بولىمىنە جۇمىسقا ورنالاسۋعا ءماجبۇر بولدى. بىراق ءبىر عانا ءسات ومىرزاقوۆانىڭ ءومىرىن تۇبەگەيلى وزگەرتەدى. ول ءامينانىڭ ايگىلى رەجيسسەر گريگوري روشالمەن كەزدەسۋى ەدى.
وقيعا بىلاي بولىپتى. 1945 جىلى گريگوري روشال «اباي اندەرى» دەپ اتالاتىن كارتينانى تۇسىرۋگە كىرىسەدى. ۇمىتكەرلەردى ىرىكتەۋ باستالعان. باستى رولدەن ەكى ۇمىتكەر دامەلى. ءبىرى – شارا جينەقۇلوۆا بولسا, ەكىنشىسى – نۇرسۇلۋ تاپالوۆا. بىراق اتاقتى كينورەجيسسەر بىردە كينوستۋديادا جۇرگەن كوزى وتكىر كورىكتى قىزدى كورەدى. ول ءامينانىڭ «قاھارلى يۆان» ءفيلمىنىڭ مونتاجىمەن الەك بولىپ جاتقان كەزى بولسا كەرەك. «مۇنداي وتكىر كوز شۇباتىلعان كينوتاسپالارعا تەسىلە قاراپ, ولاردى قيىپ, جەلىمدەۋ ءۇشىن جاراتىلماعان. بۇل كوز كينو ءۇشىن جارالعان», دەپ تۇيەدى. ءسويتىپ, رەجيسسەر ونىڭ سۋرەتىن بىردەن ستسەناري اۆتورى مۇحتار اۋەزوۆكە كورسەتەدى. ءسوز زەرگەرى سۋرەتتەگى بەينەنى جاقتىرماي: «ماناۋىڭ ءتىپتى پۇشىق مۇرىن عوي», دەپ جاراتپايدى. سول كەزدە رەجيسسەر فوتوداعى ءامينانىڭ بەتىن قولىمەن باسىپ, كوزىن عانا اشىق قالدىرادى دا: «بىزگە مۇرىن ەمەس, كوز كەرەك», دەيدى. وسىلايشا, كوركەمدىك كەڭەس ءامينانى جاڭا كارتينانىڭ باستى ءرولىن سومداۋعا بەكىتەدى. ول ءساتتى اكتريسانىڭ ءوزى بىلايشا ەسكە الادى:
«مەنىڭ مۇرنىمدى ارنايى قاراشىرىكپەن قاتىرىپ تاستادى. تەك كامەرا تۇسىرەتىن كەزدە عانا سويلەۋگە رۇقسات بەرىلگەن. قالعان كەزدە سويلەۋگە بولمايدى. ءتىپتى تاماق ىشە الماي, كۇنى بويى اش ءجۇردىم. سەبەبى اۋزىڭدى قيمىلداتساڭ بولدى, جاساپ قويعان مۇرنىڭ شىتىناپ كەتەدى».
ونەر الەمىنە كەلۋ جولى وسىنداي ءتۇرلى قيىندىققا تولى بولعانىنا قاراماستان, اكتريسا «اباي اندەرى» ءفيلمىنىڭ باستى كەيىپكەرىنىڭ كىلتىن اداسپاي تاپتى. كينوداعى مىندەتىن ءمىنسىز اتقارىپ شىققان سوڭ, ول كورەرمەنىنە ۇناپ, ءامينا ومىرزاقوۆا ەسىمى كوپشىلىككە تانىلدى. بۇل ءرول اكتريسانى ۇلكەن جەتىستىكتەرگە باستادى. ونىڭ ونەرىنە كوپتەگەن رەجيسسەرلەر ءتانتى بولدى. وسىلايشا, كينو مەن ساحنا اكتريسا ءومىرىنىڭ اجىراماس بولىگىنە اينالدى. «اباي اندەرىنەن» كەيىنگى تۋدىرعان «انا تۋرالى اڭىز», «تاقيالى پەرىشتە», «گاۋھارتاس», «ماما روزا» سىندى كارتينالاردىڭ بارلىعى دا بۇگىندە قازاق كينەماتوگرافياسىنىڭ قۇندى قازىناسى. ال ومىرزاقوۆانىڭ ءوزى بولسا, شىنايىلىعىمەن شىعارماشىلىقتىڭ شىڭىن باعىندىرىپ, كەرەمەت كۇلكىسىمەن اڭىزعا اينالدى.
