زەينەتاقى قاراجاتى «air astana» اكتسياسىنا جۇمسالدى

«قازاقستاننىڭ جوعارى ساپالى ەميتەنتتەرىنىڭ جاي اكتسيالارىن ساتىپ الۋ بجزق زەينەتاقى اكتيۆتەرىنىڭ ينۆەستيتسيالىق پورت­فەلىن ارتاراپ­تان­دىرۋعا با­عىتتالدى جانە ۇزاق­مەر­زىمدى پەرسپەكتيۆادا ونىڭ كىرىسىن ارت­تىرۋعا ىقپال ەتەدى. بجزق زەي­نەتاقى اكتيۆتەرىن «Air Astana» اق-نىڭ جاي اكتسيالارىنا ينۆەستي­تسيا­لاۋ تۋرالى شەشىم تۇراقتى قار­جى­لىق كورسەتكىشتەرگە, سونداي-اق بولاشاقتا تۇراقتى ديۆيدەندتەر تولەۋگە مۇمكىندىك بەرەتىن كومپانيا قىز­مەتىنىڭ جوعارى رەن­تابەلدىلىگىنە نەگىزدەلدى. وسى ين­ۆەستيتسيالار ءىس جۇ­زىندە بجزق سا­لىمشىلارىنا ور­تالىق ازيا­نىڭ اۆياتسيالىق نارى­عىن­داعى كوش­باس­شىلاردىڭ بىرىنە اكتسيونەر بولۋعا مۇمكىندىك بەرەدى», دەپ ما­لىم­دەيدى ۇلتتىق بانك.

زەينەتاقى اكتيۆتەرىن باسقارۋ نا­تيجەلەرى تۋرالى مالىمەتتەر اي سايىن بجزق سايتىندا جاريالانىپ وتى­رادى.

جالپى, IPO باستالعالى بەرى بير­جا­لارداعى سۇرانىس ۇسىنىستان اسىپ تۇسكەن. ايتا كەتەيىك, «Air Astana» توبى – اكتسيالارى ءبىر مەزگىلدە ءۇش بير­جادا (LSE, KASە مەن AIح) ورنا­لاس­تىر­عان العاشقى قازاقستاندىق كومپانيا. جاريا ورنالاستىرۋ اياسىندا اكتسيا ساتۋشى ءۇش تاراپ: «سامۇرىق-قازىنا» اق, BAE Systems PLC جانە كومپانيانىڭ ءوزى 370 ملن دوللار قارجى تارتىپتى. ءسويتىپ, «Air Astana» 15 اقپان كۇنى IPO-نى اياقتادى.

جەكە ينۆەستورلاردان تۇسكەن وتى­نىم­­دەردىڭ 97,8 پايىزى ماقۇل­دانعان. IPO بارىسىندا كومپانيا قۇنى شامامەن 847 ميلليون دوللاردى قۇرادى. 120 ملن دوللار قارجى ءوسىم­نىڭ كەلەسى كەزەڭىن جەدەلدەتۋ ماق­ساتىنا جۇم­سال­ماق.

«توپتىڭ IPO-عا قاتىسۋ ءۇشىن بەرىلگەن وتى­نىمدەر سانى قازاقس­تان­دىق ينۆەس­تورلار, بولشەك جانە ينستي­تۋتسيونالدىق, سونداي-اق حا­لىق­­ارالىق ينۆەستورلار قاۋىم­داستى­عىنىڭ قول­داۋىنىڭ ارقا­سىن­دا ۇسى­نىستان اسىپ ءتۇستى. ۇسى­نىس­تىڭ 58 پايىزى جەرگىلىكتى نارىقتا, 42 پايىزى حالىقارالىق نارىقتا ورنالاستىرىلعان. وتاندىق نارىقتاعى جالپى سۇرانىس 483 ملن دوللاردان استى. جەكە ينۆەس­تورلار جالپى سوماسى 216 ملن دوللارعا 60 مىڭعا جۋىق ءوتىنىم بەرىپ, سۇرانىستىڭ شامامەن 53 پايىزى قاناعاتتاندىرىلدى», دەلىن­گەن حابارلامادا.

