اۋەلگى اڭگىمەنى سارقان اۋدانىنان باستاساق. المالى اۋىلىنىڭ كەلىنى, بىرلىكتىك اسەم قالاباەۆا ءوز كاسىبىنىڭ ناتيجەسىندە تابىسقا جەتكەن. ناۋبايحانا جەتەكشىسى اسەم قالاباەۆانىڭ نەگىزگى ماماندىعى – ءسۇت ونىمدەرىنىڭ تەحنولوگى. نەگىزگى كاسىبىنە جۇمىسسىز كەزىنەن كىرىسكەن ول الدىمەن ۇيدە وتىرىپ نان پىسىرە باستايدى. كەيىننەن تاپسىرىس كوبەيىپ, ناۋبايحانا اشۋدى ماقسات ەتەدى. بۇگىندە ناۋبايحانا نان ونىمدەرىمەن تەك سارقان اۋدانىنىڭ عانا ەمەس, كورشىلەس اقسۋ اۋدانىنىڭ تۇرعىندارىن دا قامتىپ وتىر. اشىلعانىنا 3 جىل بولعان شاعىن ناۋبايحانادا 7 ادام جۇمىس ىستەيدى. 1 كولىك جۇرگىزۋشى جانە 6 ناۋبايحاناشى بار. 6 ادام كەزەكپەن نان پىسىرەدى.
«كاسىبىمدى ەڭ العاش 2 قاپ ۇنمەن باستادىم. ءبىر قاپ ۇننان شامامەن 130 بولكە شىعادى. سارقان اۋدانىنان بولەك اقسۋ اۋدانىنىڭ قاراكەمەر, قىزىلتۋ, قىزىلتاڭ, ساعابۇيەن, قاراشىلىك اۋىلدارىن دا نان تۇرلەرىمەن قامتاماسىز ەتىپ وتىرمىز. بىزدە ناننىڭ 5 ءتۇرى, توقاش, جۇقا نان, حوتدوگ, لاكومكا سياقتى تۇرلەرى دە دايىندالادى. ناۋبايحانا ورنالاسقان ءۇيدى جالعا الدىق. نان تۇرلەرىن ازىرلەيتىن نۇرجامال داۋتوۆا, راۋشان قاسىمبەكوۆا, سۆەتلانا كيزيلوۆا, تاتيانا ميحايلوۆا, مارلان مارات, ماكسيم سىۆوۆيچ ءوز ءىسىنىڭ شەبەرلەرىنە اينالدى. جازدىڭ اپتابى مەن قىستىڭ قىتىمىر سۋىعىنا قاراماي ىستىق ناندى تۇتىنۋشىلارعا جەتكىزەتىن ەردەنبەك ءىلياسوۆ ەسىمدى جۇرگىزۋشىمىز دە ءوز ىسىنە بەرىلگەن», دەيدى ءا.قالىباەۆا.
اسەم بۇل كاسىپكە كەزدەيسوق كەلگەن جوق. ەڭ العاش تاندىر نان ءپىسىرىپ ساتتى. قىرعىزدىڭ تاندىر نانىن ءپىسىرىپ, سارقان مەن جانسۇگىردەگى تۇتىنۋشىلارعا جەتكىزىپ ءجۇردى. سول كەزدە ۇلكەن ناۋبايحانا اشۋدى ماقسات تۇتتى. بىردە نان تاراتۋدان قالتاسىندا 16 مىڭ قالعان. جالعىزباستى انا 16 مىڭعا ۇيدەگى 3 بالاسىنا تاماق نەمەسە ۇن الامىن با دەگەن تاڭداۋ ۇستىندە بولعانىن ەسكە الدى. سول كۇنى 16 مىڭعا 2 قاپ ۇن الىپ, تاۋەكەل دەپ كاسىبىن باستاپ كەتتى. قازىر تاۋلىگىنە 1 500 بولكە نان پىسىرەدى. سودان ءىسى ىلگەرى جىلجىدى. وسى كاسىپتىڭ ناتيجەسىندە ءۇيلى دە بولدى, نان تۇرلەرىن تاسيتىن «تويوتا پرەۆيا» اۆتوكولىگىن دە ساتىپ الدى. ءونىم ساپاسى ۇنعا بايلانىستى. سول سەبەپتى ونى ارنايى وسكەمەن قالاسىنان الدىرادى. تۇتىنۋشىلاردىڭ تالعامىنان شىعۋ ماقساتىندا ءونىمنىڭ سانىنا ەمەس, ساپاسىنا باسا ءمان بەرەدى. قاسىنداعى نۇرجامال مەن راۋشان اپكەلەرى – كەڭەستىك كەزەڭدە وسى سالادا ەڭبەك ەتكەن تاجىريبەلەرى مول جاندار. ءوزىنىڭ اناسى سياقتى اقىل-كەڭەستەرىن ايتىپ, بىلمەگەنىن ۇيرەتىپ وتىرادى. ناۋبايحانانىڭ كومەگىمەن وزىمەن بىرگە 7 وتباسىنىڭ ناپاقاسىن ايىرىپ وتىر. سوندىقتان اسەم قالاباەۆانىڭ باعىندىرار بيىگى, الاتىن اسۋى ءالى دە كوبەيە بەرمەك.
