سۋرەتتى تۇسىرگەن – اۆتور
اسىرەسە وسكەمەن – تارعىن – سامار جانە وسكەمەن – راحمان قاينارى تاس جولدارى ءجيى جابىلادى. تاۋ اراسى بولعان سوڭ داعى قاسات قار الىپ قالادى, كوشكىن تۇسەدى تاعىسىن-تاعى. سوڭعى ەكى-ءۇش كۇندە التاي, سامار وڭىرلەرىندە قار ادەتتەگى نورمادان قالىڭ ءتۇسىپ, تۇرعىنداردى ابىگەرگە سالعانى دا بار. جولعا شىققانى بىلاي تۇرسىن, اۋلادان اتتاپ باسا الماي قالعان. ساماردىڭ وزىندە قاردىڭ قالىڭدىعى 50 سانتيمەتردەن اسسا, كەي اۋىلدىق وكرۋگتەردە ءبىر مەترگە جۋىقتاعان. بۇل – تجد ماماندارىنىڭ بەرگەن مالىمەتى. ايتا كەتەيىك, ەكى كۇن ىشىندەگى قاردىڭ نورمادان اسىپ كەتكەنىن ەسكەرگەن اۋدان باسشىلىعى بىردەن كوكتەمگى سۋ تاسقىنىنا دايىندىق جۇمىستارىن دا پىسىقتاپ ۇلگەرگەن. ال اۋىل تۇرعىندارى ءبىر-بىرىنە قولۇشىن بەرىسىپ, اۋلا مەن كوشەلەردى قاردان تازارتتى.
– بيىل قىس جاي باستالعانىمەن, بىرنەشە كۇن قار جاۋىپ, اۋىلدى تىرپ ەتكىزبەدى. قار بىلتىرعىدان قالىڭ. ونىڭ ۇستىنە اۋىر. كۇن جىلى. ەرىپ جاۋدى. بىلتىر سۋىق بولاتىن. قىستىڭ اياعى ۇزارىپ كەتپەسە يگى ەدى, – دەيدى سامار اۋىلىنىڭ تۇرعىنى ەرنازار ساۋىق.
قالىڭ قارداعى حالىقتىڭ جاعدايىن اۋدان اكىمى نۇرلان مۇحتار ۇلى ءوزىنىڭ ءجىتى نازارىندا ۇستادى. بۇكىل وكرۋگ اكىمدەرى, توتەنشە جاعدايلار ءبولىمى, پوليتسيا بولىمدەرى تاۋلىك بويى قىزمەت ەتتى.
ءدال مۇنداي قار التاي اۋدانىندا دا تۇسكەن. قالا مەن دالانى تەحنيكالار كۇن-ءتۇنى قاردان ارشىپ تىنىم تاپپاعان. اۋدان اكىمى رەنات قۇرمانباەۆ الەۋمەتتىك جەلى ارقىلى تۇرعىندارعا تىكەلەي اقپارات تاراتىپ, وتىردى. ايتۋىنشا, قالا ىشىنە 20 شاقتى تەحنيكا جۇمىلدىرىلعان.
– قالانى ۋاقتىلى قاردان تازارتىپ الدىق. تۇرعىندارعا دەگەن ەندىگى ءوتىنىشىمىز, اركىم ءوز ءۇيىنىڭ شاتىرداعى قارىن ءتۇسىرىپ وتىرسا ەكەن. ايتپەسە پودەزدەن شىعىپ بارا جاتقان قالا تۇرعىنىنا قار قۇلاپ كەتكەن. ابىروي بولعاندا, امان-ساۋ. ەرتەڭگى كۇنى قايعىلى جاعداي بولماۋى ءۇشىن قاۋىپسىزدىك شارالارىن بۇگىن جاساۋىمىز كەرەك, – دەپ ەسكەرتتى التاي اۋدانىنىڭ اكىمى رەنات قۇرمانباەۆ.
راس, نەشە كۇن تولاسسىز جاۋعان قالىڭ قار اۋدان جۇرتىن ابدەن تيتىقتاتتى. قاردى تازالاعانى سول ەدى, 10 قاڭتار كۇنى وبلىس ورتالىعى مەن كەيبىر اۋدانداردا جاڭبىر جاۋىپ, كوشەلەر كوك مۇزعا اينالدى. وسى ورايدا وبلىستى پوليتسيا مەن توتەنشە جاعدايلار دەپارتامەنتى ماماندارى تۇرعىندار مەن جولاۋشىلارعا جولعا شىققاندا بارىنشا اباي بولۋ كەرەكتىگىن ەسكەرتۋمەن بولدى. سونىڭ وزىندە جول-كولىك وقيعالارى ورىن العان. التاي مەن وسكەمەن اراسىنداعى تاس جولدا جەڭىل اۆتوكولىك پەن شاعىن اۆتوبۋس سوقتىعىسىپ, ءبىر ادام كوز جۇمعان. ونىڭ الدى 2 قاڭتاردا وسكەمەن–گلۋبوكوە باعىتىنداعى جولدا ەكى جەڭىل كولىك سوقتىعىسىپ, ءتورت ادام مەرت بولعان. ارينە, وعان بوراننىڭ تىكەلەي قاتىسى جوق تا شىعار, دەسە دە جۇرگىزۋشىلەر قىستىڭ كۇنى اسا اباي بولعاندارى ءجون. ەسكەرتۋى, ەسكەرتەدى عوي. وعان قۇلاق اسپاستان اسىعىس جولعا شىعىپ كەتىپ جاتقان جولاۋشىلار قانشاما؟ ماسەلەن, 2 قاڭتار كۇنى سامار اۋداندىق پوليتسيا بولىمىنە سامار – وسكەمەن تاس جولىندا بىرنەشە كولىكتىڭ تۇرىپ قالعانى تۋرالى حابارلاما كەلىپ تۇسكەن. كەشتەن باستاپ وڭىردە جول ۋچاسكەسىن جابۋ تۋرالى شەشىم قابىلدانعانىمەن, جۇرگىزۋشىلەر كۇن رايىنىڭ قولايسىزدىعىنا جانە ەسكەرتۋگە قاراماستان, اۋىلدان شامامەن 40 شاقىرىمداي ۇزاپ بارىپ, قار قۇرساۋىنا قامالعان. وقيعا ورنىنا جەتكەن پوليتسيا قىزمەتكەرلەرى ولاردى ەۆاكۋاتسيالاۋعا كومەك كورسەتكەن. بارلىعى 11 ادام قار قۇرساۋىنان قۇتقارىلىپ, سامار اۋىلىنا جەتكىزىلگەن. ونىڭ ىشىندە كامەلەتكە تولماعان ەكى بالا بار.
پوليتسيا دەپارتامەنتى اۋا رايىنىڭ ناشارلاۋى كەزىندە جولدارداعى جاعداي حالىققا sms-حابارلامالار, سونداي-اق الەۋمەتتىك جەلىلەر ارقىلى الدىن الا حابارلاناتىنىن ەسكە سالادى. سونىمەن قاتار جۇرگىزۋشىلەرگە تاس جولدار جابىلعان كەزدەگى پوليتسيا قىزمەتكەرلەرىنىڭ زاڭدى تالاپتارىنا باعىنباسا, اكىمشىلىك جاۋاپكەرشىلىك كوزدەلگەن.
شىعىس قازاقستان وبلىسى
