فوتو: stan.kz
– قازاق بالانى سانامايدى. Cانىن دا ايتپاعان, – دەدىم اماندىق سۇراسقاننان سوڭ. – كوپبالالى انا ەكەنىڭىزدى ەستىپ, ادەيى بۇرىلدىم. ماعان قىزىعى, بالالارىڭىزدىڭ اتى بولىپ تۇر. ەسىم قويۋدا ەستىلىك تانىتقان سىزدەردىڭ اۋلەت تۋرالى سىرتتاي ەستۋىم بار ەدى.
– ايتايىن, قۇداي بەرگەن, كوز الدىمىزدا تاربيەلەگەن جەتى قىز, التى ۇل بار. كوپتىك ەتپەسىن, اللام, – دەپ اشىلا ءسوز باستادى كۇلاش اپا. ىشتەي «ون ءۇش بالانى دۇنيەگە اكەلگەن قازاق ايەلىن سوڭعى رەت قاشان ەستىپ ەدىم» دەپ ويلانىپ ۇلگەرگەنشە بولمادى, الاسا بويلى, شاعىن دەنەلى جاڭاقورعاندىق انامىز بالالارىنىڭ اتىن سانامالاي جونەلدى.
– ۇلكەنىم – اقنۇر, سوسىن – گۇلنۇر, نۇرگۇل, نۇرماحان, نۇرسۇلتان, نۇرلان, نۇربولات, ىممم, – دەپ ەرنىن تىستەلەپ ءسال ويلاندى دا, قايتا جالعاستىردى. – نۇرجامال, نۇرسۇلۋ, نۇرجىگىت, نۇرعالي, بالنۇر, نۇردانا.
– بارلىعى «نۇر» ەكەن, – دەدىم مەن. ءتىپتى بۇرىننان ءبىلىپ تۇرسام دا, كۇلاش اپا ۇل مەن قىزدى سانامالاعاندا تاڭدانىسىمدى جاسىرا الماعانمىن.
– قاينىلارىمنىڭ ءۇيشاشارلارى دا وسىنداي عوي, – دەدى ول بۇل ازدىق ەتسە, تاعى دا بار دەگەندەي كوزقاراسپەن.
– راس پا؟
– وسى ۇيدەگى اعاڭنان كەيىنگى ەكى ۇلدىڭ بالالارىنىڭ اتىنا «نۇر» ءسوزى باسى نە اياعىندا تىركەسكەن, – دەدى اڭقىلداي ك ۇلىپ.
– اتتارىن ايتىڭىزشى.
– قاسىمبەكتىڭ بالالارى اينۇر, نۇرلىبەك, نۇرمان, ودان كەيىن كىم ەدى؟ وسى جولى بالالار ەسىمىنەن شاتاسا باستاعان كۇلاش اپاعا كىشى قىزى كومەكتەستى.
– ماما, نۇرداۋلەت, سوسىن نۇربەرگەن, – دەپ دەمەپ جىبەرگەن سول ەدى, اپامىز ءارى قاراي ىلە كەتتى.
– ءاا, ءيا, ودان سوڭ نۇرتورە, نۇرايلىم, ءنۇربيبى. بۇل ورتانشى قاينىمنىڭ سەگىز بالاسى. كىشى قاينىم اسقاردان – نۇرجان, نۇرمۇحاممەد, نۇرلىباي, نۇريسلام.
– 25 «نۇر» ەكەن, – دەدىم مەن ىشتەي ەسەپتەپ بولعان سوڭ تاپقىرلىق تانىتقانداي.