ال جاركەنتتىك ناننىڭ جايى بولەك. اسىرەسە پەشكە پىسكەن توقاشى جوعارى سۇرانىسقا يە. قاي كەزدە دە سىرتتان كەلگەن مەيمان ەلىنە قايتاردا تاندىر نانىن قورجىنىنا تولتىرا الىپ كەتەتىنىن بايقاپ تا ءجۇرمىز. بۇگىندە تەك جاركەنت قالاسىنىڭ وزىندە حالىققا ارناپ نان پىسىرەتىن 20-دان اسا ناۋبايحانا جۇمىس ىستەپ تۇر.
كوكتالدىق ەربوسىن جولتىقوۆ – جاركەنت وڭىرىندەگى ءوز ءوندىرىسىن ورگە جۇزدىرگەن تابىستى كاسىپكەرلەردىڭ ءبىرى. ول بۇگىندە نەمىس تەحنولوگياسىمەن جۇمىس ىستەيتىن تۇرىك پەشتەرى ورناتىلعان ناۋبايحانادا تاۋلىك سايىن 2 توننادان استام ۇننان 20-عا جۋىق نان ءونىمىن پىسىرەدى. جاركەنت قالاسىمەن قاتار كورشىلەس ۇيعىر, كەربۇلاق اۋداندارىنىڭ تۇرعىندارىن اس اتاسىمەن قامتاماسىز ەتىپ وتىر.
كەيىنگى جىلدارى «قورعاس» شەكارا ماڭى ىنتىماقتاستىق حالىقارالىق ورتالىعى» ارقىلى وتاندىق ونىمدەرىن قىتاي نارىعىنا دا شىعارىپ ءجۇر. «جولتىقوۆ» جەكە كاسىپورنى وندىرگەن ساپالى نان ونىمدەرىنە تۇتىنۋشىلار سۇرانىسى جىل وتكەن سايىن ارتقان. بۇعان كاسىپورىندا ەڭبەك ەتەتىن 22 ەڭبەككەردىڭ ءوز جۇمىسىنا ەرەكشە جاۋاپكەرشىلىكپەن قاراپ, وندىرگەن ونىمدەرىنىڭ ساپاسىن جوعارىلاتاتىن تەحنولوگيالاردى جەتىك مەڭگەرۋى نەگىز بولعان.
ء«بىزدىڭ ناۋبايحانا جۇمىسشىلارى ەكى كەزەكپەن كۇن-ءتۇن دەمەي ەڭبەك ەتىپ, تۇتىنۋشىعا ءار تاڭدا پەشتەن جاڭا شىققان نان ونىمدەرىن ۇسىنىپ كەلەدى. جۇمىس بارىسىندا ماماندارىمىز بارلىق تەحنولوگيالىق تالاپتى ساقتاي وتىرىپ, ءونىم ساپاسىن تۇسىرەتىن, تۇتىنۋشى تالاپتارىنا قايشى اسىعىس قارەكەتتەرگە جول بەرمەيدى. كاسىپورىن ىسكە كىرىسكەن العاشقى كۇننەن بەرى بىزبەن بىرگە جۇمىس ىستەپ جۇرگەن ماماندارىمىزدىڭ بىلىكتىلىگى تۇتىنۋشىلار الدىنداعى بەدەلىمىزدىڭ جوعارىلاپ, ءبىزدىڭ ونىمدەرگە سۇرانىستىڭ ارتۋىنا كوپ ىقپال ەتىپ وتىر», دەيدى كاسىپورىن باسشىسى.
