ەسكەلدىلىكتەر ءۇشىن ەكى اكىمدىك عيماراتىن سالىنۋىنا بار-جوعى ەكى اي عانا ۋاقىت كەتكەن. سەبەبى نىساندار بلوكتى-مودۋلدىك جابدىقپەن قالانعان. ءاربىرىنىڭ قۇنى 50 ملن تەڭگەنى قۇرايتىن قوس نىساننىڭ قۇرىلىسىن «Qaz Damu Construction» جشس جۇرگىزگەن. بۇرىن اۋىلدىق مادەنيەت ءۇيىنىڭ ءبىر بولىگىندە وتىرعان اكىمدىكتەگىلەر ەندى سۋ جاڭا نىساندا ماڭىزدى شارۋالارمەن اينالىسادى. ونىڭ ۇستىنە جاڭا عيماراتتا شاعىن كونفەرەنتسيا زالى دا قاراستىرىلعان. مۇندا اۋىل تۇرعىندارىمەن جيىندار ۇيىمداستىرۋعا قولايلى جاعداي جاسالعان. اشىلۋ سالتاناتىندا ءسوز العان اۋدان اكىمى ەلدوس احمەتوۆ قوس اۋىلدىڭ دا تۇرعىندارىن قۇتتىقتاپ, حالىقتىڭ تۇرمىس ساپاسىن ارتتىرۋ باعىتىنداعى جۇمىستارىمەن ءبولىستى. بيىل قاينارلى اۋىلىندا فەلدشەرلىك-اكۋشەرلىك پۋنكت سالىناتىنىن ايتىپ قۋانتتى.
سول كۇنى سىرىمبەت اۋىلىندا سپورتتىق نىساننىڭ دا لەنتاسى قيىلدى. جەرگىلىكتى مەتسەنات اۋىلدا قاڭىراپ بوس تۇرعان ەسكى امبۋلاتوريا عيماراتىن قايتا جاڭعىرتىپ, اۋىل بالالارىن سپورتقا بەيىمدەيتىن نىسانعا اينالدىرىپتى. ىشىنە زاماناۋي جابدىقتاردى ورنالاستىرعان قايىرىمدى ازامات ءوز قالتاسىنان 25 ملن تەڭگە قارجى جۇمساعان. كۇردەلى جوندەۋدەن وتكەن عيمارات ىشىنە جۋىناتىن جەردى دە ورنالاستىرعان. اۋدان اكىمى كاسىپكەردىڭ ارقاسىندا اۋىلدان الەمدىك ارەنالاردا توپ جاراتىن بوكس مايتالماندارى شىعاتىنىنا سەندىردى. سەبەبى مەتسەنات الداعى ۋاقىتتا وسى سپورتتىق نىساندا شىنىققان سپورتشىلاردىڭ الىس-جاقىن جەردە وتەتىن دودالارعا بارۋ-كەلۋ شىعىنىن ءوز موينىنا الىپ وتىر. سونىمەن قاتار جەرگىلىكتى اكىمدىك ماماندارىنىڭ سوزىنشە, كاسىپكەر كەلەر جىلى نىسان سىرتىنداعى بوس جاتقان ورىنعا فۋتبول جانە ۆولەيبول الاڭدارىن سالىپ بەرمەك. وسىلايشا, اۋىلداعى 350 بالانىڭ ۋاقىتى بوس وتپەي, سپورتپەن شۇعىلدانۋىنا جاعداي جاسالدى.
بۇل رەتتە جالعىزاعاش اۋىلىنىڭ تۇرعىندارى دا سىيسىز قالمادى. اۋىلدا سۋ جاڭا ۆەتەريناريا پۋنكتى پايدالانۋعا بەرىلدى. 15 جىلدان بەرى باسقا عيماراتتان جالعا الىپ كەلگەن اۋىلدىڭ مال دارىگەرلەرى ەندى زاماناۋي عيماراتتا ۋاقىت تالابىنا ساي قوندىرعىلارمەن جۇمىس ىستەمەك. سەبەبى ولاردىڭ جەدەل ءارى ءتيىمدى جۇمىس ىستەۋى ءۇشىن 11 كومپيۋتەر, 11 پلانشەت, ءتورت ت ۇلىككە سالىنعان ءچيپتى سكانەرلەيتىن قوندىرعى جانە جاڭا كولىك بەرىلدى. ونىڭ ۇستىنە عيماراتتا ءدارى-دارمەك ساقتايتىن قويما دا قاراستىرىلعان. قۇرىلىس جۇمىستارىنا اۋداندىق بيۋدجەتتەن 11 ملن تەڭگە بولىنگەن. ونى دا «Qaz Damu Construction» سەرىكتەستىگى جۇرگىزگەن. ايتپاقشى, اۋدانداعى مال دارىگەرلەرىنە بيىل بولىنگەن ەكى كولىكتىڭ ءبىرى الدابەرگەنوۆ اۋىلىنداعى ۆەتەريناريا پۋنكتىنە بەرىلىپتى.
