حيميا ءوندىرىسىنىڭ جىلىگىن شاعىپ, مايىن ىشكەن جەرگىلىكتى مامانداردىڭ ايتۋىنشا, وڭىرلىك ۋنيۆەرسيتەتتىڭ رەسەيلىك جوعارى وقۋ ورىندارىمەن تىعىز بايلانىس ورناتۋى زاڭدىلىق. ويتكەنى جامبىل وبلىسى حيميا ونەركاسىبىنىڭ لوكوموتيۆى سانالادى. ەكى ۋنيۆەرسيتەت اراسىنداعى بايلانىس وتكەن جىلى ورناتىلدى. پرەزيدەنت تاپسىرماسىن جۇزەگە اسىرۋدى قولعا العان وڭىرلىك ۋنيۆەرسيتەت ۇجىمى اۋەلى «قازفوسفات» جشس, د.مەندەلەەۆ اتىنداعى رەسەي حيميا-تەحنولوگيا ۋنيۆەرسيتەتىنىڭ باسشىلىق قۇرامىمەن بىرلەسىپ, ۇشجاقتى مەموراندۋمعا قول قويدى. كەيىننەن تاراز تورىندە «مەندەلەەۆ سىنىبى» جوباسىنىڭ سالتاناتتى اشىلۋ ءراسىمى ۇيىمداستىرىلدى.
راسىندا دا, مىڭداعان جەرگىلىكتى تۇرعىندى جۇمىسپەن قامتىپ وتىرعان «قازفوسفات» جشس ءۇشىن بۇل جوبانىڭ ماڭىزى زور. كادر تاپشىلىعىن جويۋ جولىندا ۇشجاقتى كەلىسىممەن ىسكە اسىرىلاتىن جوبانىڭ بارلىق تاراپقا ءتيىمدى ەكەنى انىق. سونداي-اق حيميا باعىتى بويىنشا ءبىلىمىن تولىقتىرعىسى كەلەتىن جاستارعا دا تاپتىرماس مۇمكىندىك. سودان دا بولسا كەرەك, ءبىرشاما ۋاقىت بۇرىن تمد ەلدەرى اراسىندا تۇڭعىش رەت حيميا ونەركاسىبى سالاسىنداعى جەلىلىك كامپۋستىڭ تۇساۋى كەسىلگەن ەدى.
قولعا الىنعان ءىرى جوبا ءارى قاراي دا ساتىمەن جالعاستى. ەندى, مىنە, م.ح.دۋلاتي اتىنداعى تاراز وڭىرلىك ۋنيۆەرسيتەتىندە رەسەيلىك جوعارى وقۋ ورنىنىڭ وكىلدىگى اشىلىپ وتىر. ءىس-شارانىڭ اشىلۋ سالتاناتىنا تاراز قالاسىنىڭ اكىمى باقىتجان ورىنبەكوۆ, رەسەيلىك ۋنيۆەرسيتەت رەكتورىنىڭ مىندەتىن اتقارۋشى يليا ۆوروتىنتسەۆ, «قازفوسفات» جشس باس ديرەكتورى ەۆگەني پاك, رەسەي فەدەراتسياسى پرەزيدەنتى جانىنداعى عىلىم جانە ءبىلىم سالاسىنداعى جاستار ءىسى جونىندەگى ۇيلەستىرۋ كەڭەسىنىڭ مۇشەسى الەكساندرا گلازكوۆا جانە وڭىرلىك ۋنيۆەرسيتەتتىڭ پروفەسسور-وقىتۋشىلارى قاتىستى.
يليا ۆوروتىنتسەۆ جەلىلىك ءبىلىم بەرۋ باعدارلاماسىنىڭ ىسكە اسىرىلۋى ەكى وقۋ ورداسى اراسىنداعى ىسكەرلىك بايلانىستى نىعايتا تۇسەتىنىنە سەنىمدى. ال تاراز وڭىرلىك ۋنيۆەرسيتەتى رەكتورىنىڭ مىندەتىن اتقارۋشى شولپان ەسىموۆا «مەندەلەەۆ سىنىبى» جوباسىنىڭ ساتىمەن ىسكە اسقانىن ايتىپ, ءبىلىم بەرۋدەگى حالىقارالىق ىنتىماقتاستىقتى دامىتۋدىڭ, حيميا سالاسىندا جوعارى بىلىكتى كادرلار دايارلاۋ ماقساتىندا ەلىمىزدە رەسەي حيميا-تەحنولوگيا ۋنيۆەرسيتەتىنىڭ فيليالىن اشۋ جونىندەگى باستامانىڭ ماڭىزدىلىعىن اتاپ ءوتتى.
جالپى العاندا, بۇل جوبانى ىسكە اسىرۋ جۇمىستارى 2023 جىلى الماتى قالاسىندا وتكەن ەكى ەلدىڭ ۇكىمەتارالىق كوميسسياسىنىڭ وتىرىسىندا تولىققاندى زەردەلەنىپ, تاراز قالاسىندا شەتەلدىك ۋنيۆەرسيتەتتىڭ فيليالىن اشۋ تۋرالى شەشىم قابىلدانعان بولاتىن. باياندى باستامانى جۇزەگە اسىرۋدىڭ بىرلەسكەن جول كارتاسى دا ازىرلەنگەن ەدى. ەندى, مىنە, اتقارىلعان بارلىق جۇمىس وڭ ناتيجە بەرىپ وتىر.
دەرەككە جۇگىنسەك, 2024 جىلدىڭ 1 قىركۇيەگىنەن باستاپ تاراز قالاسىندا د.مەندەلەەۆ اتىنداعى ۋنيۆەرسيتەتتىڭ فيليالى ءوز جۇمىسىن باستايدى. جەرگىلىكتى وقۋ ورداسى حيميا سالاسىندا عىلىمي-تەحنولوگيالىق جانە وندىرىستىك مىندەتتەردى شەشۋگە قابىلەتتى حالىقارالىق ءبىلىم بەرۋ ستاندارتتارى دەڭگەيىندە ماماندار مەن عىلىمي كادرلاردى دايارلاۋ مىندەتىن جۇزەگە اسىرماق. حيميا جانە حيميالىق تەحنولوگيا سالاسىندا ىرگەلى جانە قولدانبالى عىلىمي زەرتتەۋلەر جۇرگىزۋ جوسپارلانىپ وتىر.
تاراز
