سۋرەتتى تۇسىرگەن – ەرلان ومار, «EQ»
ارينە, ءتۋريزمدى تابىس كوزىنە اينالدىرۋعا كەز كەلگەن اۋىلدىقتىڭ الەۋەتى جەتە بەرمەيدى. مەملەكەت قازىر كاسىپكەرلەرگە, سونىڭ ىشىندە جاس كاسىپكەرلەرگە قولداۋ كورسەتىپ جاتقانىن بىلەمىز. تەك بولىنگەن قارجى بارشاعا بىردەي بۇيىرمايدى. مۇمكىندىكتى قولى جەتكەندەر عانا پايدالانادى. ورايى كەلگەندە ءتۋريزمدى دامىتۋعا سەپتەسەتىن تاعى ءبىر ءساتتى قادام جايىندا ايتالىق.
بىلسەڭىزدەر, ەلىمىزدەگى ءىرى ءوندىرىس كومپانيالارى ءوزىنىڭ نەگىزگى جۇمىسىنان تىس الەۋمەتتىك باعدارلامالارعا قولداۋ كورسەتىپ وتىرادى. مىسالى, 2022 جىلى ورتالىق ازيانىڭ ەۋرازيا قورى سەرىكتەس «شەۆرون» كومپانياسىمەن بىرگە «بايتاق جەر» جوباسىن əزىرلەگەن. جوبا جەتەكشىلەرى كەڭەسە كەلە ەكوتۋريزم, ەتنوتۋريزمدى دامىتۋعا قولايلى اۋىلداردى كوپشىلىككە تانىتۋدى جوسپارلاعان. سونىڭ ءبىر باعىتى بيزنەس جوباسىن ىسكە اسىرا الماي جۇرگەن اۋىل تۇرعىندارىن قولداۋ ارقىلى ىشكى ءتۋريزمنىڭ كوكجيەگىن كەڭەيتۋ بولىپتى. بىلتىر جازدا قور مەن كومپانيانىڭ وكىلدەرى ولكەنىڭ كورسە كوز تويمايتىن تابيعاتىن ودان ءارى تانىتا ءتۇسۋ ءۇشىن باق قۇرالدارىن قورعالجىن, زەرەندى, ساندىقتاۋ باعىتىن قامتيتىن تۋرعا شاقىرعان ەدى. ساپار بارىسىندا ءبىز ءۇش اۋداندا قارجىلاي قولداۋدىڭ شاراپاتىن كورگەن كاسىپكەرلەرمەن جۇزدەسىپ, ىسىنە تابىس تىلەگەنبىز. كوپ ۇزاماي جوبانىڭ ەكىنشى كەزەڭى قازاندا باستالىپ, 70-تەن اسا جەرگىلىكتى كاسىپكەر ءوتىنىم قالدىرعان ەكەن. ارينە, بۇل تىزىمدە جوبا جەتەكشىلەرى ۇيىمداستىرعان ارنايى ساباقتان ءوتىپ, ىرىكتەلگەندەر, وزىنە تيەسىلى قارجىلاي قولداۋدان قۇر قالمادى.
جوبا مامانى ايجان جانسۇلتانوۆانىڭ ايتۋىنشا, بيزنەسكە قاراستىرىلعان قارجىنىڭ شاراپاتى مول. ونىڭ ۇستىنە اقمولانىڭ تابيعاتىن تۋريستەر جازدا عانا ەمەس, قىستا دا قىزىقتاي الادى.
– اگروتۋريزم دە – ءتۋريزمنىڭ ءبىر باعىتى. اسىرەسە, كوكشەنىڭ كوز تارتاتىن تابيعاتى اگروتۋريزمگە جايلى. مۇنى باسقا-باسقا كاسىپكەرلەر جاقسى بىلەدى. ولار قوناقۇي, مەيرامحانالار سالىپ, تۋريستىك ينفراقۇرىلىمدار دامىسا, ايماققا ينۆەستورلار قىزىعا باستايدى. جاڭا جۇمىس ورىندارى اشىلادى. ءتۇپتىڭ تۇبىندە وسىنىڭ بارلىعى جەرگىلىكتى تۇرعىنداردىڭ تۋريستەرگە كوزقاراسىن وزگەرتەدى. جەرگىلىكتى حالىق تۋريستەردىڭ نەگە قىزىعاتىنىن شىنداپ تۇسىنە باستايدى. ايماقتىڭ تۇراقتى دامۋىنا جول اشىلادى. اگروتۋريزممەن كەلگەن تۋريستەر ورمانشىلارمەن بىرگە اڭ-قۇس, وسىمدىكتەردى تاماشالاپ, اعاش داندەرىن جيىپ, كوشەت وتىرعىزا الادى. وسىلايشا, تابيعاتتى قورعاۋعا تيتتەي دە بولسا ۇلەس قوسادى. بۇل اۋىلدىڭ تىنىس-تىرشىلىگىنەن حاباردار جاندارعا قىزىقسىز كورىنۋى مۇمكىن. دەگەنمەن تۋريستەرگە قىزىق, – دەيدى ا.جانسۇلتانوۆا.
