ار ادامعا قانداي قىمبات بولسا, اق ورامالدىڭ كۇشى دە ودان كەم بولماعان, الماس قىلىشتى ءامىرشىنىڭ ءوزىن تەجەپ, تىزە بۇكتىرگەنى تۋرالى اڭىز-ءاپسانالار شىندىعىنا كۇنى بۇگىنگە دەيىن كىرەۋكە تۇسكەن ەمەس.
ورامالدى جاڭا تۇسكەن كەلىن تاقسا, ۋاقىت وتە كەلە بالالى بولىپ, ءسابيدى قىرقىنان شىعاراردا اۋىل اجەلەرى مەن ابىسىندارى جيىلىپ كەلىپ, «ەل اناسى بولدىڭ» دەپ كەلىننىڭ باسىنا كەستەلى كيمەشەك كيگىزگەن. كيمەشەك – ايەلدىڭ الەۋمەتتىك مارتەبەسىن, بيىكتىگى مەن سالتاناتىن كورسەتكەن. ونىڭ وزىندىك تىگۋ ءتاسىلى, كيۋ مىندەتى بار. ماسەلەن, كيمەشەك يىق, ارقا, كەۋدە مەن باستى تۇتاس جاۋىپ تۇرادى. ءتىپتى رەسپۋبليكامىزدىڭ ءار وڭىرىندە «بۇراما جاۋلىق», «يەكشە» دەگەن ءارتۇرلى اتاۋمەن دە كەزدەسەدى. كيمەشەك ەل مەن جەردىڭ قونىستانۋ ەرەكشەلىگىنە قاراي ءارتۇرلى تاسىلمەن تىگىلەدى. سولتۇستىك جانە ورتالىق قازاقستاندا كيمەشەكتىڭ الدىڭعى جاعى تراپەتسيا تارىزدەس بولعان. قوڭىراتتار ەلىندە توبەسى تولىق تىگىلمەي, الدىنان تىك بۇرىشتى ماتا جىبەرەدى. شىعىس قازاقستان وڭىرىندە كيمەشەكتىڭ ارتقى جاعى قىسقالاۋ بولسا, باتىس ايماقتاردا بۇرمەلى كيمەشەك بولعان. ونىڭ الدىڭعى جاعى تۋرا بۇرىشتالىپ, تومەنگى ۇزىندىعى كەۋدەگە ءتۇسىپ تۇرعان.
قازىرگى تاڭدا كوپ كيىلە بەرمەيتىن كيمەشەكتىڭ تاريحى, تاعىلىمى, وزىندىك ايىرماشىلىعى بار. وسىنى دارىپتەۋ ماقساتىندا الماتى وبلىسىنىڭ مادەنيەت, ارحيۆتەر جانە قۇجاتتاما باسقارماسىنا قاراستى «الماتى وبلىسىنىڭ مۋزەيلەر بىرلەستىگى» اياسىندا قۇرىلعان «اناعا قۇرمەت» مۋزەيىندە حالىقارالىق ورامال كۇنىنە وراي «انامنان قالعان اق جاۋلىق» اتتى مەرەكەلىك مادەني-تانىمدىق ءسان كورمەسىن وتكىزدى. كورمەگە «ZARATA» ۇلتتىق كيىمدەر برەندىنىڭ اۆتورى ءلاززات يساحانوۆا, رەسپۋبليكالىق ورامالدار كونكۋرسىنىڭ جۇلدەگەرى مارجان ءامىرتاي, سۋرەتشى مايسا ىقىلاس, «اناعا قۇرمەت» مۋزەيىنىڭ ۇيىمداستىرۋشىسى باقىت جاتقىنبايقىزى جانە باسقا دا سۋرەتشى-ديزاينەرلەر قاتىستى
الماتى
