قايتارىمسىز گرانتتى تالاس اۋداندىق ورتالىق اۋرۋحاناسىنىڭ ۇجىمى جەڭىپ الدى. وبلىس ورتالىعىنان 100 شاقىرىم قاشىقتىقتا جاتقان اۋداندىق اۋرۋحانا قىزمەتكەرلەرى دە ەندى جۇمىسىن ء«شوپ تامىرى» جوباسى اياسىندا ۇيلەستىرمەك.
كۇنشىعىس ەلىنىڭ قازاقستانداعى توتەنشە جانە وكىلەتتى ەلشىسى يامادا دجۋن, ارنايى وكىل كوميا شيمون جانە ء«شوپ تامىرى» ادام قاۋىپسىزدىگىن قامتاماسىز ەتۋ بويىنشا الەۋمەتتىك جوبالارعا ارنالعان قايتارىمسىز كومەك باعدارلاماسىنىڭ ۇيلەستىرۋشىلەرى يكەنوۋە يۋتارو مەن ءاليا شىڭعىسپاەۆا باستاعان ارنايى توپ قاراتاي قالاسىنا ارنايى كەلىپ, جەرگىلىكتى ماماندارعا جوبانىڭ ماڭىزدىلىعىن ءتۇسىندىردى.
ۇيلەستىرۋشىلەر كەلتىرگەن دەرەككە سەنسەك, ء«شوپ تامىرى» جوباسى 27 جىلدان بەرى ۇزدىكسىز قىزمەت اتقارىپ جاتىر. باستى ماقساتى – ۇكىمەتتىك ەمەس ۇيىمدار مەن مەديتسينالىق جانە ءبىلىم مەكەمەلەرىنە قولداۋ كورسەتۋ ارقىلى حالىقتىڭ از قامتىلعان ساناتىنىڭ ءومىر ءسۇرۋ ساپاسىن جاقسارتۋ.
«راسىندا دا, ء«شوپ تامىرى» – ادام قاۋىپسىزدىگىن قامتاماسىز ەتۋ بويىنشا الەۋمەتتىك جوبالارعا ارنالعان قايتارىمسىز كومەك باعدارلاماسى. جوبا شەڭبەرىندە مەديتسينا ورتالىقتارعا, ەكولوگيالىق ايماقتارعا, وقۋ ورىندارىنا, مۇمكىندىگى شەكتەۋلى جاندارعا, بالالار ۇيىنە قولدان كەلگەنشە كومەك كورسەتىلىپ جاتىر. ەندى, مىنە, جوبا اياسىندا تالاس اۋداندىق جانە وبلىستىق كوپبەيىندى اۋرۋحاناعا الىنعان تۇرمىستىق-تەحنيكالىق جابدىقتار پايدالانۋعا بەرىلىپ وتىر. سونداي-اق بۇل جولعى ەرەكشەلىك – مەديتسينالىق قالدىقتاردى قاۋىپسىز جويۋعا ارنالعان پەشتىڭ ورناتىلۋى», دەيدى مارتەبەلى مەيماندار جاعدايدى ءتۇسىندىرىپ.
ءىس-شارا بارىسىندا جاپونيادان ارنايى كەلگەن ماماندار ەمدەۋ مەكەمەسىنە مەديتسينالىق قالدىقتاردى كادەگە جاراتۋعا ارنالعان «ۆەستا پليۋس» ينسينەراتور پەشىن جانە توڭازىتقىش پەن كىر جۋ ماشينالارىن ورناتتى. بۇل جۇمىس تەحنيكالىق جاراقتاندىرۋ جونىندەگى جوبا اياسىندا جۇزەگە اسىرىلىپ وتىر.
وبلىس اكىمدىگى دەنساۋلىق ساقتاۋ باسقارماسىنىڭ باسشىسى جانار وسپانوۆانىڭ ايتۋىنشا, ۇزدىكسىز جۇمىس اتقارىپ كەلە جاتقان جوبا ۇيلەستىرۋشىلەرىنىڭ جامبىل وبلىسىنداعى اۋدانعا نازار اۋدارعانى – قۇپتارلىق ءىس. جەرگىلىكتى ماماندارمەن كەزدەسۋ بارىسىندا كۇنشىعىس ەلىنەن كەلگەن قوناقتار مەديتسينا قىزمەتكەرلەرىن تولعاندىرعان ءتۇرلى سۇراققا ناقتى جاۋاپ بەردى. سونداي-اق ولار اۋداندىق اۋرۋحانا مەن ەمحانانى ارالاپ, ەمدەۋ ۇيىمىنىڭ الەۋەتىمەن تانىستى.
جامبىل وبلىسى,
تالاس اۋدانى
