باسقا ايماقتان قالاعا ءبىلىم قۋىپ كەلگەن ستۋدەنت ءۇشىن ەڭ قاجەتتىسى – جاتاقحانا. الايدا ورىننىڭ جەتىسپەۋشىلىگىنەن پاتەر جالداپ, تۋعان-تۋىستىڭ قاباعىن باعىپ, ءۇيىن پانالاپ جۇرگەندەر دە جەتەرلىك. ويتكەنى ستۋدەنت كوپ, ال جاتاقحاناداعى ورىن ادەتتەگىدەي ساناۋلى. ونىڭ ۇستىنە, ەلىمىزدە مۇقتاج ستۋدەنتتى باسپانامەن قامتاماسىز ەتۋدى مىندەتتەيتىن ارنايى زاڭ دا قاراستىرىلماعان. وسىدان بولار, بۇل ماسەلە جىل سايىن كوتەرىلەدى, جىل سايىن تالقىعا تۇسەدى, بىراق شەشىمى جوق.
وعان قوسا ءار ۋنيۆەرسيتەت, كوللەدج بولماسىن, جاتاقحانا ۇلەستىرۋدەگى وزىندىك ىشكى ەرەجەگە باعىنادى. اشىپ ايتساق, جاتىن ورىن, ەڭ الدىمەن, مەملەكەتتىك گرانت يەلەنگەن 1-كۋرس ستۋدەنتتەرىنە, «التىن بەلگى» يەگەرلەرىنە, اتا-اناسىنان ايىرىلعان نەمەسە اتا-اناسىنىڭ قامقورلىعىنسىز قالعان بالالارعا, كوپبالالى وتباسىنان شىققان, اكە-شەشەسى نەمەسە ءوزى مۇگەدەك ستۋدەنتتەرگە بەرىلەدى. ەكىنشى كەزەكتە, ۋنيۆەرسيتەتتىڭ قوعامدىق جۇمىستارىندا بەلسەندىلىك تانىتقاندار تۇرادى. بىراق وسى ازاماتتاردىڭ وزىنە كەيدە تولىققاندى تالاپقا ساي جاعداي جاسالماي جاتادى. وسى رەتتە «Jastar ruhy» بەلسەندىلەرى جاتاقحانالاردى جان-جاقتى تەكسەرۋگە كىرىستى. الماتىلىق بەلسەندىلەر الدىمەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ جاتاقحانالارىن باقىلادى.
«قازىرگى ۋاقىتتا اباي اتىنداعى قازۇپۋ-دىڭ 5 جاتاقحاناسىندا 2126 ستۋدەنت تۇرادى. جاتاقحاناعا مۇقتاجدىعى تۋرالى ءوتىنىش بىلدىرگەندەردىڭ جالپى سانى 3308 ستۋدەنتتى قۇرايدى, ونىڭ 1108-ءى جالعا الىنعان جاتاقحانالاردا ورنالاسقان. ستۋدەنتتەردى ورىندارمەن قامتاماسىز ەتۋ ءۇشىن 3 جاتاقحانامەن مەموراندۋم جاسالعان. جالعا بەرىلەتىن جاتاقحانالار بەينەباقىلاۋ جۇيەلەرىمەن جابدىقتالعان جانە قاۋىپسىزدىك نورمالارىن قاتاڭ ساقتايدى. ستۋدەنتتەردىڭ ءال-اۋقاتىن باقىلاۋ ءۇشىن ۋنيۆەرسيتەت قىزمەتكەرلەرى تاراپىنان ۇنەمى مونيتورينگ جۇرگىزىلەدى. ستۋدەنتتەرگە قولايلى بولۋى ءۇشىن جاتاقحانا اۋماعى كومپيۋتەر ورتالىقتارى, كىرجۋعىش ماشينالار, تۇرمىستىق ەلەكترونيكامەن قامتاماسىز ەتىلگەن. بىراق جاتاقحانا كەڭەستىك كەزەڭدە سالىنعاندىقتان عيماراتى ەسكى», دەيدى الماتى قالالىق «Jastar ruhy» جاستار قاناتى فيليالىنىڭ توراعاسى اكەجان كەڭەسوۆ.
