اجار ابيتاەۆا ءال-فارابي اتىنداعى قازاق ۇلتتىق ۋنيۆەرسيتەتىندە «شىعىستانۋ» ماماندىعى بويىنشا 2-كۋرستا وقيدى. مەكتەپ كەزىنەن ەرىكتىلىكتى سەرىك ەتكەن بويجەتكەن ستۋدەنتتىك شاقتا دا جاقسىلىق جاساپ ءجۇر. العاش اۋىل مەكتەپتەرىندەگى بالالارعا اعىلشىن ءتىلىن ۇيرەتۋدەن باستاعان ول قازىر «سويلە» تىلدەسۋ كلۋبىنىڭ ۇيلەستىرۋشىسى.
– 2020 جىلى پاندەميا ۋاقىتىندا «Bala Dausy» مەديا جوباسىنىڭ نەگىزىن قالادىم. باستامانىڭ ماقساتى – بالا قۇقىعى تۋرالى اقپاراتتى تاراتۋ, مەديا ەرىكتىلەردى دايىنداۋ. بۇل جوبا بۇگىندە رەسپۋبليكا اۋماعىنداعى نازارباەۆ زياتكەرلىك مەكتەپتەرىندە 300-دەن اسا مەديا ەرىكتىنىڭ باسىن بىرىكتىردى. ۆولونتەرلىك تاجىريبەمدى ودان ءارى شىڭداۋ ماقساتىندا «جاس وتان» جاستار قاناتىنىڭ قاتارىنا كىرىپ, ۇيىمنىڭ بىرقاتار جوباسىنا بەلسەنە قاتىستىم. قازىر ەلىمىزدىڭ ءار ايماعىندا قازاق ءتىلىن مەڭگەرگىسى كەلەتىن ازاماتتارعا تەگىن ساباقتار جۇرگىزەتىن «سويلە» تىلدەسۋ كلۋبىنىڭ مۇشەسىمىن. كلۋب «مەنىڭ ەلىم, مەنىڭ ءتىلىم» جوباسى اياسىندا اشىلدى. قازىر قاتىسۋشىلار سانى 500-دەن استى. وعان قوسا قوعامىمىزدا تىلەۋلەستىك, مەيىرىمدىلىك جانە جاناشىرلىق قاسيەتتەرىنىڭ تەرەڭ تامىر جايۋىنا ۇلەس قوسۋ ءۇشىن «ارداگەرلەرى ارداقتايىق», «كەل, شاي ىشەيىك», «Taza Like» سىندى ءتۇرلى الەۋمەتتىك جوبادا دا بەلسەندىمىن, – دەيدى ۆولونتەر.
ىزگىلىكتى سەرىك ەتىپ, قوعامعا پايداسىن تيگىزۋدى ماقسات تۇتقان جاننىڭ ءبىرى – گاۋھار جۇماعازيەۆا. ول – «د.ا.ر» ۆولونتەرلىك كلۋبىنىڭ ۇيلەستىرۋشىسى. ۇيىم مۇمكىندىگى شەكتەۋلى جاندارعا دەمەۋ بولىپ, بالالار مەن جاستاردىڭ قوعامعا بەيىمدەلۋىنە جاردەم بەرەدى.
– 17 جاسىمنان ۆولونتەرلىك ءىستى قالدىرماي كەلەمىن. مۇندا مەن وزگەلەردى قايىرىمدىلىق جاساۋعا, ەرىكتىلىكتىڭ قىر-سىرىن, ءمان-ماعىناسىن تۇسىنۋىنە كومەكتەسەمىن. ويتكەنى قوعامدا ۆولونتەرلىك قوزعالىس جاقسى دامىعانىمەن, ونىڭ قىزمەتىن تەرەڭىنەن تۇسىنە بەرمەيتىندەر كوپ. ياعني باسىم كوپشىلىگى حالىقتان قارجى جيناۋ, از قامتىلعان وتباسىلارعا ازىق-ت ۇلىگىن اپارىپ تاستاسا بولدى دەپ ەسەپتەيدى. ارينە, ول تۇسى دا بار. بىراق كومەكتەسكەن وتباسىلاردىڭ جاعدايىن ۇنەمى باقىلاپ, باعدارلاپ وتىرۋ, ولاردىڭ قالىپتى ءومىر ءسۇرىپ كەتۋىنە جاعداي جاساۋ سەكىلدى قيىندىقتارى دا جەتكىلىكتى. سوندىقتان كوبىنە قاتارىمىزعا قوعامدىق كوزقاراسى قالىپتاسقان, كامەلەت جاسىنان اسقان ازاماتتاردى قابىلدايمىز. بۇگىندە ۇلتتىق ەرىكتىلەر جەلىسىنىڭ باستاۋىمەن «Samruk-Kazyna Trust» الەۋمەتتىك جوبالاردى دامىتۋ قورىنىڭ دەمەۋىمەن رەسپۋبليكالىق «جەڭىس» جوباسىنىڭ اقتوبە وبلىسى بويىنشا ۇيلەستىرۋشىسىمىن. جالپى, بۇل جوبادا سوعىس ارداگەرلەرى مەن تىل ەڭبەككەرلەرىنە كومەك قولىن سوزامىز, – دەدى جاناشىر.
