وبلىسقا ينۆەستيتسيا تارتۋ بويىنشا سەرپىندى جانە ءتيىمدى باعىتتاردىڭ ءبىرى – «قورعاس شىعىس قاقپاسى» اەا جانە «قورعاس» حشىو. اەا – ينۆەستورعا دايىن ينفراقۇرىلىم, سالىقتىق, كەدەندىك جەڭىلدىكتەر, سونداي-اق پرەفەرەنتسيالار بەرۋ ارقىلى قولايلى ينۆەستيتسيالىق احۋال كورسەتەتىن بىرەگەي ينۆەستيتسيالىق الاڭ. ول ءوز كەزەگىندە جوبالاردى ىسكە اسىرۋ ءۇشىن ۇلكەن مۇمكىندىكتەرگە جول اشادى. اەا اۋماعىندا ىسكە اساتىن جوبالاردىڭ جالپى سانى – 26, ال سوماسى 529,9 ملرد تەڭگەنى قۇرايدى. سوعان ساي 3200-گە جۋىق جۇمىس ورنى قۇرىلادى.
«قورعاس» حشىو – بۇل ەكى مەملەكەتتىڭ شەكارالاس اۋماقتارىندا ورنالاسقان جەرگىلىكتى جانە قىتايلىق بولىكتەردەن تۇراتىن ساۋدا, ەكونوميكالىق, ينۆەستيتسيالىق ىنتىماقتاستىق كەشەن. جوبا ء«بىر بەلدەۋ – ءبىر جول» جاڭا ەكونوميكالىق ستراتەگياسى شەڭبەرىندە ىسكە اسقان. ونىڭ اۋماعىندا جالپى سوماسى 59,6 ملرد تەڭگەگە 19 جوبا جۇزەگە اسادى. سوعان ساي 480-گە جۋىق جۇمىس ورنى قۇرىلادى.
بۇدان بولەك, تالدىقورعان قالاسىنىڭ اۋماعىندا يندۋستريالىق ايماق جۇمىس ىستەيدى. كاسىپكەرلىك ورتا مەن مەملەكەتتىك ورگانداردىڭ كەدەرگىسىز ءوزارا ءىس-قيمىلىن قۇرۋدىڭ قوسىمشا تەتىگى رەتىندە وبلىس اكىمدىگى ينۆەستيتسيالىق قىزمەت جانە ينۆەستورلاردى قولداۋ بويىنشا قىزمەت كورسەتەتىن ايماقتىق Zhetysu Investt ۇيىمىن قۇردى.
بۇگىندە كومپانيا مەملەكەتتىك قولداۋ شارالارىن ءتۇسىندىرۋ بويىنشا الەۋەتتى ينۆەستورلارمەن تۇراقتى تۇردە كەزدەسۋلەر وتكىزەدى. سونىڭ ناتيجەسىندە وڭىرگە بىرقاتار ءىرى ينۆەستور تارتىلعان. ونىڭ ىشىندە قىتاي, رەسەي, گەرمانيا, يزرايل, ساۋد ارابياسى ەلدەرىنەن جەك, كولىك جانە لوگيستيكا سالاسىنداعى ءوز جوبالارىن ىسكە اسىرۋدى جوسپارلاپ وتىرعان ينۆەستورلار بار. سوعان ساي اي سايىن وبلىستىڭ ينۆەستيتسيالىق پورتفەلىنە مونيتورينگ جۇرگىزىلىپ وتىرادى. قازىر جالپى قۇنى 1851,8 ملرد تەڭگەنى قۇرايتىن 184 جوبا تۇر. ول 2023-2027 جىلدار ارالىعىندا ىسكە اسادى. سولاي بولعان جاعدايدا 9 مىڭعا جۋىق جۇمىس ورنى اشىلماق. وتكەن جىلى قۇنى 53,2 ملرد تەڭگەگە ساي مىڭعا جۋىق جۇمىس ورنى قۇرىلدى. سوعان ساي 47 جوبا ىسكە قوسىلدى. تۇتاستاي العاندا, وڭىردەگى بيزنەستى دامىتۋعا بارلىق قولايلى جاعدايلار جاسالعان. بۇل وبلىستىڭ ينۆەستيتسيالىق جانە ەكونوميكالىق احۋالىن جاقسارتۋعا اكەلەدى.
