ءوز كەزەگىندە جاھاندىق دەپوزيتارلىق قولحاتتار كومپانيانىڭ جاي اكتسيالارىنا 1-دەن 4-كە دەيىنگى اراقاتىناستا ۇسىنىلاتىن بولادى (1 دقك = 4 اكتسيا). ەڭ ماڭىزدىسى, بۇل ساتىلىمدا «حالىقتىق IPO» ەلەمەنتتەرى بار, ياعني جەرگىلىكتى ۇسىنىستاعى باعالى قاعازدار قازاقستانداعى AIX (دقك جانە اكتسيالار) جانە KASE (تەك اكتسيالار) الاڭدارىندا ينستيتۋتسيونالدىق جانە بولشەك ينۆەستورلارعا ۇسىنىلادى.
باعا دياپازونىن جانە روۋد-شوۋدى جاريالاۋدى قوسا العاندا, وتىنىمدەر كىتابىن (بۋكبيلدينگ) قالىپتاستىرۋ ءراسىمى شامامەن بيىل قاڭتار ايىنىڭ سوڭىندا ىسكە قوسىلادى دەپ جوسپارلانىپ وتىر.
ء«بىزدىڭ لوندون جانە قازاقستان بيرجالارىندا ليستينگ وتكىزۋ نيەتىمىز «ەير استانا» توبىنىڭ بەرىك نەگىزى بار ەكەنىن جانە ءبىزدىڭ ماڭىزدى نارىقتارىمىزدا اۋە تاسىمالى سانىن ارتتىرۋعا قاتىستى پەرسپەكتيۆامىز جوعارى ەكەنىن ايعاقتايدى. اكتسيالاردى باستاپقى جاريا ورنالاستىرۋ «ەير استانا» توبى ءوسىمىنىڭ كەلەسى كەزەڭىنە كوتەرىلۋگە اسەر ەتەدى دەپ ۇمىتتەنەمىز. ءبىز اۋە كەمەلەرى پاركىن ودان ءارى كەڭەيتۋ جوسپارلارى مەن وپەراتسيالىق يكەمدىلىكتى ارتتىرۋ باستامالارىن ەسكەرە وتىرىپ, قولدانىستاعى مارشرۋتتارىمىزدى نىعايتۋ جانە جاڭا گەوگرافيالىق ايماقتارعا شىعۋ بويىنشا ايتارلىقتاي مۇمكىندىكتەردى كورىپ وتىرمىز. مەن بارلىق قىزمەتكەرلەرىمىزگە وسى جوباداعى كۇش-جىگەرى مەن كاسىبيلىگى ءۇشىن العىس ايتقىم كەلەدى جانە ءبىز جاريا نارىقتارداعى ءوسۋ تاريحىمىزدى جالعاستىرا وتىرىپ, الەۋەتتى ينۆەستورلاردى اسىعا كۇتەمىز», دەيدى كومپانيا باسشىسى پيتەر فوستەر.
قارجىگەر عالىم قۇسايىنوۆتىڭ ايتۋىنشا, مەملەكەتتىك سەكتورلارداعى وزگە IPO-لارمەن سالىستىرعاندا «ەير استانانى» الدەقايدا نارىقتىق كومپانيا دەپ ايتۋعا بولادى.
«ولاردا تاۋەلسىز باسقارۋ بار, الەۋمەتتىك جۇكتەمە جوق جانە كومپانيا جۇمىسى پايدا تۇسىرۋگە باعىتتالعان. كوبىسى ولاردى سىنعا الادى, بىراق مەن ولاردىڭ ۇزاق ۋاقىت جۇمىس ىستەگەنىن قالايمىن, سەبەبى بۇل – وتە ۇلكەن تاۋەكەلدەرى بار كۇردەلى بيزنەس. IPO كومپانياعا تاۋەلسىزدىك سىيلايدى جانە بۇل – مەملەكەتتىڭ پورتفەلدى ينۆەستور رەتىندە مەملەكەت باسقارعاننان دا ءتاۋىر اقشا تاباتىنىن كورسەتەتىن ناقتى مىسال. ءبىز كومپانيا شامامەن 1 ملرد دوللار كولەمىندە باعالانادى دەپ ەسەپتەيمىز», دەيدى Teniz Capital Investment Banking باسشىسى.
