سۋرەت دەنساۋلىق ساقتاۋ مينيسترلىگىنىڭ سايتىنان الىندى
دارىگەرلەر 36 جاستاعى پاتسيەنتكە كوپ ءتۇيىندى ەۋتيرەويدتى زوب ء(تۇيىننىڭ مولشەرى 5 سم-دەن اسا) دياگنوزىن قويعان. وپەراتسيانى جۇرگىزۋگە ينستيتۋت باسشىلىعى استانا قالاسى ۇلتتىق عىلىمي مەديتسينالىق ورتالىعىنىڭ ينتەرۆەنتسيالىق ونكوراديولوگ دارىگەرى نياز مالاەۆتى شاقىرعان. بىرەگەي از ءينۆازيۆتى وپەراتسياعا كلينيكانىڭ رەنتگەنحيرۋرگتەرى مەن ەندوكرينولوگ دارىگەرلەرى دە قاتىسقان.
تۇسىنىكتىرەك بولۋ ءۇشىن ايتساق, راديوجيىلىكتى ابلياتسيا – ىسىك تىنىنە اسەر ەتۋدىڭ زاماناۋي ادىستەرىنىڭ ءبىرى. مۇنداعى ماقسات – نەوپلازمانى تولىق جويۋ. ناتيجەسىندە, قالقانشا بەزىنىڭ ءتۇيىندى ىسىك جاسۋشالارى كەتەدى. ءتۇيىننىڭ كولەمى كىشىرەيەدى, ۋاقىت وتە ازايادى. ەسەسىنە, وسى كەزدە بەزدىڭ ساۋ تىندەرى زاقىمدانبايدى.
– ەلىمىزدە 2022 جىلدان بەرى قولدانىلىپ كەلە جاتقان راديوجيىلىكتى ابلياتسيا ادىستەمەسى قالقانشا بەزىنىڭ قاتەرسىز تۇيىندىك ىسىكتەرىن ەمدەۋدە جاقسى ناتيجە كورسەتتى. ءتيىمدى ءارى قاۋىپسىز. قالقانشا بەزىنىڭ تۇيىندەرىنىڭ كوپشىلىگى قاتەرسىز جانە سيمپتومسىز. بىراق ۇلكەن تۇيىندەر كوسمەتيكالىق پروبلەمالارمەن قاتار, مويىن اعزالارىنىڭ قىسىلۋ بەلگىلەرىن, اۋىرسىنۋ, ديسفاگيا, ىڭعايسىزدىق تۋدىرىپ, تاماقتىڭ جىبىرلاتىپ, جوتەل شاقىرۋى مۇمكىن, – دەپ تۇسىندىرەدى نياز بەيسەن ۇلى.
راديوجيىلىكتى ابلياتسيا – اسقىنۋ جيىلىگى تومەن قالقانشا بەزىنىڭ قاتەرسىز تۇيىندەرىن ەمدەۋدىڭ قاۋىپسىز ءادىسى. ونى الەمنىڭ دامىعان ەلدەرىنىڭ كوپتەگەن كاسىبي ەندوكرينولوگيالىق قوعامى ۇسىنادى. ۆيزۋالدىق ۋلترادىبىستىق باقىلاۋمەن تەرميالىق راديوجيىلىكتى ابلياتسيا ءادىسى الەمنىڭ دامىعان ەلدەرىندە كەڭىنەن قولدانىلادى. وسى ادىستەن كەيىن پاتسيەنتتەردىڭ ءومىر ءسۇرۋ ساپاسى جاقسارادى. ءبىر سوزبەن ايتقاندا, راديوجيىلىكتى ابلياتسيا – قالقانشا بەزدى حيرۋرگيالىق جولمەن الىپ تاستاۋعا تاماشا بالاما. ەمشارا ناركوزدى قاجەت ەتپەيدى. تەك قالقانشا بەزىنىڭ قاتەرسىز تۇيىندەرىندەگى اۋىرسىنۋدى باقىلاۋ ءۇشىن انەستەزيا قولدانىلادى ەكەن. ەمشارادان كەيىن از-كەم اۋىرسىنۋ بايقالعانىمەن, اسا مازانى المايدى دەسەدى. ەمشارادان كەيىن اينۇر ەسىمدى پاتسيەنتتىڭ ءوزى راديوجيىلىكتى ابلياتسيا تۋرالى پىكىرىن ايتىپتى.
– دارىگەرلەرگە بارعان كەزدە ماعان حيرۋرگيالىق الىپ تاستاۋ ۇسىنىلدى. بىراق مەن ودان باس تارتتىم. راديوجيىلىكتى ابلياتسيانى دۇرىس سانادىم. ەمشارادان الدىن ماعان قالقانشا بەزىنىڭ تسيتولوگيالىق زەرتتەۋى جۇرگىزىلدى. ونى اۋىرسىنبادىم. قازىر ءوزىمدى جاقسى سەزىنەمىن جانە بۇگىن ۇيگە شىعامىن. مەن دارىگەر نياز بەيسەن ۇلىنا, كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنا, دارىگەرلەرى الەكسەي ەۆگەنەۆيچكە, ەندوكرينولوگتەر لاۋرا باحىتجانقىزى مەن بالنۇر پەردەقوجاقىزىنا جوعارى كاسىبيلىگى ءۇشىن ريزامىن, – دەيدى العىسىن ايتقان پاتسيەنت.
قالقانشا بەزىنىڭ قاتەرسىز ءتۇيىندى ىسىگىن از ءينۆازيۆتى ەمدەۋدىڭ يننوۆاتسيالىق, جوعارى ءتيىمدى ادىستەرى قازىر الماتى قالاسىنداعى پاتسيەنتتەرگە ءمامس اياسىندا قولجەتىمدى. عىلىمي-زەرتتەۋ ينستيتۋتىنىڭ دارىگەرلەرى وسىمەن توقتاماي, كەلەشەكتە قالقانشا بەزىنىڭ قاتەرسىز ىسىكتەرىنىڭ راديوجيىلىكتى ابلياتسياسىن مەڭگەرگەن مامانداردى دايارلاۋمەن قاتار, سالانى ودان ءارى جەتىلدىرۋگە نيەتتى.