«جولتىقوۆ» جەكە كاسىپورىنىنىڭ ناۋبايحاناسى 2007 جىلدان بەرى حالىققا نان ونىمدەرىن ءپىسىرىپ ساتا باستادى. وتكەن عاسىردىڭ توقسانىنشى جىلدارىنىڭ سوڭىندا اۋىلداسى ابليز سۋفيانوۆپەن بىرىگىپ, جەكە كاسىپكەرلىكتى قولعا العان ەربوسىن سول كەزەڭنىڭ سۇرانىسىنا قاراي الدىمەن ءوز اۋىلى كوكتالدا, كورشىلەس كەربۇلاق اۋدانىنىڭ شوقان اۋىلىنا ديىرمەن سالىپ, جەرگىلىكتى حالىقتى ۇنمەن قامتاماسىز ەتكەن. ۋاقىت وتە كەلە, ەلىمىزدىڭ سولتۇستىك ايماعىندا استىق ءوسىرۋ ءۇردىسى جوعارىلاپ, بازاردا ۇن كوبەيگەن تۇستا ەربوسىن ەندى ءونىمدى وڭدەپ ساۋدالاۋدىڭ كەزەڭى تۋىنداعانىن تۇسىنگەن. كوكتالداعى ديىرمەننىڭ جانىنان الدىمەن شاعىن ناۋبايحانا سالىپ, العاشقىدا جەرگىلىكتى حالىق كۇندەلىكتى تۇتىناتىن كادىمگى بولكە, توقاش نان ءپىسىرىپ ساتۋدى قولعا العان. جانىنا ءىنىسى قازىبەك پەن قارىنداسى اسەلدى, جوعارى ءبىلىمدى تەحنولوگ ماماندىعىن مەڭگەرگەن قىزى ءمادينانى الىپ, ناۋبايحانا ونىمدەرىنىڭ تۇرلەرىن كوبەيتكەن. قازىر «جولتىقوۆ» ناۋبايحاناسىندا پىسىرىلەتىن ءارتۇرلى نانمەن قاتار مەرەكەلىك داستارقانعا ارنالعان ءتاتتى توقاشتار, ديەتالىق نان تۇرلەرى وتە كوپ. تۇيمەداق, شيراتىلعان باتوندار, قالىپتىق بيداي نانى, سايكا, قارابيداي, كەبەك ناندارىنا سۇرانىس جوعارى.
كاسىپكەر مەملەكەتتىك باعدارلاما بويىنشا 40 ملن تەڭگە نەسيە الىپ, ءتورت تۇرىك پەشى مەن قامىر يلەيتىن, دايىن ءونىمدى تسەللوفان پاكەتپەن وراپ تىگەتىن قوندىرعىلار ساتىپ العان. جان-جاققا دايىن نان ونىمدەرىن تاسىمالداپ, دۇكەندەرگە تاراتاتىن ارنايى اۆتوكولىكتەردىڭ سانىن كوبەيتكەن. كاسىپورىن جۇمىسى ەكى اۋىسىممەن تاۋلىك بويى نان ونىمدەرىن دايىندايدى.
ء«تۇرلى دامدەۋىش قوسىلىپ, ءيى قانىپ, دايىن كۇلشەلەنگەن قامىردى ارنايى قوندىرعىدا بەلگىلى ۋاقىتتا تىندىرىپ, سودان كەيىن عانا پەشكە پىسىرۋگە قويامىز. پەشتەن ءپىسىپ شىققان ناندى ارناۋلى ورىندا سۋىتىپ, كەپتىرگەننەن كەيىن عانا اۆتوكولىكتەرگە تيەپ, دۇكەن سورەلەرىنە جونەلتەمىز. ءوز ءىسىن جەتىك مەڭگەرگەن مامانداردىڭ جاۋاپكەرشىلىگى مەن شەبەرلىكتەرىندە ءمىن جوق. ولاردىڭ اراسىندا كاسىپورىندا ۇزاق جىل ەڭبەك ەتكەن بىلىكتى ماماندار ءمولدىر بولاتبەكوۆا, نۇرگۇل قاليەۆا, دايىن ناندى ساۋدا ورىندارىنا تاراتاتىن جۇرگىزۋشىلەر نۇربولات بەردىباەۆ, قۋاندىق ورمانبەكوۆ, تايىر يسلاموۆ سىندى ەڭبەككەرلەردىڭ ەسىمىن اسا قۇرمەتپەن اتاعىم كەلەدى. ءبىزدىڭ ماقسات – حالىققا ساپالى ۇن ونىمدەرىن ۇسىنىپ, ەل العىسىن ارقالاۋ», دەيدى كاسىپكەر.
كاسىپورىن جەتەكشىسى ەربوسىن جولتىقوۆ كاسىپورىن جانىنان كونديتەرلىك تسەح جاساقتاپ, ساپالى ونىمدەرىن كورشىلەس قۇلجا, ءۇرىمجى قالالارىنا دەيىن تاراتۋدى جوسپارلاپ وتىر. بولاشاقتا جەمىس-جيدەگى مول ايماقتا تابيعي سۋسىن شىعارۋ ءىسىن قولعا الماق. وتاندىق ءوندىرىستى ورىستەتۋگە اتسالىسىپ جۇرگەن ەربوسىن جولتىقوۆتىڭ دا ىسىنە بەرەكە تىلەيمىز.
جەتىسۋ وبلىسى