ايتا كەتەيىك, وسى ورايدا «Amanat» پارتياسى وبلىستىق فيليالىنىڭ ساياسي كەڭەس بيۋروسى, وبلىستىق ماسليحاتىنداعى جانە تالدىقورعان قالالىق ماسليحاتىنداعى «Amanat» پارتياسى فراكتسياسىنىڭ بىرلەسكەن وتىرىسى ءوتتى. وندا تالدىقورعان قالاسىنىڭ اكىمى ەرنات ءبازىل وبلىس ورتالىعىنىڭ الەۋمەتتىك-ەكونوميكالىق دامۋى جايىندا باياندادى.
«شاھاردا بىلتىر ونەركاسىپ سالاسىندا ەلەۆاتور كەراميكالىق پليتالاردى شىعارۋ زاۋىتى كەڭەيتىلگەن. ناتيجەسىندە, 110 جاڭا جۇمىس ورنى اشىلىپ, 850,0 ملن تەڭگە ينۆەستيتسيالار تارتىلعان. اۋىل شارۋاشىلىعى سالاسىندا 12 شارۋا قوجالىعى جالپى سوماسى 385,3 ملن تەڭگەگە اۋىل شارۋاشىلىعى تەحنيكاسىن ساتىپ العان. جاڭا بيزنەس-باستامالاردى ىسكە اسىرۋ ءۇشىن 40,0 ملن تەڭگەگە 8 قايتارىمسىز مەملەكەتتىك گرانت بەرىلگەن», دەدى ە.ءبازىل.
الايدا جىل باسىنان تارتىلعان 54,1 ملرد تەڭگە ينۆەستيتسيا جىلدىق جوسپاردىڭ تەك 63 پايىزىن قۇراپ وتىر. 2023 جىلعى جوسپار 86 ملرد تەڭگە, ونىڭ 61,5 ملرد تەڭگەسى نەمەسە 71,5 پايىزى ورىندالادى دەپ كۇتىلەدى. سونىمەن قاتار تالدىقورعان يندۋستريالىق ايماعىن ءىرى ينۆەستيتسيالىق جوبالارمەن تولتىرۋ ماسەلەسى ءالى كۇنگە دەيىن تولىق شەشىمىن تاپپاي كەلەدى. بۇگىندە ونىڭ اۋماعىندا جۇمىس ىستەپ تۇرعانى – تەك 6 كاسىپورىن بار. ءوڭىر باسشىسى قالا حالقىمەن كەزدەسكەندە وسى ماسەلەگە ءجىتى توقتالىپ, جاۋاپتى ماماندارعا تاپسىرما بەرگەن ەدى.
«وبلىس اكىمىنىڭ ورىنباسارى اسەت قاناعاتوۆقا, كاسىپكەرلىك جانە يندۋستريالىق-يننوۆاتسيالىق دامۋ باسقارماسىنا قالا اكىمدىگىمەن بىرلەسىپ, قالانىڭ الەۋەتىن ەسكەرە وتىرىپ, ينۆەستيتسيالاردى تارتۋ بويىنشا جۇمىستى جانداندىرۋدى جانە قولدانىستاعى يندۋستريالىق ايماقتا جوسپارلانعان جوبالاردى ۋاقىتىندا جۇزەگە اسىرۋ ءۇشىن بارلىق قاجەتتى شارا قابىلداۋدى تاپسىرامىن», دەدى بەيبىت يساباەۆ.
قازىر وسى باعىتتا جۇيەلى جۇمىستار جۇرگىزىلىپ جاتىر.
جەتىسۋ وبلىسى