نازەركە ۇزاققاليەۆا 21 جاستا. ۆولونتەرلىككە زەيىن قويعانىنا 4 جىلدان اسقان. بۇگىندە «Birgemiz: Saulyq» جوباسىنىڭ شاعىن گرانتتارى اياسىندا جۇزەگە اسىرىلىپ جاتقان «كۇتىم – ساۋلىق كەپىلى» باستاماسىنىڭ جەتەكشىسى.
– جوبا اياسىندا ۆولونتەرلەردى ىرىكتەپ, الداعى جوسپارلاردى تالقىلاۋ جۇمىستارى جۇرگىزىلدى. ۆولونتەرلەر اۋىر حالدەگى ناۋقاستاردىڭ كۇتىمى بويىنشا داعدىلاردى ۇيرەنەدى. ونىڭ ىشىندە, جاۋىر جارالاردىڭ الدىن الۋ, گيگيەنالىق ءىس-شارالاردى جۇرگىزۋ, پسيحولوگيالىق كومەك كورسەتۋ, العاشقى كومەك كورسەتۋ تاقىرىپتارىندا ءبىلىم الدى. ناتيجەسىندە, ۆولونتەرلەر قاتەرلى ىسىكپەن اۋىراتىندار مەن حوسپيستەردەگى ناۋقاستارعا كومەك كورسەتە الاتىنداي دارەجەگە جەتتى. سەمينار سوڭىندا بارلىق ۆولونتەر ارنايى سەرتيفيكاتپەن ماراپاتتالدى. ۆولونتەرلەر ونكوديسپانسەرگە بارۋ ارقىلى مەديتسينالىق تاجىريبەلىك ءبىلىمىن ارتتىرىپ, مۇمكىندىگى شەكتەۋلى جانداردىڭ كۇتىمىمەن اينالىستى. سونىمەن قاتار جوبا كەزىندە ناۋقاستارعا ارنالعان گيگيەنالىق كۇتىمگە ارنالعان زاتتار تاراتىلدى. قازىر مەن «مەديتسينا جاستارى» بىرلەستىگىندەمىن. كوماندادا 250-گە جۋىق ۆولونتەر-مەديك بار. اشىلعالى بەرى شامامەن 16 مىڭ ادامعا كومەك كورسەتتىك. 350-دەن اسا الەۋمەتتىك ماڭىزى بار ءىس-شارا ۇيىمداستىرىلدى. ءبىزدىڭ باستى جەتىستىگىمىز – ەلدەگى توتەنشە جاعدايلار ۋاقىتىندا جاقسىلىق جاساۋدان تاسا قالماعانىمىز. ماسەلەن, ارىس قالاسىنداعى توتەنشە جاعداي كەزىندە 110 ەرىكتى-دارىگەر حالىق جينالاتىن ورىنداردا العاشقى مەديتسينالىق كومەك كورسەتتى. COVID-19 پاندەمياسىنا بايلانىستى توتەنشە جاعداي جاريالانعان كەزدە ءبىزدىڭ ەرىكتىلەر دارىگەرلەرمەن بىرگە ۋاقىتشا اۋرۋحانالاردا جۇمىس ىستەدى. استانا قالاسىنداعى «Amara» جەكەمەنشىك حوسپيسىنداعى 45 ناۋقاسقا تۇراقتى تۇردە 100-گە جۋىق ۆولونتەر مەديتسينالىق كومەك كورسەتتى. اتاپ ايتقاندا, ءدارى-دارمەكتەرىن جەتكىزىپ, جەكە گيگيەنالىق شارالارعا جاردەمدەستى, پسيحولوگيالىق كەڭەس بەرىپ, الەۋمەتتىك كومەك جاسادى. بۇدان بولەك, جورگەكتەر, تونومەترلەر, توسەك جامىلعىلارى سىيعا تارتىلدى, بولمەلەردەگى تازالىق شارالارىن جاساۋعا, ۋاقىتىلى توسەكتىك ورىنداردى اۋىستىرۋعا كومەكتەرىن تيگىزدى. نەگىزى كەز كەلگەن وتانداسىمىز ۆولونتەر بولا الادى. تەك نيەت كەرەك. مىسالى, 2020 جىلى ەلىمىزدىڭ 14 ايماعىندا مەديتسينالىق ەرىكتىلەر مەكتەپتەرىن اشىپ, بۇكىل ەل بويىنشا 2 مىڭعا جۋىق ۆولونتەر وقىتىلدى. بۇل باعىتتاعى يگى ءىس ءالى دە جالعاسىپ جاتىر, – دەيدى نازەركە ۇزاققاليەۆا.
ادام بالاسىن يگى ىستەرگە باستايتىن ىزگى جۇرەكتىڭ قالاۋى – جاقسىلىق. سوندىقتان قوعامعا پايداسىن تيگىزۋدى كوزدەيتىن ۆولونتەرلەردىڭ قاتارى جىل سايىن ارتقانى قۋانتادى.
