«قازترانسگاز ايماق» اق گاز جەلىلەرىنە قوسىلاردا تەحنيكالىق شارتتاردى الۋ ءۇشىن ءوتىنىمدى ەندى eGov.kz پورتالىندا ەلەكتروندىق تسيفرلىق قولتاڭبا كومەگىمەن ونلاين قالدىرۋعا بولادى. دايىن بولعان تەحنيكالىق شارتتاردى SMS حابارلاما تۇرىندە جولدانعان سىلتەمەگە ءوتىپ, جۇكتەپ الۋعا بولادى. وسى ورايدا تەحنيكالىق شارتتاردىڭ تەگىن بەرىلەتىنىن اتاپ وتكەن ءجون.
قۇلاققاعىس رەتىندە ايتار بولساق, 2023 جىلدىڭ 29 تامىزىندا «تابيعي مونوپوليالار تۋرالى» زاڭىنا تەحنيكالىق شارتتاردىڭ مەرزىمىنە قاتىستى وزگەرىستەر ەنگىزىلدى. وسى تۇزەتۋدە تەحنيكالىق شارتتار بەرىلگەن ساتتەن باستاپ جارامدىلىق مەرزىمى 3 جىلدان اسپايتىنى ناقتى جازىلعان. تەك بۇل وزگەرىستەردىڭ قۇرىلىسى ءجۇرىپ جاتقان تەحنيكالىق شارتتارعا ەش قاتىسى جوق.
وسى تۇزەتۋلەرگە دەيىن تەحنيكالىق شارتتاردىڭ ارنايى بەلگىلەنگەن مەرزىمى بولماعان. وسىلايشا, تەحنيكالىق شارتتاردىڭ بارلىق يەلەرى قۇجاتتىڭ جارامدىلىق مەرزىمى بەرىلگەن ۋاقىتىنان ءۇش جىل وتكەندە, بىراق ول مەرزىم 2024 جىلدىڭ 1 شىلدەسىنەن ەرتە اياقتالمايتىنىن ەسكەرۋى كەرەك. بۇل جوبالاردى دالىرەك جوسپارلاۋدى جانە ءتيىمدى باقىلاۋدى قامتاماسىز ەتەدى. سونىمەن قاتار گازدىڭ بوس قۋات تاپشىلىعىن بولدىرمايدى. زاڭناماداعى تۇزەتۋلەردى پارلامەنت ءماجىلىسىنىڭ دەپۋتاتتارى ۇسىنىپ, قابىلدادى.
بۇعان قوسا ينفراقۇرىلىمدىق جەلىلەردىڭ قولجەتىمدى بولۋى ءۇشىن اكىمشىلىك كەدەرگىلەردى ازايتۋ ماقساتىندا 2023 جىلى قولجەتىمدىلىك شارتتارى دا جەڭىلدەتىلدى. تەحنيكالىق شارتتاردى الۋعا ءوتىنىش بەرۋ ءۇشىن قاجەتتى قۇجاتتار سانى ەكى ەسە قىسقاردى. سونداي-اق تۇرعىن ءۇي نەمەسە نىساننىڭ گاز جۇيەسىنە قوسىلۋعا دايىندىعىن تەكسەرۋ ءۇشىن قاجەتتى قۇجاتتار سانى 14-تەن 5-كە دەيىن قىسقارعان.
