سالتاناتتى جيىنعا رايحان قاليولدينا, راحمان وماروۆ, مارال اناربەك, اسىلبەك بورانباەۆ سىندى بەلگىلى ونەر مايتالماندارى جانە ت.جۇرگەنوۆ اتىنداعى كوللەدج ستۋدەنتتەرى مەن ءال-فارابي اتىنداعى №145 مەكتەپ-گيمنازياسىنىڭ ۇستازدارى مەن وقۋشىلارى قاتىستى.
تالانتتى رەجيسسەر شاكەن ايمانوۆ ءوز حالقىمەن ءوز وتانىنىڭ ونەر جولىنداعى الاتاۋداي اقيىق مۇراگەرى رەتىندە ەسىمى تاريحتا قالعان تۇلعا. ونىڭ شىعارماشىلىق تۇلعاسىنىڭ قالىپتاسۋىنا قازاق ونەرىنىڭ قارا شاڭىراعى – قازاق دراما تەاترىنىڭ ساحناسىندا شىڭدالعان, تولىسقان جىلدار تەرەڭ ءىز قالدىردى.
«ايمانوۆتىڭ العاشقى ۇستازدارى, تالىمگەرلەرى – اعا بۋىن ارىپتەستەر, اتاقتى اكتەرلەر قاليبەك قۋانىشباەۆ, ەلۋباي ومىرزاقوۆ, سەركە قوجامقۇلوۆ, قۇرمانبەك جانداربەكوۆتەر بولدى. رەجيسسەرلىك جۇمىستارىنىڭ جانرلىق, تاقىرىپتىق اۋماعىنا ۇڭىلسەك, ونىڭ كەڭ اۋقىمدى, الۋان ءتۇرلى ەكەنىن بايقايمىز. اتاپ ايتقاندا, ء«بىزدىڭ سۇيىكتى دارىگەر», «تاقيالى پەرىشتە», «الدار كوسە» حالىقتىق كينوكومەديالارى, ءوز داۋىرىندە كورەرمەننىڭ ىستىق ىقىلاسىنا بولەنسە, ء«بىر اۋداندا», ء«بىز وسىندا تۇرامىز» كينوحيكاياتتارى قالىڭ كورەرمەندەرىنىڭ كوز قۋانىشىنا اينالعان ەدى», دەپ ەسكە الدى كەش قوناقتارى.
ەسكە الۋ كەشىندە, ش.ايمانوۆتىڭ ءىزىن جالعاپ كەلە جاتقان ساحنا ساڭلاقتارى ايتۋلى تۇلعانىڭ بولمىسى جايىندا, ۇلى رەجيسسەردىڭ كاسىبي شەبەرلىگى, ۇيىمداستىرۋشىلىق قابىلەتى, ادامي قاسيەتتەرى جونىندە, سونىمەن قاتار, وزدەرىنىڭ ونەر جولىنا كەلۋ جولىن دا كەڭىنەن ءسوز ەتتى.
تالانتتى اكتەر اسىلبەك بورانباي شاكەن كەنجەتاي ۇلىنىڭ ومىردە ەشكىمگە ۇقسامايتىن, اشىق-جارقىن, ەرەكشە جومارت ادام بولعانىن, جۇرتپەن ارالاسقاندى, كەز كەلگەن جيىلىستىڭ اياعىن كىشىگىرىم تويعا, ويىن-ساۋىققا اينالدىرىپ جىبەرەتىن قاسيەتتەرىن باسا ايتتى.
كەزدەسۋ سوڭىندا ستۋدەنتتەر مەن وقۋشىلار تاراپىنان كەش قوناقتارىنا سۇراقتار قويىلىپ, ادەمى جاۋاپتاردىڭ كۋاسى بولدىق.
كەش سوڭىندا كىتاپحانا مەڭگەرۋشىسى جانار جايىققىزى قوناقتارعا سىيلىقتار تابىستادى.
