كتك ارناسىنىڭ جازۋىنشا, قالادا وتكەن ءتۇنى بولعان جەر سىلكىنىسىنەن جالپى 67 ادام زارداپ شەكتى. جاراقات العانداردىڭ اراسىندا 12 بالا بار. بەس تۇرعىن ءالى اۋرۋحانادا جاتىر.
شىرت ۇيقىدا جاتقان تۇرعىندار جەر سىلكىنىسىن سەزگەن كەزدە جاپا-تارماعاي سىرتقا ۇمتىلعان. قىسىلىسىپ-سىعىلىسىپ ۇستىڭگى قاباتتان تومەن قاراي ءتۇسىپ جاتقان ساتتە كەيبىرى قۇلاپ مەرتىككەن. زارداپ شەككەندەردىڭ باسىم بولىگى اۋرۋحاناعا باس جاراقاتى مەن سىڭىرلەرىنىڭ سوزىلۋىمەن تۇسكەن. ونىڭ 55-ءى — ەرەسەك ادامدار بولسا, قالعانى — بالا.
كوبىسى ۇيىنەن ەمدەلۋگە جىبەرىلگەن. ال جەر سىلكىنىسىنەن زارەسى ۇشىپ ءۇشىنشى قاباتتان سەكىرىپ كەتكەن 33 جاستاعى ايەل قازىر جانساقتاۋ بولىمىندە جاتىر. وعان وتا جاسالدى. العان جاراقاتى اۋىر دەيدى دارىگەرلەر.
- جالپى قوسارلانعان اۋىر دەنە جاراقاتى, ميى شايقالىپ, باستىڭ جابىق جاراقاتى, سانى, جامباسى سىنعان. كەلگەن كەزدە بارلىق دارىگەرلەرمەن قاراپ, شۇعىل تۇردە كومەك كورسەتىلىپ, وتا جاسالدى. قازىرگى جاعدايى تۇراقتى. شوكتان شىقتى. جانساقتاۋ بولىمىندە ءتيىستى ەم الىپ جاتىر. باسقا ەكى ناۋقاس تراۆماتولوگيا جانە ورتوپەديا بولىمشەسىندە كەشەندى تەكسەرىستەن كەيىن العاشقى كومەك كورسەتىلىپ, قازىر ەمدەلىپ جاتىر, – دەدى الماتى جەدەل شۇعىل كومەك كورسەتۋ اۋرۋحاناسىنىڭ حيرۋرگيا بويىنشا ديرەكتوردىڭ ورىنباسارى ەرمەك جەلدىباەۆ.
