ازىرگە باعدارلامانىڭ شارتتارى تۋرالى ەگجەي-تەگجەي مالىمەت جوق. دەگەنمەن اتى ايتىپ تۇرعانداي, پايىزدىق مولشەرلەمەسى – جىلدىق 9 پايىز, نەسيەلەۋ مەرزىمى – 25 جىل. يپوتەكاعا قاتىسقىسى كەلگەن ازامات ءۇي قۇنىنىڭ 20 پايىزى مولشەرىندە العاشقى تولەم جاساۋى كەرەك. باعدارلاما جاس وتباسىلارعا ارنالۋى مۇمكىن. بىراق ناقتىلى جاس شەكتەۋى تۋرالى اقپارات جوق.
وسىعان دەيىن باعدارلاما قاتىسۋشىلارىنىڭ قاتاڭ تەكسەرىلەتىنى ايتىلعان بولاتىن. باعدارلامانىڭ نەگىزگى شارتى – ۇمىتكەردىڭ سوڭعى بەس جىل كولەمىندە اتىندا باسپاناسى بولماۋعا ءتيىس.
«9-20-25» باعدارلاماسى بويىنشا ءوتىنىم بەرۋ كەزىندە ۇمىتكەردىڭ اتىندا سوڭعى بەس جىلدا باسپانا تىركەلمەگەن بولۋى كەرەك. ءبىز مۇنى مەملەكەتتىك دەرەكتەر بازاسى ارقىلى تەكسەرەمىز. «7-20-25» باعدارلاماسىنداعىداي – العان پاتەرىڭدى بۇگىن ساتىپ جىبەرىپ, ەرتەڭ مەملەكەتتىك باعدارلامامەن تاعى دا ءوتىنىم بەرۋ ارەكەتتەرى ىسكە اسپايدى. سونىمەن قاتار جاڭا باعدارلاما بويىنشا ءبىر رەت قانا ءوتىنىم بەرىلەدى. «7-20-25» باعدارلاماسىندا قاتىسۋ بويىنشا شەكتەۋ بولعان جوق. ياعني 2019 جىلى پاتەر ساتىپ العان ازامات باعا وسكەنىن پايدالانىپ مۇلكىن ساتىپ, 2021 جىلى تاعى دا قاتىسۋعا مۇمكىندىك الاتىن. ەندى جاڭا باعدارلامادا مۇندايعا تىيىم سالىنادى», دەيدى «وتباسى بانك» باسشىسى ءلاززات يبراگيموۆا.
ول باعدارلامانىڭ جۇمىس ىستەپ جۇرگەن جاستارعا ارنالاتىنىن مەڭزەدى. بىراق جاس بويىنشا, جۇمىس ىستەيتىن ورنى بويىنشا شەكتەۋدىڭ بار-جوعىن ايتپادى. تەك انىعى – پاتەردى دايىن ۇيلەردەن عانا ەمەس, «قازاقستان تۇرعىن ءۇي كومپانياسىنىڭ» كەپىلدىگى بار سالىنىپ جاتقان قۇرىلىستاردان دا راسىمدەۋگە مۇمكىندىك قاراستىرىلادى.
باعدارلاماعا رەسپۋبليكالىق بيۋدجەتتەن 150 ملرد تەڭگە بولىنەدى. ءبىر جىلدا شامامەن 8 مىڭ ادام باسپانالى بولادى دەپ كۇتىلىپ وتىر.