جەرگىلىكتى ينستيتۋتسيونالدىق ينۆەستورلار (بجزق-نى قوسا العاندا) جالپى سۇرانىستىڭ شامامەن 38 پا­­­يىزىن قامتاماسىز ەتكەن. ال حا­لىق­ارالىق ينۆەستورلارعا جالپى سۇ­رانىستىڭ 25 پايىزى تيەسىلى. 1 جاھان­دىق دەپوزيتارلىق قولحاتتىڭ باعاسى – 9,5 دوللاردى, ال 1 جاي اكتسيا ءۇشىن 1 073,83 تەڭگەنى قۇرادى.

«سامۇرىق-قازىنا» اق باسقارما توراعاسى نۇرلان جاقىپوۆتىڭ ايتۋىن­شا, جەرگىلىكتى جانە حالىقارالىق ينستيتۋتسيونالدىق ينۆەستورلار, سونداي-اق بولشەك ينۆەستورلار تاراپىنان ۇلكەن سۇرانىس تۋىندادى. بۇل اۋە كومپانياسىنىڭ جانە جالپى قازاقستان ەكونوميكاسىنىڭ جوعارى ينۆەستيتسيالىق تارتىمدىلىعىن, سونداي-اق «Air Astana» دامۋ الەۋەتىنە جەرگىلىكتى جانە حالىقارالىق نارىق­تار­دىڭ سەنىمىن بىلدىرەدى دەيدى.

بۇعان دەيىن ەۋروپالىق قايتا قۇرۋ جانە دامۋ بانكى «Air Astana» اكتسيا­سىنىڭ 5 پايىزىن ساتىپ الىپ, اكتسيونەر اتانعان ەدى. ولار IPO شەڭ­بەرىندە قازاقستاندىق اۋە تاسى­مال­داۋشىسىنىڭ باعالى قاعاز­دارىنا 41,99 ملن دوللار ينۆەستيتسيا قۇيعان.

IPO قورىتىندىسى بو­يىن­شا, اۋە كوم­­پانياسىنداعى «سامۇرىق-قازىنانىڭ» ۇلەسى 51-دەن 41 پايىزعا, ال BAE Systems PLC-ءتىڭ ۇلەسى 49-دان 15,3 پايىزعا تومەندەگەن.

قارجى ساراپشىسى اندرەي چەبو­تارەۆ­تىڭ ايتۋىنشا, «Air Astana» KASE بيرجاسىندا 49,2 ملرد تەڭگە تارتقان.

«ولاردىڭ كەم دەگەندە جارتىسى زەينەتاقى قاراجاتى ەكەنى بەلگىلى بولدى. ال ەندى تسيفرلارعا ءمان بەرىپ كورەيىك. «Air Astana» ەكى بىردەي قازاقستاندىق بيرجادان 215 ملن دوللار تارتا الدى, ونىڭ 108,9 ملن دوللارىن (جاڭاعى ايتقان 49,2 ملرد تەڭگەمىز) KASE-دەن تارتتى, سونىڭ ىشىندە 55,4 ملن دوللارى – زەينەتاقى قاراجاتى. AIX بيرجاسى ارقىلى جاي اكتسيالار مەن GDR ەسەبىنەن 106,1 ملن دوللار تاپتى. KASE-گە قاراعاندا AIX بيرجاسىندا جەكە ينۆەستورلار مەن مەملەكەتتىك ەمەس ينستيتۋتسيونالدىق ويىنشىلاردىڭ ناقتى سۇرانىسىنىڭ جوعارى بولعانى تاڭعالدىرادى. ال قازاقستاننىڭ ەسكى بيرجاسىنداعى نەگىزگى كولەمنىڭ باسىم بولىگى بجزق ەسەبىنەن قالىپتاستى. ال بجزق-نى KASE-ءنىڭ 46,9 پايىزىن يەلەنەتىن ۇلتتىق بانك باسقارادى», دەپ دەرەك كەلتىرەدى ساراپشى.