بيىل وبلىستا 873,6 مىڭ گەكتارعا اۋىل شارۋاشىلىعى داقىلدارىن ەگۋ جوسپارلانعان. وڭىردە سۋدى از قاجەت ەتەتىن ءونىم تۇرلەرىن ەگۋگە باسىمدىق بەرىلمەك. بۇل ورايدا ماساقتى داقىلداردىڭ ەگىس كولەمى وتكەن جىلمەن سالىستىرعاندا ارتىپ وتىر. ءداندى داقىلدار 335 مىڭ گەكتار جەرگە, بۇرشاقتى داقىل – 3,8 مىڭ, تەحنيكالىق داقىلدار – 105,3 مىڭ, ال كوكونىس 44,9 مىڭ گەكتارعا ەگىلمەك. ماقتا مەن مايلى داقىلدار وتكەن جىلمەن سالىستىرعاندا 6,4 مىڭ گەكتارعا قىسقارتىلىپ, سايكەسىنشە – 105, جانە 75,5 مىڭ گەكتارعا ورنالاستىرىلادى. بۇگىندە ەرتە پىسەتىن قىرىققابات داقىلى 0,5 مىڭ گەكتارعا ەگىلدى. كوكتەمگى دالا جۇمىستارىن جۇرگىزۋگە قولدا بار تەحنيكالاردىڭ دايىندىعى – 95%, 21,8 مىڭ توننا جانارماي ءبولىندى. 1382 كومباين, تراكتور جانە قوسىمشا قۇرال-جابدىقتار ساتىپ الىنعان. جالپى وبلىستا 24 مىڭعا جۋىق اۋىل شارۋاشىلىعى تەحنيكاسى بار. جەر ايداۋ جۇمىستارى – 79, سور شايۋ جۇمىستارى 56 پايىزعا ورىندالعان. تاۋار وندىرۋشىلەر جازدىق داقىلداردىڭ تۇقىمىمەن تولىق قامتاماسىز ەتىلگەن. ەگىسكە قاجەتتى 7,8 مىڭ توننا ماساقتى داقىل, 1,5 مىڭ توننا ماقسارى, 3,4 مىڭ توننا ماقتا, 0,5 مىڭ توننا جوڭىشقا جانە 0,9 مىڭ توننا جۇگەرى تۇقىمدارى بار. ال كارتوپ تۇقىمدارى كوممەرتسيالىق ۇيىمداردان الىنىپ جاتىر. وبلىس اكىمدىگىنىڭ مالىمەتىنە سۇيەنسەك, وڭىردە 500 ءتۇرلى مينەرالدى تىڭايتقىش قۇنىنىڭ 50%-ىن سۋبسيديالاۋعا 7 ملرد تەڭگە بولىنگەن. ياعني 82,3 مىڭ توننا مينەرالدى تىڭايتقىش سۋبسيديالانادى. بۇگىندە وبلىس اۋماعىنداعى قويمادا 25,0 مىڭ توننا مينەرالدى تىڭايتقىش ساقتاۋلى. سونداي-اق باسىم داقىلداردىڭ ءوندىرىسىن دامىتۋدى سۋبسيديالاۋ باعدارلاماسىنا رەسپۋبليكالىق بيۋدجەتتەن قوسىمشا 5 ملرد تەڭگە ءبولۋ ۇسىنىلعان. تۇقىم شارۋاشىلىعىن قولداۋ باعدارلاماسىنا 600 ملن تەڭگە وبلىستىق بيۋدجەتتەن قارالعان. اعىن سۋ جەتكىزۋ قۇنىن سۋبسيديالاۋعا 150 ملن تەڭگە ءبولىندى. كوكتەمگى دالا جۇمىستارىن جۇرگىزۋگە «اگرارلىق نەسيە كورپوراتسياسى» اق ارقىلى 13,4 ملرد تەڭگە قارجى ءبولۋ جوسپارلانعان. ونىڭ ىشىندە «كەڭ دالا» باعدارلاماسىمەن 10,0 ملرد تەڭگە, تىكەلەي زاۋىتتارعا 2,5 ملرد تەڭگە جانە نەسيە سەرىكتەستىكتەرى ارقىلى 868,0 ملن تەڭگە بولىنەدى. ناتيجەسىندە, 68,0 مىڭ گەكتار القاپتاعى دالا جۇمىستارى قارجىلاندىرىلادى.
سونداي-اق وبلىستا ماقساتىنا ساي پايدالانباعان جانە زاڭسىز جەكەشەلەنگەن جەرلەردى ورتاق قورعا قايتارۋدا اۋقىمدى جۇمىستار جۇرگىزىلىپ, 330,7 مىڭ گەكتار مەملەكەت مەنشىگىنە قايتارىلدى. وبلىستىڭ جالپى جەر قورى – 11 610,3 مىڭ گەكتار. ونىڭ ىشىندە اۋىلشارۋاشىلىق ماقساتتارى ساناتىنداعى پايدالاناتىن جەرلەر 4 469,5 مىڭ گەكتارعا جەتتى. ەلدى مەكەندەردىڭ جەرلەرى 800 مىڭ گەكتاردان اسادى. وبلىستىق جەر قاتىناستارى باسقارماسىنىڭ باسشىسى ەرعالي تىلەگەننىڭ بايانداۋىنشا, وتكەن جىلى اۋىل شارۋاشىلىعى ماقساتىنداعى 131,8 مىڭ گەكتار جەر اينالىمعا ەنگىزىلدى. بىلتىر ورتاق جايىلىم قاجەتتىلىگى 2 122,2 مىڭ گەكتاردان اسقان. وسىعان وراي, وبلىس اكىمى دارحان ساتىبالدىنىڭ تاپسىرماسىنا سايكەس ورتاق جايىلىم كولەمىن 1015,0 مىڭ گەكتارعا ۇلعايتۋ جوسپارى بەكىتىلگەن. ناتيجەسىندە وتكەن جىلدىڭ قورىتىندىسىمەن 335 مىڭ گەكتار ورتاق جايىلىممەن قامتاماسىز ەتىلدى. جالپى ورتاق جايىلىم قاجەتتىلىگىنەن 681,8 مىڭ گەكتار تومەندەتۋ بويىنشا ۇيىمداستىرۋ جۇمىستارى جۇرگىزىلىپ, 937 مىڭ گەكتار تومەندەتىلدى. ورتاق جايىلىم كولەمىن ۇلعايتۋ ماقساتىندا ارنايى قورداعى 125 مىڭ گەكتار جەر ۋچاسكەلەرىن اۋىلدىق وكرۋگ اكىمى اپپاراتىنا تۇراقتى پايدالانۋعا بەرۋ جۇمىستارى جۇرگىزىلەدى. اۋىل شارۋاشىلىعى ماقساتىنداعى جەرلەردىڭ ۇلەسىن ۇلعايتۋ جوسپارى بەكىتىلىپ, 146,9 مىڭ گەكتار جەردى قايتا اينالىمعا ەنگىزۋ كوزدەلىپ وتىر.
تۇركىستان وبلىسى