كومپانياعا قاتىستى سىني پىكىرلەر دە بارشىلىق. سونداي كوزقاراستى تاۋەلسىز قارجى ساراپشىسى اندرەي چەبوتارەۆ بىلدىرگەن.
«بۇكىل زاڭنامادان «ۇلتتىق اۋە تاسىمالداۋشى» دەگەن تۇسىنىك باياعىدا الىنىپ تاستالعانىنا قاراماستان «ەير استانا» مۇنى ءوزىنىڭ ەسەپتەرىندە دە, سايتىندا دا ءالى كۇنگە يەلەنىپ كەلەدى. ەكىنشىدەن, ەگەر كومپانيا IPO-نى 2024 جىلدىڭ ناۋرىز-ءساۋىر ايلارىنا جاقىن وتكىزسە, قازىر ءتىپتى زاڭدى تۇلعاسى جوق FlyArystan-دى ءبولۋ ماسەلەسى جويىلادى. ويتكەنى بۇل اكتسيا قۇنىنا جاعىمسىز اسەر ەتۋى مۇمكىن. بۇعان «ەير استانانىڭ» قازىر بۇكىل قازاقستان بويىنشا جۇرگىزىپ جاتقان «ەكى برەند, ءبىر تابىس تاريحى» دەگەن تاڭعالارلىق جارنامالىق ناۋقانى دا دالەل. اۋە كومپانياسى ەكىگە ءبولىنۋدى قالامايدى جانە سول جولدا بار مۇمكىندىگىن سارپ ەتىپ جاتىر. يندۋستريا جانە ينفراقۇرىلىمدىق دامۋ ۆيتسە-ءمينيسترى ايتقانداي FlyArystan 2024 جىلى زاڭدى تۇلعا بولۋعا ءتيىس ەدى. ۇشىنشىدەن, بۋكراننەرلەرگە (ينۆەستورلار ءوتىنىمىن جيناۋمەن اينالىساتىن كومپانيا – رەد.) جاساعان تاڭداۋى دا قىزىق. باتىس نارىعىندا بىرلەسكەن جاھاندىق ۇيلەستىرۋشى جانە بۋكراننەر رەتىندە Citigroup Global Markets Limited جانە Jefferies International Limited جۇمىس ىستەيدى, سونداي-اق WOOD & Company Financial Services بار. قازاقستاندا IPO-نى ساتۋمەن Halyk Finance اينالىسادى. جەتەكشى مەنەدجەر رەتىندە Freedom Finance Global PLC, كو-مەنەدجەر رەتىندە BCC-Invest, SkyBridge Invest جانە Jusan Invest تانىستىرىلدى. «قازمۇنايگاز»-دىڭ جەرگىلىكتى IPO-سىمەن سالىستىرعاندا بۇل جەردە بۋكراننەرلەر يەرارحياسى بار», دەيدى.
ەسكە سالا كەتەيىك, جاقىندا عانا «ەير استانا» كومپانياسى اكىمشىلىك جاۋاپكەرشىلىككە تارتىلىپ, 876 ملن تەڭگە كولەمىندە ايىپپۇل سالىندى. باسەكەلەستىكتى قورعاۋ جانە دامىتۋ اگەنتتىگى مەن پروكۋراتۋرا جۇرگىزگەن تەكسەرىس ناتيجەسىندە, كومپانيانىڭ ۇشىپ شىققان كۇن نەمەسە جاقىن كۇندەردەگى بيلەتتەر ساتىپ الىنعان كەزدە جولاۋشىلاردىڭ بارلىق ساناتتارىنان 3 500-دەن 6 500 تەڭگەگە دەيىنگى مولشەردە جانارماي الىمىن نەگىزسىز العانى انىقتالعان. وسىدان سوڭ كومپانياعا ىشكى رەيستەردىڭ باعاسىن 2024 جىلدىڭ سوڭىنا دەيىن كوتەرمەۋگە جانە 2023 جىلدىڭ 6 جەلتوقسانىنان باستاپ جانارماي الىمىن الىپ تاستاۋعا مىندەتتەلدى.