– ەنەمنىڭ قويعانى كوبىسى. ءبىز نەگىزى ءۇش كەلىن ءبىر شاڭىراق استىندا 30 جىل تۇرعانبىز. شىناشاقتاي كەمپىر ءۇش كەلىندى 30 جىل قازاقي داستۇرمەن تاربيەلەگەن. سول ەنەمنىڭ ايتقانى عوي. مىنا بالالاردىڭ اتىن «نۇر» سوزىنەن باسقاعا اۋىستىرعىمىز كەلەدى عوي. ەنەم مارقۇم «مەنىڭ ەرتەڭ تالقانىم تاۋسىلار, سول كەزدە «لاۋرا-پاۋرا», «ايدا-سايداڭدى» قويىپ الارسىڭدار» دەپ ءبىر-اق رەت كەسىپ ايتتى. سول «نۇردان» الىستامادىق, سول نۇرعا شومىلعان باقىتتى اۋلەتپىز, مىڭ شۇكىر.
– جەرگىلىكتى جەردىڭ اتقامىنەرلەرى كومەكتەسىپ تۇراتىن شىعار...
– شىراعىم-اي, قول جايىپ بارۋعا جوقپىن. ءار بالا ءوز نەسىبەسىمەن تۋىلادى. 25 بالا كەشەگى كۇنگە دەيىن, دۇرىسى 2010 جىلعا دەيىن ءبىر داستارقان باسىندا تاماق ءىشىپ, ءبىرىنىڭ كيىمىن ءبىرى كيىپ, تاتۋ ءوستى عوي, قاراعىم. سەنسەڭ ايتايىن, تۇسكە دەيىن وقيتىن ۇلدىڭ اياق كيىمىن وعان تەتەلەس ءىنىسى ەسىك بۇرىشىندا كۇتىپ تۇراتىن. ويتكەنى تۇستەن كەيىن ساباققا بارۋعا اعاسىنىڭ اياق كيىمى كەرەك. سول كەزدە بارىنە بىردەي كيىم قايدا؟ قازىر نە كەرەك, ءبارى بار. ەڭبەك ەت, اقشا تاپ, دۇكەندە تولىپ تۇر.
راسىمەن, وتباسى بىرلىگىن بەكەمدەگەن اۋلەتتىڭ كوپبالالى بولعانىمەن قويماي, قازاقى ەسىمدى بەرىك ۇستانۋىندا دا ۇلكەن ءمان بار. كەيىنگى جىلدارى تىم ءمانى قاشىڭقىراعان ەسىمدەردى ەستىپ ءجۇرمىز. ماعىناسىن دا اشىپ ايتا المايمىز. ەسىم تاڭداۋدا وزگەلەرگە ەلىكتەۋ باسىم عوي بىزدە. مويىنداۋ كەرەك.
ايتپاقشى, پايعامبار جاسىنان اسقان وتاعاسى اسىلبەك يساەۆ ۇلدارىن ەڭبەككە تاربيەلەپ, ۇستالىقتىڭ قىر-سىرىن ۇيرەتكەن. سودان بولار, قارا ەڭبەكتىڭ ارقاسىندا بۇل وتباسىنىڭ داستارقانى ادال. بالالار تاربيەسىندە قالعىماي, قازاقى ايەلدىڭ بەينەسىن بىزدەن الىستاتپاعان كۇلاش ءجۇنىسوۆا اپانىڭ تىلەگى بىرەۋ-اق.
– كورگەن جەردە, اعايىن اراسىندا, توي-دومالاقتا ءبىر-اق ءسوز ايتامىن. مەنىڭ جولىمدى بەرسىن. كەيبىر كەلىندەر مۇرنىن تىرجيتادى. ىشتەي جاقتىرماس. مەن ايتا بەرەم سوندا دا. قۇداي ءوزى بەردى مە, ولتىرمەيدى. نەسىبەسىن قوسا بەرەدى. تۋىڭدار دەيمىن. بالاڭ كوپ بولسا, باۋىرمال بولادى, ءبىر-ءبىرىن كوتەرىپ باعادى. ءبىر-ەكەۋمەن شەكتەلىپ, ءبىز وسپەيمىز عوي...
جاڭاقورعاندىق انانىڭ ءسوزىن اينا-قاتەسىز قاعازعا وسىلاي ءتۇسىردىم. ويتكەنى شىنايى لەبىزى ەدى. بىزگە دە جەتىسپەي جۇرگەنى وسى عوي.
