الەمدىك ارەنادا جۇرگىزىلەتىن ەكىجاقتى نەمەسە كوپجاقتى كەلىسسوزدەردە ءبىر جەردەن شالىس كەتسەڭ, مەملەكەتتىڭ ىرگەسى شايقالىپ, قابىرعاسى سوگىلىپ تۇسەدى. بۇل تۇستا ءبىزدىڭ ۇلكەن ارتىقشىلىعىمىز, پرەزيدەنت ق.توقاەۆ – سىرتقى ساياساتتى وتە جەتىك بىلەتىن, ون جىل سىرتقى ىستەر ءمينيسترى بولعان, بۇۇ-دا قىزمەت ەتكەن الەمدىك دەڭگەيدەگى حالىقارالىق ديپلومات. سوندىقتان سىرتقى ساياسات سالاسىنداعى اۋقىمدى جۇمىستاردى اتقارۋدا مەملەكەت باسشىسىنىڭ الەمدىك ديپلوماتياداعى ابىروي-بەدەلى مەن مول تاجىريبەسى بەلگىلى ءبىر دارەجەدە ىقپال ەتەدى.
مەملەكەت باسشىسى سۇحباتتا ۇلت مۇددەسىن قورعاۋ, ونى ىلگەرىلەتۋ, ورنىقتى دامۋعا قولايلى جاعداي قالىپتاستىرۋ ءۇشىن ەلىمىز ساليقالى جانە پراگماتيكالىق سىرتقى ساياساتتى جالعاستىراتىنىن باسا ايتتى. ونىڭ ىشىندە پرەزيدەنت ەلىمىزدىڭ سىرتقى ساياساتىنىڭ نەگىزگى باسىمدىقتارىن دا ناقتى ايقىنداپ بەردى.
پرەزيدەنت قازىرگىدەي اۋمالى-توكپەلى گەوساياسي جاعدايدا شەتەلدىك سەرىكتەستەرىمىزدىڭ بارىمەن, اسىرەسە كورشىلەرىمىزبەن ءوزارا ءتيىمدى ىنتىماقتاستىقتى دامىتۋ ماڭىزدى ەكەنىنە اسا ءمان بەرگەن. وسى ورايدا قازاقستان – قىتاي قارىم-قاتىناسى دوستىق, تاتۋ كورشىلىك جانە ماڭگىلىك ستراتەگيالىق سەرىكتەستىك رۋحىندا قارقىندى دامىپ كەلەتىنىنە توقتالىپ وتەدى. ويتكەنى قىتايمەن ورتاق شەكارامىزدىڭ بولۋى, شىعىس پەن باتىستىڭ اراسىنداعى ۇتىمدى جەردە تۇرعانىمىز قىتاي تاۋارلارىن ءتۇرلى باعىتقا قازاقستان اۋماعى ارقىلى تاسىمالداۋعا زور مۇمكىندىك بەرەدى.
مەملەكەت باسشىسى اتاپ وتكەندەي, قىتاي – وتە جوعارى دامىعان, سونىڭ ىشىندە وزىق تەحنولوگيا سالاسىندا زور تابىسقا جەتكەن زاماناۋي مەملەكەت. مۇنى بۇكىل الەم مويىنداپ وتىر. سوندىقتان شىعىستاعى كورشىمىزبەن ىنتىماقتا بولۋ, دوستىق قارىم-قاتىناس پەن ءوزارا سەنىمنىڭ ارتىقشىلىقتارىن ءتيىمدى پايدالانۋ ەلىمىز ءۇشىن اسا ماڭىزدى ەكەنىن ۇمىتپاۋىمىز كەرەك.
سۇحباتتا ق.توقاەۆ جاقىن كورشىمىز رەسەي فەدەراتسياسىنىڭ الەمدىك ساياساتتا اسا ماڭىزدى ءرول اتقاراتىنىن جانە بۇۇ قاۋىپسىزدىك كەڭەسىنىڭ تۇراقتى مۇشەسى ەكەنىن ۇمىتپاعان ءجون ەكەنىن باسا ايتىپ وتىر. رەسەي – قازاقستاننىڭ نەگىزگى ساۋدا-ەكونوميكالىق سەرىكتەسى. ەكى ەلدىڭ تاۋار اينالىمى 2023 جىلدىڭ باستاپقى 10 ايىندا 21,4 ميلليارد دوللار بولدى. پرەزيدەنتتىڭ ايتۋىنشا, وسى جىلى رەسەيمەن ەكىجاقتى عىلىم-ءبىلىم جانە مادەني-گۋمانيتارلىق سالاداعى قارىم-قاتىناستى نىعايتۋعا ايرىقشا ءمان بەرىلەدى.
سونداي-اق پرەزيدەنت 2024 جىلى ەلىمىزدەگى حالىقارالىق دەڭگەيدەگى ۇلكەن ءىس-شارالارعا ۇيىتقى بولۋعا ءتيىس اسا ماڭىزدى مىندەتتەردى بەلگىلەپ بەردى. قازاقستان وڭىرلىك جانە حالىقارالىق دەڭگەيدەگى بىرقاتار ىقپالدى ۇيىم مەن بىرلەستىككە توراعالىق ەتەدى. سونىمەن قاتار بيىل ەلىمىزدە بىرقاتار اۋقىمدى حالىقارالىق سامميت, فورۋم وتەدى.
مەملەكەت باسشىسىنىڭ ايتۋىنشا, ۇلت مۇددەسىن ەسكەرە وتىرىپ, بيىل دا سىندارلى ءارى ساليقالى سىرتقى ساياساتتى جالعاستىراتىنىمىز كوڭىلگە ۇلكەن سەنىم ۇيالاتادى.
گۇلسىم ەڭسەپوۆا,
سىرتقى ىستەر مينيسترلىگىنىڭ كەڭەسشىسى
