اقتوبە وبلىسىنىڭ تابيعاتى تازا, مال ءوسىرىپ, بيداي, قارا بيداي, تارى, ارپا ەگىپ, بىرىڭعاي اۋىل شارۋاشىلىعىمەن اينالىسىپ كەلە جاتقان اۋداننىڭ ەڭبەكقور تۇرعىندارى بۇل جاڭالىققا ەرەكشە قۋاندى. ويتكەنى ىرگەسى سوگىلمەگەن بۇل اۋىل قازاننان مامىرعا دەيىن كۇل شىعارىپ, كومىر جاعۋدىڭ بەينەتىن جاقسى بىلەدى. اۋىلدى ۇستاپ تۇرعان ءىرى شارۋاشىلىقتار بولماعاندا, جۇرتى باياعىدا كوشىپ كەتەر مە ەدى؟..
قۇمقۇدىقتىڭ شەتىندەگى ۇيلەرگە گاز قۇبىرى كىردى, ەندى بىرتىندەپ بارلىق كوشەگە تارتىلا باستادى. وسى جۇمىستىڭ ۇزاڭقىراپ كەتۋىنە ايتەكە بي اۋدانى ەلدى مەكەندەرىنىڭ ءبىر-بىرىنەن قاشىقتىعى دا سەبەپ بولدى. قۇمقۇدىققا گاز تارتۋ جۇمىستارىنا ەكى جىل بۇرىن بيۋدجەتتەن 4,1 ملرد تەڭگە بولىنگەن. ەندى, مىنە وسى قاراجاتقا 89,6 شاقىرىم گاز قۇبىرى جۇرگىزىلدى. ايتەكە بي اۋدانىنىڭ اكىمى داۋلەتيار توعىزباەۆ اۋىلداستارىنىڭ قۋانىشىنا ورتاقتاسىپ, كوگىلدىر وتىن كىرگەن ۇيلەرگە ارنايى سوعىپ شىقتى. «بۇگىن اۋىل تۇرعىندارى كۇل شىعارىپ, كومىر كىرگىزۋدىڭ بەينەتىنەن قۇتىلىپ جاتىر. ءبىزدىڭ جاقتا قىس ۇزاق, التى اي كومىر جاعامىز. ونىڭ ۇستىنە, ءبىر ءۇيدى جىلىتۋعا كەمى التى توننا كومىر كەرەك. جىل سايىن كومىر باعاسىنىڭ كوتەرىلىپ جاتقانى ءوز الدىنا. قالاي بولعاندا دا تابيعي گازبەن جىلىتۋ ءارى ارزان, ءارى اۋىلداستارىما قولايلى», دەيدى داۋلەتيار توعىزباەۆ.
قازىرگى كەزدە ايتەكە بي اۋدانىنداعى 27 ەلدى مەكەننىڭ 13-ءى گازداندىرىلدى. بيىل اۋداندا قۇنى 2,3 ملرد تەڭگە بولاتىن جوبا جوسپارعا ەندى. وسى ارقىلى سۇلۋكول, اقتاستى, تولىباي, ايكە, تەرەڭساي اۋىلدارىنا كوگىلدىر وتىن كىرگىزىلەدى. مۇنىمەن ءبىر كەزدە قياقتى, ۇلعايسىن ەلدى مەكەندەرىنە دە گاز جەتكىزۋ بويىنشا جوبالىق-سمەتالىق قۇجاتتاما ازىرلەنىپ, رەسپۋبليكالىق جانە جەرگىلىكتى بيۋدجەتتەردەن قارجىلاندىرۋعا بيۋدجەتتىك ءوتىنىم ۇسىنىلدى.
اقتوبە وبلىسى
