وڭتۇستىك كورەيادا تەحنيكالىق سالا بويىنشا مىقتى ءبىلىم وردالارى كوپ. وسى ورايدا وڭتۇستىك كورەيانىڭ جەتەكشى وقۋ ورىندارىنىڭ ءبىرى «Woosong» ۋنيۆەرسيتەتىنىڭ باسشىلىعىمەن كەلىسسوزدەر جۇرگىزىلدى. وبلىس اكىمى دارحان ساتىبالدى شەتەلدىك دەلەگاتسيامەن كەزدەسىپ, IT ماماندىعى بويىنشا بىرلەسكەن وقۋ ورنىن اشۋ ماسەلەسىن جان-جاقتى تالقىلادى. جوعارى وقۋ ورنى وندىرىسكە نەگىزدەلگەن تەحنيكالىق مامان دايارلايدى. كەزدەسۋدە وقۋ ورنىنىڭ ساياساتى مەن ماقساتىن «Woosong» ۋنيۆەرسيتەتىنىڭ حالىقارالىق مەكتەپتەر بويىنشا اتقارۋشى دەكانى يۋ تەك لي ءتۇسىندىردى. سۇرانىسقا يە ماماندىققا قاتىستى وقۋ ورنىنىڭ مۇمكىندىكتەرى ايتىلدى. حالىقارالىق ءبىلىم وشاعىنىڭ عىلىمي ورتالىعى تەدجوندا ورنالاسقان جانە 70 جىلدىق تاريحى بار, 16 مىڭنان استام ستۋدەنت ءبىلىم الادى. وندا الەمنىڭ 85 مەملەكەتىنەن كەلگەن ستۋدەنتتەر وقيدى. پروفەسسورلىق قۇرامى 1 مىڭنان اسادى. سونداي-اق كەزدەسۋدە وقۋ بارىسىنىڭ ونلاين جانە وفلاين پلاتفورمادا وتكىزىلەتىنى, تۇلەكتەردىڭ جۇمىسقا ورنالاسۋ كورسەتكىشى بويىنشا كورەيادا ۇزدىك ۇشتىكتە ەكەنى ايتىلدى. ۋنيۆەرسيتەتتە قازاقستاننان بارعان 40-تان استام جاس ءبىلىم الادى. جاساندى ينتەللەكت, ياعني ادامنىڭ ويلاۋ ۇدەرىسىن كومپيۋتەرلىك جۇيەلەرمەن مودەلدەۋ بويىنشا يننوۆاتسيالىق زەرتحانالار جۇمىس ىستەيدى. كيبەرقاۋىپسىزدىك بويىنشا ماماندارعا سۇرانىس ارتقان. تۇلەكتەر باسقارۋ مەن ءوندىرىس سالاسىن بىرگە مەڭگەرەدى. وسى باعىتتا تۇركىستان وڭىرىنە ىڭعايلاستىرىپ, اۋىل شارۋاشىلىعىنداعى اقپاراتتىق جۇيەلەر سالاسىن جەتىلدىرۋگە كۇش سالىنباق. اقپاراتتىق جۇيەلەر سالاسىنا قىزىعۋشىلىق پاندەميا كەزىندە ارتا تۇسكەنى ءمالىم. بۇعان قاشىقتان ونلاين جۇمىس ىستەۋ ءتاسىلى دە اسەر ەتتى. كوپتەگەن كومپانيا اۆتوماتتاندىرۋ جۇيەسىنە كوشىپ جاتقاندىقتان IT ماماندارعا دەگەن قاجەتتىلىك ارتتى. سوندىقتان دا وبلىستاعى ەڭبەك نارىعىندا سۇرانىسقا يە ماماندىقتاردى ەكىجاقتى زەرتتەي كەلىپ, جوعارى وقۋ ورنىن اشۋ جوسپارلانىپ وتىر.
تۇركىستان وبلىسى
