ءتورت جاسىنا دەيىن بالالار ۇيىندە تاربيەلەنىپ, قازاقى ورتادا تانىمى قالىپتاسقان ءبۇلدىرشىندى امەريكاعا الىپ كەتەدى. ءلاززات تۋعان جەرىنەن الىستاعان سوڭ باسىنان كوپ قيىندىق وتكەنىن جاسىرمادى.
- ءوزىمنىڭ كىم ەكەنىمدى تۇسىنبەي ءوستىم, مەن كىممىن دەگەن سۇراقتى كوپ قويدىم وزىمە. تۇماننىڭ ىشىندە جۇرگەندەي سەزىندىم ءوزىمدى. مەنى اسىراپ العاندار ءبىر نارسەنى قايتالاي بەرەتىن. جەتىمدەر ۇيىندە قالعانىڭدا ىشكەنىڭ ءىرىڭ, جەگەنىڭ جەلىم بولاتىن ەدى دەگەندى ايتا بەردى. قازاقستاندا تۇرساڭ ءومىرىڭ ناشار بولاتىن ەدى دەيتىن. ءوز ەلىمنەن, مادەنيەتىمنەن ج ۇلىنىپ قالعانداعى كۇيىمدى سەزىندىرمەدى. سوزبەن اياماي سابادى, - دەيدى ءلاززات «شەتەلدەگى قازاق بالالارى» باعدارلاماسىنا بەرگەن سۇحباتىندا.
اۋىر سىناقتى كەشىپ, جاقىن دەگەن جاندارىنان قولداۋ تاپپاعان ءلاززات قورعانىشتى باسقالاي سەزىنۋگە تىرىسقان. قازىر ونىڭ 2 جاسار ۇلى بار.
- ءبىر جىگىتپەن كەزدەسىپ جۇرگەنمىن, ارامىزدا سونداي سەزىم دە بولمادى. بىردە بار, بىردە جوق بولىپ كەتەتىن. ءسويتىپ جۇرگەندە قالاي بالا كوتەرىپ قالعانىمدى بىلمەدىم, - دەيدى ول.
ءلاززاتتىڭ بويىنا بىتكەن بالا دا ارالارىنداعى سەزىمدى وياتپاپتى. امەريكالىق جىگىت ءوز جونىمەن كەتكەن. ءلاززات ءوز ءومىرىن رەتتەي الماي جۇرگەندە بالانىڭ ءومىرىن قۇرتىپ الامىن دەپ ويلاپ, بالاسىن اشىق تۇردە اسىراپ الاتىن وتباسىعا بەرگەن. 2 جاستاعى ۇلىنىڭ اتا-اناسى قازىر ونى بيولوگيالىق اناسىمەن ءجيى كەزدەستىرىپ تۇراتىن كورىنەدى.
ءلاززات ءوزىن كىشكەنتايىنان وسىرگەن ادامداردان پسيحولوگيالىق قىسىم كورگەن.
- ۇرىپ-سوققان جوق, قول كوتەرگەن جوق, بىراق سوزبەن اياماي سابادى. اۋىر سوزبەن-اق جانىمدى تىلگىلەپ, جارالاعاندارىن وزدەرى دە تۇسىنبەگەن شىعار. ولار ماعان ەموتسيالىق تۇرعىدان زورلىق-زومبىلىق جاسادى. سەزىمدەرىمنىڭ قۇنىن ءتۇسىردى, قورلادى. ولاردىڭ تۇسىنىگىندە "وسىعان دا قايعىرا ما ەكەن" دەگەن كەكەسىن بولدى. مەنىڭ باسىمنان ءوتىپ جاتقان دۇنيەنى ماڭىزدى دەپ ەسەپتەمەي, تۇككە تۇرعىسىز قىلدى, - دەدى ءلاززات سۇحباتىندا.
