مەكەمە باسشىسى ينديرا يكاپوۆانىڭ ايتۋىنشا, وقۋشىلار سارايى نەگىزگى ۇيىرمەلەردەن بولەك, رەسپۋبليكالىق دەڭگەيدەگى اۆتورلىق جوبالاردى قولعا العان. سونىڭ ءبىرى – «Jas talant» رەسپۋبليكالىق ونلاين-كونكۋرسى. «وقۋشىلار سارايىنىڭ ۇيىمداستىرۋىمەن ءىىى رەسپۋبليكالىق «Jas talant» ونلاين بايقاۋى ءوتتى. كونكۋرس ق.ا.ياساۋي اتىنداعى حقتۋ, حالىقارالىق تۋريزم جانە مەيماندوستىق ۋنيۆەرسيتەتى, م.اۋەزوۆ اتىنداعى وقۋ-مەن جاسالعان مەموراندۋمدار اياسىندا ءبىلىم بەرۋ مەكەمەلەرىنىڭ ءبىتىرۋشى وقۋشىلارى مەن ءبىتىرۋشى كوللەدج ستۋدەنتتەرى اراسىندا ءوتتى. وسى ورايدا 80-گە جۋىق ءوتىنىش كەلىپ, ۇزدىك دەپ تانىلعان 20 قاتىسۋشىعا وقۋ ورىندارىنىڭ گرانتتارى مەن ءتۇرلى جەڭىلدىكتەر بەرىلدى. سونىمەن قاتار وبلىستاعى كوپبالالى, الەۋمەتتىك جاعدايى تومەن, ماماندىعى جوق ايەلدەر ءۇشىن «ىسمەر انا» جوباسى جۇمىس ىستەپ تۇر. جوباعا قاتىسۋشىلار وقۋشىلار سارايىنىڭ تىگىن شەبەرحاناسىندا «كيىم مودەلىن جوبالاۋ» ۇيىرمەسىندە تىگىن ونەرىن مەڭگەرەدى. قازىرگى تاڭعا دەيىن 40-قا جۋىق انا ءبىلىم الدى. جوباعا قاتىسقان ج.جانبولاتوۆا 1 ملن 200 مىڭ, ال گ. ۋتەپوۆا شاعىن جانە ورتا بيزنەستى دامىتۋ ماقساتىندا 3 ملن تەڭگە كولەمىندە «اتامەكەن» ۇلتتىق كاسىپكەرلەر پالاتاسىنىڭ گرانتىن جەڭىپ الىپ, ءوز كاسىپتەرىن دوڭگەلەتىپ وتىر», دەيدى ينديرا سارقىتقىزى. وقۋشىلار سارايى قىزمەتكەرلەرى ەلىمىزدىڭ باسقا وڭىرلەرىندە دە كوپبالالى انالار مەن كاسىپتەرى جوق ايەلدەردىڭ الەۋەتىن ارتتىرۋعا, قۇقىقتارى مەن مۇمكىندىكتەرىن كەڭەيتۋگە باعىتتالعان وسى جوبانىڭ باستالۋىنا كومەكتەسۋدى ماقسات ەتىپ وتىر.
سونىمەن قاتار وقۋشىلار سارايىندا «Unisat» – ءبىلىم بەرۋ حابى, «Qumyra» – قىش ونەرى جانە «Kade» جوباسى قولعا الىنعان. مىسالى, «Kade» جوباسى اياسىندا وڭىردە جاسالاتىن قۇمىرا, قولونەر بۇيىمدارىن, شاپاندار مەن تاقيالاردى جانە باسقا دا ۇلتتىق ناقىشتاعى زاتتاردى ساتىلىمعا شىعارىپ كەلەدى. ودان بولەك, ورتالىقتا كىشكەنتاي بالالارعا ارنالعان ينتەللەكتۋالدىق «Danyshpan Education» دامىتۋ ويىندارى بار.
تۇركىستان