وقۋ ورنىنىڭ جاتاقحاناسى 2 قاباتتان تۇرادى. جوبا بويىنشا عيمارات 257 ورىنعا ەسەپتەلگەن. ستۋدەنتتەر ايىنا 12 مىڭ تەڭگە تولەيدى. ءبىر بولمەدە 4-6 جاتىن ورىن بار جانە ءار قاباتتا اس بولمە ورنالاسقان. ستۋدەنتتەردىڭ قاۋىپسىزدىگى ءۇشىن بەينەباقىلاۋ كامەرالارى جۇمىس ىستەيدى.
ء«بىزدىڭ ماقساتىمىز – بىرەۋدىڭ ءمىنىن تەرۋ ەمەس. بەلسەندى رەتىندە قوعامنىڭ الەۋەتىن جاقسارتۋ جولىندا بىرلەسە جۇمىس ىستەۋ. ال ناۋقاننىڭ ماقساتى – ستۋدەنتتەر ءۇيىنىڭ ساپاسىن ارتتىرۋ, سانيتارلىق نورمالار مەن قاۋىپسىزدىك شارالارىن ساقتاۋ. وسى ورايدا جاستار قاناتى تاراپىنان كەڭەس بەرىلىپ, جاتاقحانا الۋ بارىسىندا كەلەڭسىز جاعدايعا تاپ بولعان ستۋدەنتتەرگە جان-جاقتى قولداۋ كورسەتىلەدى. ال ناقتى جاتاقحاناداعى ورىن تاپشىلىعىن شەشۋ ءۇشىن الماتى قالاسىن 2025 جىلعا دەيىن دامىتۋ باعدارلاماسى اياسىندا «جاستار, مادەنيەت جانە سپورتتى دامىتۋدى قولداۋدىڭ» جول كارتاسى بەكىتىلىپ, قۇجاتتا جاڭا ستۋدەنتتەر جاتاقحانالارىنىڭ قۇرىلىسىنا ەرەكشە كوڭىل ءبولىنىپ وتىر. جول كارتاسى اياسىندا 2025 جىلدىڭ سوڭىنا دەيىن – 12 مىڭ, 2030 جىلدىڭ سوڭىنا قاراي تاعى 20 مىڭ توسەكتىك ورىن قۇرۋ جوسپارلانعان. جاتاقحانا قۇرىلىسى بويىنشا جۇمىستى ءتيىمدى ۇيلەستىرۋدە 2023 جىلدىڭ ناۋرىز ايىندا اكىمدىك ءبىلىم جانە عىلىم مينيسترلىگىمەن بىرلەسىپ, جوبالىق كەڭسەنى ىسكە قوستى. ىسكە قوسىلعان ساتتەن باستاپ جوبالىق كەڭسەگە 118 الەۋەتتى ينۆەستور حابارلاستى. بۇل قولداۋ تەتىگىنىڭ تارتىمدىلىعىن كورسەتەدى. قازىر دايىندىق جۇمىستارى جۇرگىزىلىپ جاتىر», دەدى ۆولونتەر.
ايتا كەتەيىك, اكتسيا «Amanat» پارتياسىنىڭ «Jastar ruhy» جاستار قاناتىنىڭ ۇيىمداستىرۋىمەن تۇراقتى تۇردە جىلىنا ەكى رەت وتكىزىلەدى. مونيتورينگ اياسىندا الماتى قالالىق «Jastar ruhy» جاستار قاناتى فيليالى اقپان ايىنىڭ سوڭىنا دەيىن 95 جاتاقحانانى تەكسەرمەكشى.
