شەبەرلىك ساباعىنا اكۋشەر جانە گينەكولوگيا, ۋرولوگيا, تراۆماتولوگيا, پسيحياتريا جانە مەديتسينانىڭ باسقا دا باعىتتارى بويىنشا تانىمال جەتەكشى ساراپشىلار شاقىرىلعان. شەتەلدىك ساراپشىلاردىڭ اراسىندا رەسەي, يزرايل جانە گەرمانيا سەكىلدى بىرنەشە ەلدىڭ عالىمدارى مەن ماماندارى بولدى.
استانا مەديتسينا ۋنيۆەرسيتەتىنىڭ پرورەكتورى مەرۋەرت گازاليەۆانىڭ ايتۋىنشا, مەديتسينا سالاسى جىل وتكەن سايىن دامۋدىڭ ۇستىنە دامىپ كەلەدى. ءار جىلدارى اۋرۋدى دياگنوستيكالاۋ, ەمدەۋ, الدىن الۋدىڭ جاڭا تاسىلدەرى پايدا بولادى. ءدارى-دارمەكتىڭ دە ءتۇر-ءتۇرى شىعىپ جاتىر.
– ەلىمىزدە ەڭ جاڭا دەگەن جابدىقتارمەن جاراقتاندىرىلعان جانە شتاتىندا قاجەتتى بەيىندەگى ماماندارى بار كلينيكالار سانى ارتىپ كەلەدى. بۇل ەلدىڭ دەنساۋلىق ساقتاۋ سالاسىن جاقسارتۋعا جانە ەل ازاماتتارى ءۇشىن ساپالى مەديتسينالىق كومەككە قول جەتكىزۋدى قامتاماسىز ەتۋگە ۇمتىلىسىن كورسەتەدى. مامانداردىڭ كاسىبي دەڭگەيىن ارتتىرۋ, كلينيكالىق پراكتيكاعا وزىق تەحنولوگيالار مەن ەمدەۋ ادىستەرىن ەنگىزۋ ماقساتىندا وسىنداي ءىس-شارانى ۇيىمداستىرۋ تۋرالى شەشىم قابىلداندى», دەدى سەمينار بارىسىندا ءسوز سويلەگەن م.گازاليەۆا.
شەبەرلىك ساباقتارى قالالىق كوپبەيىندى اۋرۋحانالاردىڭ, قالالىق پسيحيكالىق دەنساۋلىق ورتالىعىنىڭ, اكادەميك نۇرلان باتپەنوۆ اتىنداعى تراۆماتولوگيا جانە ورتوپەديا عىلىمي ورتالىعىنىڭ, سونداي-اق استانا قالاسىنىڭ ەمحانالارىنىڭ وپەراتسيالىق بلوكتارى مەن كلينيكالىق بازالارىندا جالعاستى.
شەبەرلىك ساباعىنا كەلگەن مەديتسينا ماماندارى ءوز بەيىنى بويىنشا بىرنەشە وپەراتسياعا قاتىسقان. پراكتيكالىق جۇمىس كلينيكالىق بولىمشەلەردە, انەستەزيولوگيا, رەانيماتولوگيا جانە قارقىندى تەراپيا بولىمشەلەرىندە ءوتىپتى. سونىمەن قاتار پراكتيكالىق ساباقتار كلينيكالىق بازالاردىڭ وپەراتسيالىق بلوگىندا, استانا مەديتسينا ۋنيۆەرسيتەتىنىڭ سيمۋلياتسيالىق ورتالىعىندا جالعاسقان. سەمينار بارىسىندا ءبىلىم الۋشىلارعا لاپاروسكوپيا مەن گيستەروسكوپيانىڭ اسقىنۋلارىن, پرەەكلامپسيا, ەكلامپسيا, ترومبوەمبوليامەن اۋىراتىن ناۋقاستاردى باقىلاۋ ۇلگىلەرىن, سونداي-اق كەسىر تىلىگىنەن كەيىن پايدا بولاتىن جاعدايلاردى جانە ودان كەيىنگى جۇكتىلىكتى باقىلاۋ تاجىريبەسىن زەردەلەۋگە مۇمكىندىك بەرىلدى.
عالىمدار قاتىسۋشىلارمەن بىرگە اياق, جامباس, توبىقتىڭ جانە تىزەنىڭ كۇردەلى سىنۋ جاعدايلارىن تالدادى. سونىمەن قاتار رەكونسترۋكتيۆتى ۋرولوگيا جانە ەرلەر دەنساۋلىعى مەديتسيناسى ماسەلەلەرى تالقىلاندى. وسى باعىت بويىنشا پراكتيكالىق شەبەرلىك ساباعىندا ۇرپىگە جاسالاتىن ميكروحيرۋرگيالىق وپەراتسيالار, قۋىق ىسىگىنىڭ لازەرلىك رەزەكتسياسى تالداندى. وسى كۇنى استانا مەديتسينا ۋنيۆەرسيتەتىنىڭ پرورەكتورى مەديتسينالىق كومەك كورسەتۋ ستاندارتتارىنىڭ تۇراقتى دامۋى جاعدايىندا ءبىلىم مەن تاجىريبەنى تاراتۋدا شەبەرلىك ساباقتارىنىڭ ماڭىزى زور ەكەنىن اتاپ ءوتتى.
– حالىقارالىق ساراپشىلاردى شاقىرۋ ۋنيۆەرسيتەتتىڭ ستراتەگيالىق ماقساتتارىنا قول جەتكىزۋ پارامەترلەرىنىڭ ءبىرى سانالادى. بۇل قادام ءبىلىم الۋشىلاردىڭ كلينيكالىق دايارلىعىن ينتەرناتسيونالداندىرۋ ۇدەرىسىنە, تالىمگەرلەردىڭ, وقىتۋشى-پروفەسسور قۇرامنىڭ, دارىگەرلەردىڭ, ەلوردانىڭ پراكتيكالىق دەنساۋلىق ساقتاۋ سالاسىنىڭ ورتا مەديتسينا قىزمەتكەرلەرىنىڭ بىلىكتىلىگىن ارتتىرۋعا ىقپال ەتەدى, – دەپ تۇيىندەدى م.گازاليەۆا.
