سۋرەتتى تۇسىرگەن – ەرلان ومار, «EQ»
ماسەلەنىڭ جاي-جاپسارىن ءماجىلىس دەپۋتاتى اسحات ايماعامبەتوۆ الەۋمەتتىك جەلىدەگى پاراقشاسىنا جاريالادى.
«مۇعالىمدەردىڭ كوبى ءمامس-كە تۇراقتى جارنا تولەپ وتىرسا دا مىندەتتى مەديتسينالىق ساقتاندىرۋ جۇيەسى اياسىندا مەديتسينالىق كومەك الۋعا كەلگەندە كەدەرگىگە تاپ بولىپ جاتىر. مۇنىڭ سەبەبى – جازدا, ءۇش ايلىق دەمالىس كەزىندە كەيبىر بۋحگالتەرلەر جالاقىنى جانە ءمامس بويىنشا ءتيىستى جارنانى ءبىر اۋدارىممەن اۋدارادى. بۇل ءوز كەزەگىندە ءمامس-ءتىڭ بيۋروكراتيالىق تيىمسىزدىگىنەن مۇعالىمدەردى ساقتاندىرىلعان ازاماتتار دەگەن مارتەبەسىنەن ايىرىپ, مەديتسينالىق كومەكتىڭ قولجەتىمسىزدىگىنە الىپ كەلدى. ءبىز بۇعان دەيىن دەنساۋلىق ساقتاۋ مينيسترلىگىنە وسىنى تەز ارادا رەتتەۋ تۋرالى تالاپ قويعانبىز. بولاشاقتا بۇل ماسەلەنى شەشەمىز دەپ سەنەمىن», دەيدى دەپۋتات.
جىل بويى ءمامس-كە جارناسىن تولەپ كەلگەن مۇعالىمدەر وقۋ جىلى باستالاردا وسىنداي كەدەرگىگە تاپ بولادى ەكەن. سەبەبى ءبىر – جارنا تولەمەگەن. ءبىر قىزىعى, بىرەر اپتا بۇرىن, ياعني جەلىدەگى جازباعا دەيىن الەۋمەتتىك مەديتسينالىق ساقتاندىرۋ قورى ۇزاقمەرزىمدى دەمالىس كەزىندە قىزمەتكەرلەردى ساقتاندىرۋعا كەپىلدىك بەرۋ ءۇشىن جۇيەگە تاعى وزگەرىستەر ەنگىزىلەتىنىن جاريالاعان. حابارلامادان الەۋمەتتىك مەديتسينالىق ساقتاندىرۋ قورىندا بەيىندىك نورماتيۆتىك-قۇقىقتىق اكتىگە تولىقتىرۋ ەنگىزۋ ۇسىنىلعانىن بىلدىك. بۇل – ۇزاقمەرزىمدى دەمالىس كەزىندە قىزمەتكەرلەردىڭ ءمامس-تەن شىعىپ قالماۋىنا سەپتەسەدى ەكەن.
نەگىزى «مىندەتتى الەۋمەتتىك مەديتسينالىق ساقتاندىرۋ تۋرالى» زاڭعا سايكەس جۇمىس بەرۋشى اي سايىن الەۋمەتتىك مەديتسينالىق ساقتاندىرۋعا قىزمەتكەرى ءۇشىن جارنا تولەۋگە ءتيىس. ال ەگەر جۇيەگە ءبىر اي اۋدارىم تۇسپەسە, ول قىزمەتكەر ءمامس جۇيەسىندەگى «ساقتاندىرىلعان» مارتەبەسىنەن ايىرىلادى. سالدارىنان ەلىمىزدىڭ بىرنەشە وڭىرىندە مۇعالىمدەر, تاۋ-كەن كاسىپورىندارىنىڭ قىزمەتكەرلەرى جانە ۆاحتالىق ادىسپەن جۇمىس ىستەيتىن كەيبىر ماماندار وسى كەلەڭسىزدىككە ۇرىنادى ەكەن.
كوپتىڭ جادىندا جۇرگەن ماسەلەنى شەشۋدى ويلاستىرعان الەۋمەتتىك مەديتسينالىق ساقتاندىرۋ قورى بىلتىر جەلتوقساندا دەنساۋلىق ساقتاۋ ءمينيسترىنىڭ ءمامس-كە اۋدارىمداردى نەمەسە جارنالاردى اۋدارۋ ەرەجەلەرى مەن مەرزىمدەرى تۋرالى بۇيرىققا تولىقتىرۋ ەنگىزۋگە باستاماشى بولىپتى. مۇندا الەۋمەتتىك مەديتسينالىق ساقتاندىرۋ قورى قۇجاتتىڭ ماتىنىندە اقىلى ەڭبەك دەمالىسى كەزەڭىندەگى تابىستى ەسەپتەۋ كەزىندە اۋدارىمدار مەن جارنالار دەمالىس كۇندەرىنىڭ سانىنا بارابار ەسەپتەلگەن كەزەڭدەر بويىنشا بولەك اۋدارىلاتىنىن ناقتىلاۋدى ۇسىنعان. قازىر قوردىڭ ۇسىنىسى ۋاكىلەتتى ورتالىق – مەملەكەتتىك ورگانداردىڭ قاراۋىندا ەكەن. ەندى كوپ ۇزاماي وسى تولىقتىرۋدى قابىلداۋ تۋرالى وڭ شەشىم شىقسا, ۇزاقمەرزىمدى دەمالىستان كەيىن «ساقتاندىرۋ» مارتەبەسىنەن قاعىلعان مۇعالىمدەردىڭ عانا ەمەس, باسقا بىرنەشە سالا مامانىنىڭ ماسەلەسى شەشىلەدى-مىس.