اقسۋ اۋدانىنا قوسىلىپ, بۇرىنعى كەسكىن-كەلبەتىنەن ايىرىلا باستاعان قاپال اۋىلى بۇگىندە قايتا جاڭعىرىپ جاتىر. سونىڭ ايعاعىنداي قاپال اۋىلدىق وكرۋگىندە جاڭا اكىمدىك عيماراتى پايدالانۋعا بەرىلدى. عيماراتتىڭ اشىلۋ سالتاناتىنا اۋدان اكىمى بەرىك تىنىشباەۆ, اۋىل اقساقالدارى, اۋىل تۇرعىندارى قاتىستى.
«اۋىل كوركىنە ءسان قوسقان جاڭا اكىمدىك عيماراتى ەلدى مەكەننىڭ بولاشاعىن باياندى, كەلەشەگىن كەمەل ەتۋگە سەپتىگىن تيگىزەتىنىنە سەنەمىن. اۋىز سۋ جۇيەلەرىنە جوندەۋ جۇمىستارى جۇرگىزىلدى. الداعى ۋاقىتتا دا الەۋمەتتىك ماسەلەلەردى شەشۋ ارقىلى تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالعان يگى جۇمىستار جالعاسىن تابادى دەگەن ويدامىن», دەدى اۋىلدىق قوعامدىق كەڭەس توراعاسى ءسابيت ابىكەن ۇلى.
ساپالى اكىمدىك عيماراتىندا ءماجىلىس زالى, ماماندارعا ارنالعان 6 جۇمىس بولمەسى بار. بۇل نىسان الداعى ۋاقىتتا حالىق يگىلىگى ءۇشىن قىزمەت كورسەتەدى. جيىن سوڭىندا اۋىل قاريالارى ەلدى مەكەندى ەڭسەلەندىرۋگە ۇلەس قوسىپ, ەلگە قىزمەت ەتىپ جۇرگەن ازاماتتارعا اق باتاسىن بەردى.
كوپكە ءمالىم «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ماقساتىندا مەملەكەت باسشىسىنىڭ تاپسىرماسى اياسىندا بيىلعى جازدىڭ ورتاسىنان باستاپ استانا قالاسىندا پرەزيدەنت اكىمشىلىگىنىڭ, ۇكىمەت اپپاراتىنىڭ جانە ورتالىق مەملەكەتتىك ورگانداردىڭ بىرىڭعاي ءفرونتوفيسى رەتىندە ۇكىمەت اپپاراتىنىڭ جانىنان ازاماتتاردى قابىلداۋ ورتالىعى جۇمىس ىستەپ كەلەدى. وسى رەتتە وبلىس ورتالىعىندا جەتىسۋ وبلىسى اكىمدىگىنىڭ جانىنان قۇرىلعان ازاماتتاردى قابىلداۋ ورتالىعى اشىلىپ, حالىقتى ءبىر قۋانتتى. ورتالىق تۇرعىندارعا ەلەكتروندى-تسيفرلىق قولتاڭبامەن ءتۇرلى انىقتامالار بەرە الادى. وتىنىشتەردى قابىلداۋدى بىرىڭعاي جۇيەلى كونسۋلتاتسيالاۋعا, جەكە قابىلداۋلار مەن تىركەۋ جۇرگىزۋگە ماماندانعان. ياعني ورتالىق بازادا ازاماتتار كەز كەلگەن ۋاقىتتا مەملەكەتتىك ورگانعا ءوتىنىش بەرە الادى. سونداي-اق اتقارۋشى بيلىك وكىلدەرى ءوتىنىشى كەلىپ تۇسكەن ازاماتتارمەن كەزدەسۋ وتكىزەدى.
وسى ورايدا وبلىستىق دەنساۋلىق ساقتاۋ, ءبىلىم بەرۋ, الەۋمەتتىك قورعاۋ, جەر قاتىناسى, اۋىل شارۋاشىلىعى جانە تۇرعىن ءۇي-كوممۋنالدىق شارۋاشىلىق باسقارمالارى, تالدىقورعان قالاسى اكىمدىگىنىڭ تۇرعىن ءۇي قاتىناسى سياقتى مەملەكەتتىك ورگانداردان 19 قىزمەتكەر ارنايى ورتالىققا جىبەرىلدى. سونىمەن قاتار الداعى ۋاقىتتا ورتالىقتا جەرگىلىكتى اتقارۋشى جانە اۋماقتىق مەملەكەتتىك ورگانداردىڭ باسشىلارى ازاماتتاردى قابىلداۋ شاراسىن وتكىزۋ جوسپارلانىپ وتىر. بۇل رەتتە وڭىردەگى 32 باسشىنىڭ قابىلداۋ كەستەسى تولىعىمەن بەكىتىلدى.
جەتىسۋ وبلىسى
